শ্ৰীলংকাৰ ক্ৰিকেট জগতত সংঘটিত হৈছে এক চাঞ্চল্যকৰ আৰু দুখজনক ঘটনা। অভিজ্ঞ ক্ৰিকেট প্ৰশিক্ষক সুমিথ ফাৰ্নাণ্ডো (৬২)ৰ এজন যুৱ খেলুৱৈৰ সৈতে হোৱা কাজিয়াৰ পিছতে মৃ*ত্যু হৈছে। কলম্বোৰ এখন ক্ৰিকেট প্ৰশিক্ষণ কেন্দ্ৰত সংঘটিত এই ঘটনাৰ সৈতে জড়িত থকাৰ অভিযোগত আৰক্ষীয়ে ১৭ বছৰীয়া অভিযুক্ত খেলুৱৈজনক গ্ৰেপ্তাৰ কৰিছে।
প্ৰকাশিত তথ্য অনুসৰি, ঘটনাটো ৮ আগষ্টত সংঘটিত হৈছিল। খেলপথাৰত পানী খোৱাৰ বিষয়ক লৈ প্ৰশিক্ষক আৰু যুৱ খেলুৱৈসকলৰ মাজত প্ৰথমে বাক-বিতণ্ডাৰ সৃষ্টি হয়। পৰিস্থিতি ক্ৰমাৎ উত্তপ্ত হৈ এক শাৰীৰিক সংঘাতলৈ ৰূপান্তৰিত হয়। এই সংঘাতৰ সময়তে ফাৰ্নাণ্ডো আঘাতপ্ৰাপ্ত হয়। আঘাত পোৱাৰ পিছত তেওঁক চিকিৎসালয়ত ভৰ্তি কৰোৱা হৈছিল। কেইবাদিনো চিকিৎসাধীন হৈ থকাৰ পিছত ফাৰ্নাণ্ডোৰ মৃত্যু হয়। ঘটনাটোক কেন্দ্ৰ কৰি শ্ৰীলংকান আৰক্ষীয়ে তদন্ত আৰম্ভ কৰাৰ লগতে ১৭ বছৰীয়া এজন খেলুৱৈক গ্ৰেপ্তাৰ কৰিছে। অৱশ্যে ঘটনাটোৰ সম্পূৰ্ণ পৰিস্থিতি আৰু সংঘাতৰ সময়ত প্ৰকৃততে কি ঘটিছিল, সেই বিষয়ে আৰক্ষীৰ তদন্ত অব্যাহত আছে।
সুমিথ ফাৰ্নাণ্ডো শ্ৰীলংকা ক্ৰিকেটৰ এজন অভিজ্ঞ আৰু সন্মানীয় প্ৰশিক্ষক হিচাপে পৰিচিত আছিল। তেওঁ কেৱল প্ৰশিক্ষক হিচাপেই নহয়, যুৱ ক্ৰিকেটাৰসকলৰ মেণ্টৰ হিচাপেও গুৰুত্বপূৰ্ণ ভূমিকা পালন কৰিছিল। শ্ৰীলংকাৰ বৰ্তমানৰ এদিনীয়া দলৰ অধিনায়ক কুশল মেণ্ডিছৰো প্ৰশিক্ষণ দিছিল ফাৰ্নাণ্ডো। পুৰণি এক সাক্ষাৎকাৰতো ফাৰ্নাণ্ডোৱে মেণ্ডিছৰ প্ৰতিভা আৰু নেতৃত্বৰ সম্ভাৱনাৰ কথা উল্লেখ কৰিছিল।
এই ঘটনাই শ্ৰীলংকাৰ ক্ৰিকেটত যুৱ খেলুৱৈ আৰু প্ৰশিক্ষকৰ মাজৰ সম্পৰ্ক, খেলপথাৰত শৃংখলা আৰু সংঘাত নিয়ন্ত্ৰণৰ বিষয়টো পুনৰ চৰ্চালৈ আনিছে। বিশেষকৈ এজন ৬২ বছৰীয়া অভিজ্ঞ প্ৰশিক্ষকৰ মৃ*ত্যু আৰু ঘটনাটোৰ সৈতে এজন নাবালক খেলুৱৈৰ নাম জড়িত হোৱাটোৱে বিষয়টোক অধিক গুৰুতৰ কৰি তুলিছে। আৰক্ষীৰ তদন্তৰ ফলাফল আৰু আদালতত উত্থাপিত তথ্যৰ ওপৰতহে ঘটনাটোৰ সম্পূৰ্ণ দায়-দায়িত্ব আৰু সংঘাতৰ প্ৰকৃত কাৰণ স্পষ্ট হ’ব। বৰ্তমানলৈ প্ৰকাশিত তথ্য অনুসৰি, পানী খোৱাৰ বিষয়ক লৈ আৰম্ভ হোৱা এক বিবাদেই শেষত ভয়ংকৰ ৰূপ লৈ সুমিথ ফাৰ্নাণ্ডোৰ প্ৰাণ কাঢ়ি ল’লে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
