ঝাৰখণ্ডৰ ৰামগড়ৰ এগৰাকী বিধৱা মাতৃৰ সাহস আৰু পৰিশ্ৰমে এতিয়া সকলোৰে দৃষ্টি আকৰ্ষণ কৰিছে। নাম তেওঁৰ কবিতা। স্বামীৰ মৃত্যুৰ পিছত দুই সন্তান আৰু বৃদ্ধ শহুৰ-শাহুৱেকৰ দায়িত্ব কান্ধত লৈ জীৱন-সংগ্ৰাম কৰি অহা কবিতাই এটা চৰকাৰী চাকৰিৰ আশাত কঠিন পৰিশ্ৰমেৰে নিজকে প্ৰস্তুত কৰি তুলিছে।
কবিতাৰ নাছিল কোনো উন্নতমানৰ দৌৰৰ জোতা, স্পাইকছ বা ট্ৰেকছুট। তথাপিও তেওঁ হাৰ মনা নাছিল। খালী ভৰিৰে, শাৰী পিন্ধিয়েই প্ৰচণ্ড গৰমৰ মাজত ১,৬০০ মিটাৰ দৌৰি তেওঁ ৰামগড়ৰ গৃহৰক্ষী জোৱানৰ নিযুক্তিৰ শাৰীৰিক পৰীক্ষাত অংশগ্ৰহণ কৰে। আটাইতকৈ উল্লেখযোগ্য কথাটো হ’ল, এই শাৰীৰিক পৰীক্ষাত কবিতাই কেৱল উত্তীৰ্ণ হোৱাই নহয়, অতি ভাল নম্বৰ লাভ কৰি নিজৰ যোগ্যতা প্ৰমাণ কৰে। ১,৬০০ মিটাৰৰ দৌৰ সম্পূৰ্ণ কৰিবলৈ ১০ মিনিটৰ সময়সীমা নিৰ্ধাৰণ কৰা হৈছিল। কিন্তু কবিতাই সেই দৈৰ্ঘ্য কেৱল প্ৰায় ৬ মিনিটততে সম্পূৰ্ণ কৰি সকলোকে আচৰিত কৰি তোলে।
স্বামীৰ মৃত্যুৰ পিছত পৰিয়ালটো চলাবলৈ কবিতাই বৰ্তমান ইটা ভাটা এটাত কাম কৰি আছে। দৈনিক কঠোৰ পৰিশ্ৰমৰ মাজতো তেওঁ নিজৰ লক্ষ্যৰ পৰা আঁতৰি যোৱা নাছিল। প্ৰতিদিনে পুৱা প্ৰায় ৪ বজাত উঠি বালিময় মাটিত দৌৰৰ অনুশীলন কৰিছিল। কোনো বিশেষ প্ৰশিক্ষণৰ সুবিধা বা উন্নত ক্ৰীড়া সামগ্ৰী নথকাৰ পাছতো নিজৰ ইচ্ছাশক্তি আৰু অধ্যৱসায়ৰ ওপৰত ভৰসা কৰি তেওঁ প্ৰস্তুতি চলাইছিল। কবিতাৰ বাবে এই দৌৰ কেৱল এটা শাৰীৰিক পৰীক্ষা নাছিল। এই দৌৰ আছিল তেওঁৰ দুই সন্তানৰ উজ্জ্বল ভৱিষ্যতৰ বাবে এক সংগ্ৰাম। স্বামীক হেৰুৱাৰ পিছত পৰিয়ালৰ দায়িত্ব অকলেই বহন কৰি অহা কবিতাই এটা স্থায়ী চাকৰি লাভ কৰি সন্তান দুটাক ভালদৰে ডাঙৰ-দীঘল কৰাৰ সপোন দেখিছে।
তেওঁৰ এই অসাধাৰণ প্ৰচেষ্টাৰ খবৰ বিয়পি পৰাৰ পিছত স্থানীয় লোকসকলৰ মাজতো যথেষ্ট প্ৰশংসা লাভ কৰে। স্থানীয় এটা দৌৰবিদৰ গোটে কবিতাৰ ঘৰলৈ গৈ তেওঁক সন্মান জনায় আৰু তেওঁৰ সাহসক প্ৰশংসা কৰে। ৰামগড়ৰ গৃহৰক্ষী জোৱান নিযুক্তি প্ৰক্ৰিয়াত মহিলাৰ বাবে ৫০ শতাংশ সংৰক্ষণ থকাৰ লগতে বিধৱাসকলৰ বাবেও অতিৰিক্ত সুযোগৰ ব্যৱস্থা আছে। সেয়ে কবিতাৰ বাবে এই নিযুক্তি কেৱল এটা চাকৰিৰ সুযোগ নহয়, বৰং জীৱনটো নতুনকৈ গঢ়ি তোলাৰ এক ডাঙৰ সম্ভাৱনা।
খালী ভৰি, শাৰী আৰু প্ৰচণ্ড ৰ’দ—কোনোটোৱেই কবিতাৰ লক্ষ্যৰ বাটত বাধা হ’ব নোৱাৰিলে। তেওঁৰ এই কাহিনীয়ে প্ৰমাণ কৰিলে যে পৰিস্থিতি যিমানেই কঠিন নহওক কিয়, দৃঢ় সংকল্প, পৰিশ্ৰম আৰু পৰিয়ালৰ বাবে কিবা এটা কৰাৰ অদম্য ইচ্ছাই মানুহক অসাধ্য সাধন কৰাৰ শক্তি দিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
