একেলগে একেটা দলৰ হৈ খেলপথাৰত খেলা দেখা পাব বিৰাট-বাবৰ, ৰোহিত-ৰিজৱানক
চিৰ বৈৰী বুলি নাম থকা ভাৰতৰ ক্ৰিকেট দল আৰু পাকিস্তানৰ ক্ৰিকেট দলৰ খেলুৱৈক এইবাৰ দেখা যাব একেলগে একেখন খেলপথাৰত তাকো একেটা দলৰ হৈ । হয় বিশ্বাস কৰিবলৈ টান হলেও এয়া সত্য, এইবাৰ একেলগে একেটা দলৰ হৈ খেলা দেখা যাব বিৰাট কোহলী, বাবৰ আজম, ৰোহিত শৰ্মা আৰু মহম্মদ ৰিজৱানক।
কাৰণ প্ৰায় দুটা দশকৰ ব্যৱধানৰ অন্তত এছিয়া একাদশ আৰু আফ্ৰিকা একাদশৰ মাজত হোৱাইট বলৰ খেল অনুষ্ঠিত হ’বলগীয়া আফ্ৰিকান এছিয়া কাপ পুনৰ আৰম্ভ কৰাৰ পৰিকল্পনা কৰা হৈছে।
আফ্ৰিকান ক্ৰিকেট এছ’চিয়েশ্যনে বাৰ্ষিক সন্মিলনত প্ৰতিযোগিতাখন পুনৰ আৰম্ভ কৰাৰ বিষয়ে আলোচনা কৰে, য’ত ছয়জনীয়া অন্তৱৰ্তীকালীন সমিতিও গঠন কৰা হয়। এই সমিতিৰ উদ্দেশ্য হৈছে আফ্ৰিকান এছিয়া কাপক শক্তিশালী কৰা আৰু আন্তঃৰাষ্ট্ৰীয় পৰ্যায়ত আফ্ৰিকান খেলুৱৈসকলৰ বাবে অধিক প্ৰতিযোগিতামূলক সুযোগ সৃষ্টি কৰা।
যদিহে এই প্ৰতিযোগিতাখন পুনৰ ঘটে তেন্তে ভাৰতীয় আৰু পাকিস্তানী খেলুৱৈক একেটা দলতে খেলা দেখা যাব। যিসকলে বৰ্তমান কেৱল আই চি চি প্ৰতিযোগিতাত ইজনে সিজনৰ বিৰুদ্ধে খেলে। এয়া দৰ্শকৰ বাবে এক বিশেষ ৰোমাঞ্চকৰ খেল হিচাপে পৰিগণিত হব। কাৰণ বিৰাট কোহলী, বাবৰ আজম, ৰোহিত শৰ্মা, মহম্মদ ৰিজৱানৰ দৰে খেলুৱৈ থাকিব এই দলত।
এচিএৰ অন্তৱৰ্তীকালীন সভাপতি তথা জিম্বাবুৱে ক্ৰিকেটৰ অধ্যক্ষ টাভেংগা মুখলানীয়ে কয় যে আফ্ৰিকান এছিয়া কাপ কেৱল ক্ৰীড়াৰ বাবেই নহয় অৰ্থনৈতিক দৃষ্টিকোণৰ পৰাও গুৰুত্বপূৰ্ণ। দুয়োখন মহাদেশৰ দৰ্শক আৰু খেলুৱৈসকলৰ মাজতো এই খেলক লৈ উৎসাহ দেখা পোৱা গৈছে। যদিও এছিয়ান ক্ৰিকেট কাউন্সিল (এচিচি)ৰ পৰা এতিয়াও এই ইভেণ্ট সন্দৰ্ভত কোনো আনুষ্ঠানিক সঁহাৰি পোৱা নাই, তথাপিও প্ৰতিযোগিতাখন পুনৰ আৰম্ভ কৰাৰ প্ৰবল সম্ভাৱনা আছে।
উল্লেখ্য যে, এই আফ্ৰিকান এছিয়া কাপ এতিয়ালৈকে মাত্ৰ দুবাৰহে খেলা হৈছে, ২০০৫ চনত দক্ষিণ আফ্ৰিকাত আৰু ২০০৭ চনত ভাৰতত। ২০০৫ চনৰ আফ্ৰিকান এছিয়া কাপত তিনিখন মেচৰ এদিনীয়া শৃংখলা অনুষ্ঠিত হৈছিল, য’ত বৰষুণৰ বাবে এখন খেল বাতিল কৰা হৈছিল আৰু বাকী মেচসমূহৰ পিছত শৃংখলা ১-১ ত অমীমাংসীত হৈ ৰৈছিল।
আনহাতে ২০০৭ চনৰ প্ৰতিযোগিতাখনত এছিয়া একাদশে তিনিওখন খেলতে জয়লাভ কৰিছিল। অন্তিমবাৰ ২০০৯ চনত কেনিয়াত এই প্ৰতিযোগিতাখনৰ পৰিকল্পনা কৰা হৈছিল যদিও ইয়াক আয়োজন কৰিব পৰা নগ’ল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
