পুৱা ৬ বজাত, ১১ বজাত নে আবেলি?

পুৱা পাৰ্কত ব্যায়াম কৰা, মুকলি ঠাইত যোগাসন কৰা বা সূৰ্যৰ পোহৰত কিছু সময় কটোৱা—ভাৰতৰ প্ৰায় প্ৰতিখন চহৰতে এনে দৃশ্য দেখিবলৈ পোৱা যায়। বহুতে বিশ্বাস কৰে যে পুৱাৰ মৃদু ৰ’দ শৰীৰৰ বাবে উপকাৰী আৰু ই ভিটামিন Dৰ অভাৱ দূৰ কৰাত সহায় কৰে। কিন্তু আপুনি জানেনে, দিনটোৰ কোনটো সময়ত সূৰ্যৰ পোহৰৰ পৰা শৰীৰে সৰ্বাধিক ভিটামিন D লাভ কৰিব পাৰে? পুৱা ৬ বজাত সূৰ্যৰ পোহৰত বহিলে সঁচাকৈয়ে পৰ্যাপ্ত ভিটামিন D পোৱা যায়নে? নে দিনৰ ১১ বজাৰ পৰা দুপৰীয়াৰ সময়ছোৱাত ৰ’দত থাকিলে শৰীৰত ভিটামিন D অধিক পৰিমাণে উৎপন্ন হয়? এই প্ৰশ্নবোৰৰ উত্তৰ বিভিন্ন গৱেষণাত পোৱা গৈছে।

ভিটামিন Dৰ বাবে দিনৰ কোনটো সময় উপযুক্ত?

গৱেষণাৰ পৰা জানিব পৰা গৈছে যে সূৰ্য আকাশত যেতিয়া আটাইতকৈ ওপৰত থাকে, তেতিয়া সূৰ্যৰ পোহৰত থকা UVB ৰশ্মিৰ পৰিমাণ অধিক হয়। এই UVB ৰশ্মিয়ে আমাৰ ছালত ভিটামিন D উৎপাদন কৰাত সহায় কৰে। সাধাৰণতে দিনৰ ১১ বজাৰ পৰা দুপৰীয়া ২ বজাৰ ভিতৰত ভিটামিন D উৎপাদনৰ বাবে সূৰ্যৰ পোহৰ অধিক ফলপ্ৰসূ হয়। অৱশ্যে এই সময়ত UV বিকিৰণৰ তীব্ৰতা বেছি হোৱা বাবে ছালৰ ক্ষতি হোৱাৰ আশংকাও থাকে। সেয়েহে অধিক সময় ৰ’দত থকাটো ভিটামিন D লাভৰ সঠিক উপায় নহয়।

ভাৰতৰ দৰে দেশত যথেষ্ট সূৰ্যৰ পোহৰ পোৱা যায়। তথাপি বহু লোকৰ শৰীৰত ভিটামিন Dৰ অভাৱ দেখা যায়। ইয়াৰ কাৰণ কেৱল সূৰ্যৰ পোহৰৰ অভাৱ নহয়। সূৰ্যৰ পোহৰ পোৱাৰ সময়, ছালৰ ৰং, বয়স, বতৰ আৰু জীৱনশৈলীৰ দৰে বিভিন্ন কাৰকে ভিটামিন D উৎপাদনত প্ৰভাৱ পেলায়।

গৱেষণাত কি পোৱা গৈছিল?

২০১৩ চনত ‘Dermato-Endocrinology’ নামৰ এখন গৱেষণা আলোচনীত প্ৰকাশিত ভাৰতীয় অধ্যয়ন এটাত সূৰ্যৰ পোহৰৰ পৰা ভিটামিন D উৎপাদনৰ বিষয়ে পৰীক্ষা কৰা হৈছিল। ‘Vitamin D Status and Sun Exposure in India’ শীৰ্ষক এই গৱেষণাটো ২০০৭ চনৰ মে’ মাহৰ পৰা ২০০৮ চনৰ আগষ্টলৈ দক্ষিণ ভাৰতৰ তিৰুপতিত সম্পন্ন কৰা হৈছিল। গৱেষকসকলে পুৱা ৮ বজাৰ পৰা বিয়লি ৪ বজালৈ প্ৰতি ঘণ্টাত সূৰ্যৰ পোহৰৰ নমুনা সংগ্ৰহ কৰি পৰীক্ষা কৰিছিল। গৱেষণাত দেখা গৈছিল যে ছালত ভিটামিন D উৎপাদনৰ বাবে প্ৰয়োজনীয় প্ৰি-ভিটামিন D3 গঠন পুৱা ১১ বজাৰ পৰা দুপৰীয়া ২ বজাৰ ভিতৰত সৰ্বাধিক হয়। দুপৰীয়া প্ৰায় ১২:৩০ বজাত ইয়াৰ উৎপাদনৰ সৰ্বোচ্চ মাত্ৰা ৰেকৰ্ড কৰা হৈছিল। অৰ্থাৎ, এই অঞ্চলত পুৱা ১১ বজাৰ পৰা দুপৰীয়া ২ বজালৈ সূৰ্যৰ পোহৰ ভিটামিন D উৎপাদনৰ ক্ষেত্ৰত অধিক ফলপ্ৰসূ আছিল।

ভাৰতৰ চাৰিটা অঞ্চলৰ UVB ৰশ্মিৰ ওপৰত গৱেষণা

২০১৫ চনত প্ৰকাশিত আন এটা গৱেষণাত ভাৰতৰ উত্তৰ, দক্ষিণ, উত্তৰ-পূব আৰু পশ্চিম অঞ্চলত ১২ মাহ ধৰি UVB ৰশ্মিৰ পৰিমাণ অধ্যয়ন কৰা হৈছিল। ‘Regional and Seasonal Variations in UVB Radiation and Vitamin D Synthesis in India’ শীৰ্ষক এই গৱেষণাত দেখা গৈছিল যে দিনৰ ১১ বজাৰ পৰা দুপৰীয়া ১ বজাৰ ভিতৰত UVB সূচকাংক সৰ্বাধিক থাকে। গৱেষণাৰ মতে, উত্তৰ ভাৰতত গড় UVB সূচকাংক অধিক আছিল। আনহাতে, উত্তৰ-পূব ভাৰতত ইয়াৰ পৰিমাণ তুলনামূলকভাৱে কম দেখা গৈছিল। আন এক গুৰুত্বপূৰ্ণ তথ্য হৈছে, শীতকালত ৰ’দত থাকিলেও শিশুৰ শৰীৰত ভিটামিন Dৰ মাত্ৰা বৃদ্ধি নোহোৱাকৈ হ্ৰাস পোৱাৰ ঘটনাও দেখা গৈছিল। ইয়াৰ পৰা স্পষ্ট হয় যে কেৱল ৰ’দত বহিলেই ভিটামিন Dৰ অভাৱ দূৰ নহয়। সূৰ্যৰ পোহৰত থকা UVB ৰশ্মিৰ পৰিমাণো যথেষ্ট গুৰুত্বপূৰ্ণ।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ