জনপ্ৰিয় ৰেপাৰ তথা গায়ক হানী সিং আকৌ এবাৰ বিতৰ্কৰ মাজত সোমাই পৰিছে। মহাৰাষ্ট্ৰ চাইবাৰ আৰক্ষীয়ে এটা কনচাৰ্টৰ সময়ত আপত্তিজনক মন্তব্য কৰাৰ অভিযোগৰ তদন্তৰ বাবে তেওঁক সোধা-পোছাৰ বাবে মাতিছিল। কিন্তু নিৰ্ধাৰিত সময়ত সোমবাৰে তদন্তকাৰী বিষয়াৰ সন্মুখত হাজিৰ নহ’ল হানী সিং। শেহতীয়া তথ্য অনুসৰি, হানী সিঙে মহাৰাষ্ট্ৰ চাইবাৰ আৰক্ষীৰ পৰা তদন্তত অংশগ্ৰহণৰ বাবে অধিক সময় বিচাৰিছে। এই ঘটনাৰ পিছতে বিষয়টোক লৈ নতুনকৈ চৰ্চা আৰম্ভ হৈছে।
হানী সিঙৰ বিৰুদ্ধে কি অভিযোগ?
এক অনুষ্ঠানত হানী সিঙে আপত্তিজনক মন্তব্য কৰাৰ অভিযোগ উত্থাপন হোৱাৰ পিছতে মহাৰাষ্ট্ৰ চাইবাৰ আৰক্ষীয়ে তদন্ত আৰম্ভ কৰে। এই তদন্তৰ অংশ হিচাপে হানী সিঙক সোধা-পোছাৰ বাবে নিৰ্ধাৰিত সময়ত তদন্তকাৰী বিষয়াৰ সন্মুখত হাজিৰ হ’বলৈ নিৰ্দেশ দিয়া হৈছিল। কিন্তু তেওঁ সেই সময়ত হাজিৰ নোহোৱাত এতিয়া তদন্তক লৈ বিশেষ নজৰ ৰখা হৈছে। অৱশ্যে, হানী সিঙে অধিক সময় বিচৰাৰ কথা সংবাদ মাধ্যমৰ বাতৰিত প্ৰকাশ পাইছে।
পূৰ্বেও বিতৰ্কত সোমাইছিল হানী সিং
হানী সিঙৰ বাবে বিতৰ্ক নতুন কথা নহয়। ইয়াৰ পূৰ্বেও তেওঁৰ গান আৰু লাইভ প্ৰদৰ্শনক লৈ আইনী বিতৰ্কৰ সৃষ্টি হৈছিল। ২০২৫ চনত দিল্লীৰ ইন্দিৰা গান্ধী ইনড’ৰ ষ্টেডিয়ামত অনুষ্ঠিত এটা অনুষ্ঠানত হানী সিঙে আপত্তিজনক গীতৰ কিছু শাৰী পৰিৱেশন কৰাৰ অভিযোগ উত্থাপন হৈছিল। এই অভিযোগক লৈ হিন্দু শক্তি দল নামৰ সংগঠনে দিল্লী উচ্চ ন্যায়ালয়ৰ কাষ চাপিছিল। চলিত বছৰৰ মে’ মাহত আদালতে এই আবেদনৰ প্ৰসংগত হানী সিঙক শপতনামা দাখিল কৰিবলৈ কৈছিল। ইয়াৰ উপৰি, হানী সিঙৰ কেইবাটাও গানক লৈ পূৰ্বেও সমালোচনা হৈছে। বিশেষকৈ তেওঁৰ কিছুমান গীতত নাৰীক আপত্তিজনকভাৱে উপস্থাপন কৰাৰ অভিযোগ উত্থাপন হৈছিল।
উল্লেখযোগ্য যে, কিছু সময়ৰ বাবে সংগীত জগতৰ পৰা আঁতৰি আছিল হানী সিং। অসুস্থতাৰ বাবে তেওঁ দীঘলীয়া সময় গান আৰু মঞ্চ পৰিৱেশনৰ পৰা বিৰতি লৈছিল। অৱশ্যে পিছত তেওঁ পুনৰ সংগীত জগতলৈ ঘূৰি আহে আৰু নতুন গান তথা লাইভ শ্ব’ৰ জৰিয়তে নিজৰ অনুৰাগীৰ মাজত জনপ্ৰিয়তা ঘূৰাই আনে। এতিয়া মহাৰাষ্ট্ৰ চাইবাৰ আৰক্ষীৰ তদন্তত হানী সিং কেতিয়া হাজিৰ হয় আৰু তেওঁৰ বিৰুদ্ধে উত্থাপিত অভিযোগ সন্দৰ্ভত কি তথ্য পোহৰলৈ আহে, সেয়া হ’ব লক্ষ্যণীয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
