আজিৰে পৰা তিনিদিনীয়াকৈ সোণাপুৰস্থিত জুবিন ক্ষেত্ৰত আৰম্ভ হৈছে ‘জুবিন দিৱস’। প্ৰাণৰ শিল্পী জুবিন গাৰ্গৰ প্ৰথমটো পূণ্যতিথি উপলক্ষে ৰাজ্য চৰকাৰৰ পৃষ্ঠপোষকতাত আয়োজন কৰা হৈছে এই বিশেষ অনুষ্ঠান। লাখ লাখ অনুৰাগী সমবেত হ’বলগীয়া অনুষ্ঠানটোৰ বাবে ইতিমধ্যে জুবিন ক্ষেত্ৰক ন-ৰূপত সজাই-পৰাই সম্পূৰ্ণ কৰা হৈছে। ফুল আৰু নতুন গামোচাৰে সজাই তোলা হৈছে জুবিন গাৰ্গৰ অন্তিম শয়নস্থলী। অনুৰাগীসকলে যাতে কোনো ধৰণৰ অসুবিধাৰ সন্মুখীন নহয়, তাৰ বাবে প্ৰশাসনৰ ফালৰ পৰাও বিভিন্ন ব্যৱস্থা গ্ৰহণ কৰা হৈছে। প্ৰথম দিনা পুৱাৰ ভাগত সৰ্বধৰ্ম প্ৰাৰ্থনাৰে আৰম্ভ হয় অনুষ্ঠানৰ কাৰ্যসূচী। হিন্দু, মুছলিম, শিখকে ধৰি বিভিন্ন ধৰ্মৰ লোকে একেলগে এই প্ৰাৰ্থনাত অংশগ্ৰহণ কৰে। ইয়াৰ পিছত আবেলিলৈ নাম-প্ৰসংগ অনুষ্ঠিত হ’ব। কাইলৈ সাংস্কৃতিক কাৰ্যসূচী আৰু অন্তিম দিনা ভাগৱত পাঠৰ লগতে ভাওনা অনুষ্ঠিত হ’ব।
সৰ্বধৰ্মৰ মিলনস্থলী জুবিন ক্ষেত্ৰ
জুবিন গাৰ্গে যি সাম্য, সম্প্ৰীতি আৰু মানৱতাৰ বাৰ্তা নিজৰ সৃষ্টিৰ মাজেৰে দি গৈছিল, সেই ছবিখনেই যেন আজি প্ৰতিফলিত হৈছে জুবিন ক্ষেত্ৰত। জিকিৰ-জাৰী, কোৰাণ পাঠ, নাম-প্ৰসংগ আদি বিভিন্ন ধৰ্মীয় কাৰ্যসূচীৰে মুখৰিত হৈ পৰিছে সমগ্ৰ পৰিৱেশ। ইছলাম ধৰ্মাৱলম্বী লোকসকলে জিকিৰ পৰিৱেশন আৰু কোৰাণ পাঠ কৰি প্ৰাণৰ শিল্পীগৰাকীৰ প্ৰতি শ্ৰদ্ধা নিবেদন কৰে। একেদৰে বিভিন্ন ধৰ্মৰ লোক একেলগে জুবিন ক্ষেত্ৰত উপস্থিত হৈ শিল্পীগৰাকীৰ স্মৃতি সুঁৱৰিছে।
অনুৰাগীৰ শিল্পৰে অনবদ্য মৰম
জুবিন দাৰ প্ৰতি থকা অনুৰাগ আৰু সন্মানৰ এক ব্যতিক্ৰমী নিদৰ্শন দাঙি ধৰিছে তিনিচুকীয়াৰ জাগুনৰ যুৱ শিল্পী বিকাশ শৰ্মাই। পেলনীয়া প্লাষ্টিকৰ বটল ব্যৱহাৰ কৰি তেওঁ জুবিন গাৰ্গৰ এখন সুবিশাল ছবি প্ৰস্তুত কৰি জুবিন ক্ষেত্ৰলৈ আনে। ক’লা-বগা আৰ্হিৰে প্ৰস্তুত কৰা এই বিশাল ছবিখনে জুবিন ক্ষেত্ৰত উপস্থিত অনুৰাগীসকলৰ বিশেষ দৃষ্টি আকৰ্ষণ কৰে।
জুবিন ক্ষেত্ৰত আন এক বিশেষ আকৰ্ষণ হিচাপে জিলিকি উঠিছে ৪৫০ ফুট দীঘল এখন গামোচা। ‘জুবিন স্মৃতি অম্লান’ নামেৰে এই গামোচাখন ZG আৰ্টিষ্ট ক্লাবৰ উদ্যোগত ৫০গৰাকী শিক্ষাৰ্থীয়ে বৈ উলিয়াইছে। জুবিন গাৰ্গৰ জীৱন আৰু সৃষ্টিৰ সৈতে জড়িত বিভিন্ন স্মৃতি গামোচাখনত প্ৰতিফলিত কৰা হৈছে। সেয়েহে এই গামোচাখন কেৱল এখন বস্ত্ৰ নহয়, বৰং প্ৰাণৰ শিল্পীগৰাকীৰ স্মৃতি সজীৱ কৰি ৰখাৰ এক বিশেষ প্ৰয়াস হিচাপে পৰিগণিত হৈছে।
ZG তিলক লৈ জুবিন ক্ষেত্ৰত গৰিমা বৌ
আজি পুৱাই কপালত চন্দনৰ ZG তিলক লৈ জুবিন ক্ষেত্ৰত উপস্থিত হয় জুবিন গাৰ্গৰ পত্নী গৰিমা শইকীয়া গাৰ্গ। জুবিনৰ সৃষ্টিৰাজীক উদযাপন, চৰ্চা বা পৰিৱেশন কৰিবলৈ বিচৰা সকলোকে জুবিন ক্ষেত্ৰলৈ আহিবলৈ আহ্বান জনায় তেওঁ।
অৱশ্যে, সকলো অনুষ্ঠান শান্তি-শৃংখলা বজাই অনুষ্ঠিত কৰাৰ বাবেও আহ্বান জনায় গৰিমাই। জুবিন দাৰ সৈতে সকলো সময়তে কথা পাতে বুলি আবেগিকভাৱে উল্লেখ কৰি গৰিমাই কয় যে প্ৰতিটো মুহূৰ্ততে তেওঁ জুবিনৰ পৰা পৰামৰ্শ লৈ থাকে। কিন্তু জুবিন ক্ষেত্ৰলৈ গ’লে অনুভৱটো কিছু বেলেগ হয় বুলিও তেওঁ মন্তব্য কৰে।
গুৱাহাটীত চেলিম মাৰ্চেণ্ট
ইফালে, জুবিন দিৱস উপলক্ষে আজি গুৱাহাটীত উপস্থিত হয় বলীউডৰ প্ৰখ্যাত সংগীত শিল্পী চেলিম মাৰ্চেণ্ট। জুবিন গাৰ্গ জীৱিত অৱস্থাত তেওঁক বহুবাৰ অসমলৈ নিমন্ত্ৰণ কৰা বুলি উল্লেখ কৰি আবেগিক হৈ পৰে শিল্পীগৰাকী। জুবিন গাৰ্গৰ সৈতে থকা সম্পৰ্ক আৰু তেওঁৰ স্মৃতি সুঁৱৰি চেলিম মাৰ্চেণ্টে প্ৰাণৰ শিল্পীগৰাকীৰ প্ৰতি শ্ৰদ্ধা নিবেদন কৰে। তিনিদিনীয়া ‘জুবিন দিৱস’ৰ প্ৰতিটো কাৰ্যসূচীত প্ৰাণৰ শিল্পীগৰাকীৰ অগণন অনুৰাগীয়ে অংশগ্ৰহণ কৰাৰ সম্ভাৱনা আছে। জুবিন গাৰ্গৰ সৃষ্টিৰাজী, আদৰ্শ আৰু অসমীয়াৰ প্ৰতি তেওঁৰ গভীৰ ভালপোৱাৰ স্মৃতি সুঁৱৰি এই অনুষ্ঠান শান্তিপূৰ্ণ আৰু সু-শৃংখলিতভাৱে সম্পন্ন কৰিবলৈ সকলোকে আহ্বান জনোৱা হৈছে।
এইখনেই জুবিন গাৰ্গৰ বৰ অসম। এই অসমখন এনেদৰেই থাকক’—এই ভাবনাই যেন জুবিন ক্ষেত্ৰত এক নতুন ৰূপ লাভ কৰিছে। হিন্দু, মুছলমান, শিখ, জৈন, খ্ৰীষ্টানকে ধৰি বিভিন্ন ধৰ্মৰ লোক আজি একেটা স্থানতে সমবেত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
