আচলতে আগন্তুক ছবি এখনতহে সাংবাদিকৰ ভূমিকাত অভিনয় কৰিছে অভিনেত্ৰী পৰিনীতি চোপ্ৰাই। অভিনেত্ৰী পৰিনীতি চোপ্ৰাৰ শেহতীয়া ধাৰাবাহিক ‘শ্বক’ বৰ্তমান নেটফ্লিক্সত চৰ্চাত আছে। এই ধাৰাবাহিকখনৰ সফলতাৰ মাজতে মুক্তি পাইছে পৰিনীতি চোপ্ৰাৰ আগন্তুক থ্ৰিলাৰ ছবি ‘ৰিপ’ৰ্টিং লাইভ’ৰ ট্ৰেইলাৰ। ছবিখনত দেশত দ্ৰুতগতিত বৃদ্ধি পোৱা অবৈধ বালি খনন আৰু ইয়াৰ আঁৰত থকা মাফিয়া নেটৱৰ্কৰ অন্ধকাৰ জগতখন দেখুওৱা হৈছে।
সঁচা ঘটনাৰ আধাৰত নিৰ্মিত বুলি উল্লেখ কৰা এই ছবিখনৰ ২ মিনিট ২ ছেকেণ্ডৰ ট্ৰেইলাৰত এক উত্তেজনাপূৰ্ণ আৰু বিপদসংকুল পৃথিৱীৰ আভাস পোৱা গৈছে। অবৈধ বালি খননৰ ব্যৱসায় কিমান গভীৰলৈ বিয়পি পৰিছে আৰু ইয়াৰ সৈতে জড়িত শক্তিশালী লোকসকলৰ বিৰুদ্ধে মাত মাতিবলৈ কিমান বিপদৰ সন্মুখীন হ’বলগীয়া হয়, সেয়াই ছবিখনৰ মূল বিষয়বস্তু।
ট্ৰেইলাৰৰ আৰম্ভণিতে এটা মাৰাত্মক দুৰ্ঘটনা দেখুওৱা হৈছে। ইয়াৰ পিছতে এগৰাকী অভিলাষী ফিল্ড ৰিপ’ৰ্টাৰ হিচাপে পৰিনীতি চোপ্ৰাৰ চৰিত্ৰটোৱে ঘটনাটোৰ আঁৰৰ সত্য জানিবলৈ চেষ্টা কৰে। তেওঁৰ সৈতে থাকে কেমেৰামেনৰ চৰিত্ৰত অভিনয় কৰা দেৱেন ভোজনীয়ে। দুয়োজনে ঘটনাটোৰ তদন্ত আগবঢ়াই নিয়াৰ লগে লগে ব্যৱস্থাটোৰ ভিতৰত লুকাই থকা বহু অন্ধকাৰ সত্য পোহৰলৈ আহিবলৈ ধৰে। তেওঁলোকে শক্তিশালী লোকসকলক কঠিন প্ৰশ্ন কৰিবলৈ আৰম্ভ কৰে। কিন্তু সত্যৰ ওচৰ চাপি যোৱাৰ লগে লগে তেওঁলোকৰ বাবেও বিপদ বৃদ্ধি পাবলৈ ধৰে।
‘ৰিপ’ৰ্টিং লাইভ’ৰ ট্ৰেইলাৰত দেখুওৱা হৈছে যে এটা প্ৰশ্নৰ উত্তৰ বিচাৰি যাওঁতে কেনেকৈ আন এটা নতুন প্ৰশ্নৰ সৃষ্টি হয়। প্ৰতিটো নতুন সূত্ৰৰ সৈতে কাহিনী অধিক জটিল হৈ পৰে আৰু সাংবাদিক দুগৰাকীৰ ওপৰত বিপদ ক্ৰমাৎ ঘনীভূত হয়। ছবিখনৰ কাহিনী, অনুসন্ধান আৰু থ্ৰিলাৰৰ সংমিশ্ৰণে দৰ্শকৰ মাজত কৌতূহল সৃষ্টি কৰিছে। বিশেষকৈ অবৈধ বালি খননৰ দৰে গুৰুতৰ বিষয়ক কেন্দ্ৰ কৰি নিৰ্মাণ কৰা ছবিখনে সামাজিক বাস্তৱতাৰ এটা অন্ধকাৰ দিশো দৰ্শকৰ সন্মুখলৈ আনিব বুলি আশা কৰা হৈছে।
‘ৰিপ’ৰ্টিং লাইভ’ ধ্ৰুৱ ত্ৰিপাঠীৰ পৰিচালনাত নিৰ্মিত। ছবিখনৰ কাহিনী আৰু চিত্ৰনাট্য মিহিৰ জাধৱ আৰু ধ্ৰুৱ ত্ৰিপাঠীয়ে যৌথভাৱে লিখিছে। পাৰ্থ কিৰণ ঠাকুৰ আৰু জোছুয়া শিৰছাটে ছবিখনৰ প্ৰযোজনা কৰিছে। ছবিখনত পৰিনীতি চোপ্ৰাই মুখ্য চৰিত্ৰত অভিনয় কৰিছে। তেওঁৰ সৈতে কেমেৰামেনৰ চৰিত্ৰত দেখা যাব দেৱেন ভোজনীক। ইয়াৰ উপৰি ছবিখনত আমোল পালেকাৰ, আদিল হুছেইন আৰু শেখৰ সুমনৰ দৰে অভিজ্ঞ অভিনেতায়ো গুৰুত্বপূৰ্ণ চৰিত্ৰত অভিনয় কৰিছে। নেটফ্লিক্সৰ এই আগন্তুক থ্ৰিলাৰ ছবিখনে ট্ৰেইলাৰ মুক্তিৰ পিছতে দৰ্শকৰ মাজত আগ্ৰহ সৃষ্টি কৰিছে। ‘ৰিপ’ৰ্টিং লাইভ’ অহা ৯ অক্টোবৰত মুক্তি পাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
