বলিউডত সম্প্ৰতি শ্বাহৰুখ খানৰ ছবি ‘কিং’ আৰু ছলমান খানৰ নতুন প্ৰজেক্টক লৈ ব্যাপক চৰ্চা চলি আছে। ইয়াৰ মাজতে আমীৰ খানৰ অনুৰাগীসকলেও তেওঁৰ পৰৱৰ্তী ছবিখনৰ বাবে আগ্ৰহেৰে অপেক্ষা কৰি আছে। শেহতীয়াকৈ অভিনেতাগৰাকীয়ে তেওঁৰ জনপ্ৰিয় ছবি ‘থ্ৰী ইডিয়টছ’ৰ ছিকুৱেল সন্দৰ্ভত এটা গুৰুত্বপূৰ্ণ আপডেট দিছে। ইয়াৰ পিছতে ছবিখনক লৈ অনুৰাগীসকলৰ মাজত নতুনকৈ আশাৰ সঞ্চাৰ হৈছে।
২০২৫ চনৰ ২০ জুনত মুক্তি লাভ কৰা ‘চিতাৰে জমীন পৰ’ ছবিখনৰ পিছত আমীৰ খানৰ পৰৱৰ্তী প্ৰজেক্ট সন্দৰ্ভত বিশেষ আনুষ্ঠানিক ঘোষণা কৰা হোৱা নাই। অৱশ্যে ‘থ্ৰী ইডিয়টছ’ৰ ছিকুৱেলৰ কাম আগবাঢ়ি থকাৰ খবৰে এতিয়া বলিউডৰ অনুৰাগীসকলৰ দৃষ্টি আকৰ্ষণ কৰিছে।
‘থ্ৰী ইডিয়টছ’ৰ ছিকুৱেলৰ কাম কিমান আগবাঢ়িছে?
শেহতীয়াকৈ ছিংগাপুৰ আন্তঃৰাষ্ট্ৰীয় চলচ্চিত্ৰ মহোৎসৱত অংশগ্ৰহণ কৰি আমীৰ খানে ‘থ্ৰী ইডিয়টছ’ৰ ছিকুৱেল সন্দৰ্ভত নিজৰ মত প্ৰকাশ কৰে। অভিনেতাগৰাকীয়ে জনোৱা মতে, ছবিখনৰ চিত্ৰনাট্যৰ কাম বৰ্তমান চলি আছে। পৰিচালক ৰাজকুমাৰ হিৰাণীয়ে ছবিখনৰ চিত্ৰনাট্য প্ৰস্তুত কৰি আছে। আমীৰ খানে কয় যে ৰাজকুমাৰ হিৰাণী উভতি অহাৰ পিছত তেওঁক ছবিখনৰ চূড়ান্ত চিত্ৰনাট্যৰ বিষয়ে বিতংভাৱে জনাব। অৱশ্যে ছবিখনৰ বিষয়ে এতিয়াই অধিক কথা কোৱাটো সঠিক নহ’ব বুলিও তেওঁ উল্লেখ কৰে। তথাপি প্ৰকল্পটোৰ কাম আগবাঢ়ি থকাৰ খবৰে অনুৰাগীসকলৰ মাজত উৎসাহ বৃদ্ধি কৰিছে।
ছিংগাপুৰ আন্তঃৰাষ্ট্ৰীয় চলচ্চিত্ৰ মহোৎসৱত নিজৰ জীৱনৰ এটা বিশেষ অভিজ্ঞতাৰ কথাও প্ৰকাশ কৰে আমিৰ খানে। ক’ভিড-১৯ মহামাৰীৰ সময়ত হোৱা লকডাউনৰ দিনবোৰত তেওঁ নিজৰ জীৱন আৰু পৰিয়ালৰ বিষয়ে গভীৰভাৱে চিন্তা কৰাৰ সুযোগ পাইছিল।
২০০৯ চনত মুক্তি লাভ কৰা ‘থ্ৰী ইডিয়টছ’ বলীউডৰ অন্যতম জনপ্ৰিয় আৰু সফল ছবি। ৰাজকুমাৰ হিৰাণীৰ পৰিচালনাত নিৰ্মিত ছবিখনে মুক্তিৰ সময়ত দৰ্শকৰ ব্যাপক সঁহাৰি লাভ কৰিছিল আৰু বক্স অফিচত উল্লেখযোগ্য সফলতা অৰ্জন কৰিছিল। ছবিখনত আমীৰ খান, আৰ মাধৱন, শ্বৰ্মন যোশী, কৰীনা কাপুৰ আৰু বোমন ইৰাণীয়ে গুৰুত্বপূৰ্ণ চৰিত্ৰত অভিনয় কৰিছিল। শিক্ষাব্যৱস্থা, বন্ধুত্ব, জীৱনৰ লক্ষ্য আৰু নিজৰ পছন্দ অনুসৰি আগবাঢ়ি যোৱাৰ গুৰুত্ব ছবিখনৰ মূল বিষয় আছিল। মুক্তিৰ পিছৰে পৰা ছবিখনে দৰ্শকৰ মাজত বিশেষ স্থান লাভ কৰি আহিছে। আজিও ছবিখনৰ সংলাপ আৰু চৰিত্ৰসমূহৰ বিষয়ে চৰ্চা চলি থাকে।
পুনৰ একেলগে দেখা যাবনে পুৰণি তাৰকাসকলক?
‘থ্ৰী ইডিয়টছ’ৰ ছিকুৱেলৰ চিত্ৰনাট্যৰ কাম চলি থকাৰ খবৰে অনুৰাগীসকলৰ মাজত নতুন আশাৰ সৃষ্টি কৰিছে। বিশেষকৈ আমীৰ খান, আৰ মাধৱন আৰু শ্বৰ্মন যোশীক পুনৰ একেলগে দেখাৰ বাবে বহু দৰ্শক আগ্ৰহী। কিন্তু বৰ্তমানলৈকে ছবিখনৰ মুক্তিৰ তাৰিখ, অভিনয়শিল্পীৰ সম্পূৰ্ণ তালিকা বা কাহিনীৰ বিষয়ে আনুষ্ঠানিকভাৱে সবিশেষ ঘোষণা কৰা হোৱা নাই। এতিয়া সকলোৰে অপেক্ষা পৰিচালক ৰাজকুমাৰ হিৰাণীৰ চূড়ান্ত চিত্ৰনাট্য আৰু ছবিখনৰ আনুষ্ঠানিক ঘোষণালৈ। যদি পৰিকল্পনা অনুসৰি প্ৰকল্পটো আগবাঢ়ে, তেন্তে ‘থ্ৰী ইডিয়টছ’ৰ ছিকুৱেলে পুনৰ এবাৰ দৰ্শকৰ মাজত বিশেষ উৎসাহৰ সৃষ্টি কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
