নতুন দিল্লীত আজি মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত কংগ্ৰেছসহ বিৰোধী দলসমূহে সাব্যস্ত কৰা প্ৰতিবাদক কেন্দ্ৰ কৰি পৰিস্থিতি উত্তপ্ত হৈ পৰে। সংসদ ভৱনৰ পৰা নিৰ্বাচন আয়োগৰ কাৰ্যালয়লৈ বিৰোধী সাংসদসকলে উলিওৱা প্ৰতিবাদী সমদল আৰক্ষীয়ে বেৰিকেড দি বাধা দিয়ে। ইয়াৰ পাছতে ৰাহুল গান্ধী, প্ৰিয়ংকা গান্ধীসহ কেইবাগৰাকীও বিৰোধী নেতাক আৰক্ষীয়ে আটক কৰে।
মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীক কেন্দ্ৰ কৰি কংগ্ৰেছ আৰু অন্যান্য বিৰোধী দলসমূহে প্ৰতিবাদ কৰি আহিছে। বিশেষকৈ ভোটাৰ তালিকাৰ SIR প্ৰক্ৰিয়াক লৈ বিৰোধী দলসমূহে প্ৰশ্ন উত্থাপন কৰিছে। কংগ্ৰেছৰ অভিযোগ, SIRৰ নামত ভোটাৰ তালিকাৰ পৰা যোগ্য ভোটাৰৰ নাম বাদ পৰাৰ আশংকা আছে আৰু ইয়াৰ ফলত বহু সাধাৰণ ভোটাৰ সমস্যাৰ সন্মুখীন হ’ব পাৰে। বিৰোধী দলসমূহে এই প্ৰক্ৰিয়াত স্বচ্ছতা আৰু নিৰপেক্ষতা নিশ্চিত কৰাৰ দাবী জনাইছে। অৱশ্যে নিৰ্বাচন আয়োগে এই অভিযোগ অস্বীকাৰ কৰি আহিছে। আয়োগৰ মতে, ভোটাৰ তালিকাৰ সংশোধনৰ উদ্দেশ্য হৈছে ভুৱা, ডুপ্লিকেট বা অযোগ্য নাম চিনাক্ত কৰি ভোটাৰ তালিকা অধিক নিৰ্ভৰযোগ্য কৰা।
মঙলবাৰে কংগ্ৰেছ সভাপতি মল্লিকাৰ্জুন খৰ্গে, লোকসভাৰ বিৰোধী দলপতি ৰাহুল গান্ধী আৰু অন্যান্য INDI মৰ্চাৰ সাংসদসকলে সংসদ ভৱন চৌহদৰ পৰা নিৰ্বাচন আয়োগৰ কাৰ্যালয়লৈ সমদল উলিয়ায়। সমদলটো আগবাঢ়ি যোৱাৰ সময়তে দিল্লী আৰক্ষীয়ে সংসদ ষ্ট্ৰীটৰ ওচৰত বেৰিকেড স্থাপন কৰি তেওঁলোকৰ পথ বন্ধ কৰি দিয়ে। আৰক্ষীয়ে বৃহৎ সংখ্যক নিৰাপত্তাৰক্ষী মোতায়েন কৰিছিল। আৰক্ষীয়ে পথ বন্ধ কৰাৰ পাছত প্ৰতিবাদকাৰী সাংসদসকলে পথতে বহি ধৰ্ণা আৰম্ভ কৰে। প্ৰতিবাদস্থলীত বিভিন্ন শ্লোগান দিয়া হয় আৰু জ্ঞানেশ কুমাৰৰ পদত্যাগৰ দাবী পুনৰ উত্থাপন কৰা হয়।
প্ৰতিবাদৰ মাজতে ৰাহুল গান্ধীয়ে আৰক্ষীৰ বেৰিকেডৰ ওপৰত উঠি প্ৰতিবাদ সাব্যস্ত কৰে। ইয়াৰ কিছুসময় পাছতে আৰক্ষীয়ে তেওঁক আটক কৰি লৈ যায়। প্ৰিয়ংকা গান্ধী আৰু অন্যান্য বিৰোধী নেতাসকলকো আৰক্ষীয়ে আটক কৰে। পিছত তেওঁলোকক এৰি দিয়া হয় বুলি প্ৰতিবেদনত প্ৰকাশ পাইছে।
প্ৰতিবাদৰ আগতেই সংসদ ভৱন, Parliament Street আৰু নিৰ্বাচন আয়োগৰ কাৰ্যালয়ৰ আশে-পাশে কটকটীয়া নিৰাপত্তা ব্যৱস্থা কৰা হৈছিল। আৰক্ষীয়ে বেৰিকেড স্থাপন কৰাৰ লগতে বৃহৎ সংখ্যক নিৰাপত্তাৰক্ষী মোতায়েন কৰিছিল। বিৰোধী সাংসদসকলে নিৰ্বাচন আয়োগৰ কাৰ্যালয়লৈ গৈ নিজৰ দাবী জনাব বিচাৰিছিল যদিও আৰক্ষীয়ে তেওঁলোকক আগবাঢ়িবলৈ নিদিলে। ফলত প্ৰতিবাদ ধৰ্ণালৈ পৰিণত হয় আৰু পৰিস্থিতি অধিক উত্তপ্ত হৈ পৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
