বংগোপসাগৰত সৃষ্টি হোৱা গভীৰ নিম্নচাপ ক্ৰমাৎ শক্তিশালী ৰূপ ধাৰণ কৰিছে। এই নিম্নচাপ পৰৱৰ্তী সময়ত ঘূৰ্ণীবতাহ ‘আকভান’ (Akvan)ত পৰিণত হোৱাৰ সম্ভাৱনা আছে। ভাৰতীয় বতৰ বিজ্ঞান বিভাগৰ (IMD) শেহতীয়া পূৰ্বাভাস অনুসৰি, ঘূৰ্ণীবতাহটোৱে শক্তি বৃদ্ধি কৰি ভাৰতৰ পূব উপকূলৰ দিশে আগবাঢ়িছে। বিশেষকৈ অন্ধ্ৰপ্ৰদেশ আৰু দক্ষিণ ওড়িশাৰ উপকূলীয় অঞ্চলত ঘূৰ্ণীবতাহৰ প্ৰভাৱ পৰাৰ আশংকা কৰা হৈছে।
বতৰ বিজ্ঞান বিভাগে ইতিমধ্যে অন্ধ্ৰপ্ৰদেশ আৰু ইয়াৰ কাষৰীয়া দক্ষিণ ওড়িশাৰ উপকূলৰ বাবে প্ৰাক্-ঘূৰ্ণীবতাহ সতৰ্কবাণী জাৰি কৰিছে। ঘূৰ্ণীবতাহৰ ফলত প্ৰচণ্ড বৃষ্টিপাত, শক্তিশালী বতাহ আৰু সাগৰৰ উত্তাল অৱস্থাৰ সৃষ্টি হ’ব পাৰে।
ঘূৰ্ণীবতাহ ‘আকভান’ৰ সম্ভাৱ্য গতিপথক লৈ বতৰ বিজ্ঞান বিভাগে বিশেষ নজৰ ৰাখিছে। শেহতীয়া পূৰ্বাভাস অনুসৰি, ২০ নৱেম্বৰৰ দুপৰীয়াৰ ভিতৰত ঘূৰ্ণীবতাহটোৱে অন্ধ্ৰপ্ৰদেশ আৰু ইয়ানাম উপকূলৰ নেল্লোৰ আৰু টুনি অঞ্চলৰ মাজেৰে স্থলভাগত প্ৰৱেশ কৰাৰ সম্ভাৱনা আছে।
স্থলভাগত প্ৰৱেশৰ সময়ত ঘূৰ্ণীবতাহটোৰ বতাহৰ গতিবেগ ঘণ্টাত ১২০ৰ পৰা ১৩০ কিলোমিটাৰ পৰ্যন্ত হ’ব পাৰে। আনহাতে, দমকা বতাহৰ গতিবেগ ঘণ্টাত ১৪৫ কিলোমিটাৰ পৰ্যন্ত বৃদ্ধি পোৱাৰ আশংকা কৰা হৈছে।
এনে পৰিস্থিতিত উপকূলীয় অঞ্চলত গছ-গছনি উভালি পৰা, বিদ্যুৎ সংযোগ ব্যাহত হোৱা, ঘৰ-দুৱাৰৰ ক্ষতি আৰু কৃষিভূমিত ব্যাপক ক্ষয়-ক্ষতিৰ আশংকা কৰা হৈছে। অৱশ্যে ঘূৰ্ণীবতাহটোৰ সঠিক স্থলভাগত প্ৰৱেশৰ স্থান আৰু তীব্ৰতা পৰৱৰ্তী পূৰ্বাভাস অনুসৰি সলনি হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















