অসম লাইভ ২৪ঃ বাংলাদেশী যুৱকৰ সৈতে বিয়াত বহিব আলফাৰ প্ৰাক্তন সম্পাদক অনুপ চেতিয়াৰ কন্যা বন্যা। অনুপ চেতিয়াৰ কন্যাই বাংলাদেশৰ যুৱক অনিৰ্বান চৌধুৰীৰে বিবাহপাশত আবদ্ধ হোৱাৰ খবৰ ভাইৰেল হৈ পৰিছে সামাজিক মাধ্যমত। ২৫ নৱেম্বৰত মেলবৰ্ণৰ ইস্কন মন্দিৰত বিয়াত বহিব বন্যা আৰু অনিৰ্বান।
বাংলাদেশৰ যুৱকক কিয় জোঁৱাই হিচাপে আদৰি লৈছে সেই সম্পৰ্কেও মত প্ৰকাশ কৰিছে অনুপ চেতিয়াই। তেওঁ কয়,’বহুবছৰ ধৰি বাংলাদেশত আছিলো। সন্তানকো বাংলাদেশতেই পঢ়া-শুনা কৰোৱাইছো। বন্যাই ঢাকাৰ ধানমন্দিৰ মাষ্টাৰ মাইণ্ড ইণ্টাৰনেশ্ব্যনেল স্কুলত পঢ়াৰ সময়তে দুয়োৰে মাজত চিনাকী হৈছিল। তাৰ পিছতেই দুয়োৰে মাজত এটা সম্পৰ্ক গঢ় লৈ উঠে। এই সম্পৰ্কক সিঁহতে বিবাহৰ বান্ধোনত বান্ধি পেলাব বিচাৰিছে আমি বাধা দিয়াৰ যুক্তিনো ক’ত?’
সুদীৰ্ঘ ২৮ বছৰ বাংলাদেশত বাস কৰা অনুপ চেতিয়াই বাংলাদেশৰ জনতাৰ আতিথ্যক সদায়ে শলাগ লয়। তেওঁ মন্তব্যত এই কথাও উল্লেখ কৰি কয়,’বাংলাদেশৰ জনতাৰ প্ৰতি মোৰ বুকুত সহমৰ্মিতা আছে। সেইখন দেশো মোক ২৮ বছৰে আশ্ৰয় দিছে। সেইখন দেশৰ সন্তানক মোৰ সন্তানে সামৰি ল’ব খুজিলে বাধা দিয়াৰ সাহস মোৰ নাই।’
আনহাতে অনুপ চেতিয়াই বাংলাদেশত থকা কালছোৱাত বেছিভাগ সময় জে’লতেই আছিল। জে’লৰ পৰা ওলাই অহাৰ পিছতো বাংলাদেশতেই আত্মগোপন কৰি আছিল চেতিয়াই। বাংলাদেশত পুনৰ যাবলৈ ইচ্ছা আছেনে সেই সম্পৰ্কেও মত প্ৰকাশ কৰি অনুপ চেতিয়াই বাংলাদেশলৈ যোৱাৰ ইচ্ছা প্ৰকাশ কৰি কয় যে বাংলাদেশলৈ যোৱাৰ ইচ্ছা আছে কিন্তু ভাৰত চৰকাৰ আৰু বাংলাদেশ চৰকাৰ, দুয়োখন চৰকাৰেই বিষয়টো ভালধৰণে গ্ৰহণ নকৰিব। আত্মীয়তাৰ সম্পৰ্ক বান্ধ খোৱাৰ পিছত বাংলাদেশ যাবলৈ ইচ্ছুক অনুপ চেতিয়া।
স্বাধীন অসমৰ লক্ষ্যেৰে আগবঢ়া আলফাৰ প্ৰতিষ্ঠাপক সম্পাদক আছিল অনুপ চেতিয়া ওৰফে গোলাপ বৰুৱা। সংগ্ৰামৰ ভৰপৰ সময়তে ১৯৯৭ চনৰ ২১ ডিচেম্বৰত ঢাকাৰ মহম্মদপুৰৰ পৰা আটক কৰা হৈছিল অনুপ চেতিয়াক। অবৈধভাৱে বাংলাদেশত প্ৰৱেশ কৰা, বিদেশী মুদ্ৰা আৰু এটা চেটেলাইট ফোন ৰখাৰ অপৰাধত ৭ বছৰৰ সশ্ৰম কাৰাদণ্ড দিয়া হয় চেতিয়াক। ২০০৪ চনত শাস্তিৰ ম্যাদ শেষ হ’ল যদিও কাৰাগাৰৰ পৰা মুক্ত কৰি দিয়া নহ’ল চেতিয়াক। ২০১৫ চনৰ ১২ নৱেম্বৰত কাশিমপুৰ কাৰাগাৰৰ পৰা ভাৰতৰ হাতত গতাই দিয়া হ’ল চেতিয়াক। বৰ্তমান চেতিয়া আলোচনাপন্থী আলফা দলটোৰ প্রধান এগৰাকী সদস্য।
উল্লেখ্য যে জীয়াৰীৰ বিবাহৰ বাবে বাংলাদেশৰ জনতাৰ আশীৰ্বাদ বিচৰা চেতিয়াই লগতে কয় যে, ভাৰত চৰকাৰে অচিৰেই আলফাৰে শান্তি চুক্তি স্বাক্ষৰ কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
