ভাৰতত বিনিয়োগ কৰি থাকিব এপলে, পৰিকল্পনাৰ কোনো পৰিৱৰ্তন নাই- ট্ৰাম্পক চিধা উত্তৰ
ট্ৰাম্পে কালি এপল কোম্পানীক নিৰ্দেশ দিছিল য়ে, ভাৰতত এপলৰ কোনো নিৰ্মাণ কাৰখানা নিৰ্মাণ কৰিব নালাগে। সেই কথাৰ এটা দিন পাছতে এতিয়া এপলৰ ফালৰ পৰা আহিছে উত্তৰ। ট্ৰাম্পক চিধা উত্তৰ আইফোন নিৰ্মাণ কোম্পানীটোৰ। ভাৰতত বিনিয়োগ কৰি থাকিব এপলে।
ভাৰত চৰকাৰক আশ্বাস দি আইফোন নিৰ্মাতা কোম্পানী এপলে কয় যে, দেশৰ বাবে বিনিয়োগৰ পৰিকল্পনাত কোনো পৰিৱৰ্তন নহ’ব। চৰকাৰী সূত্ৰৰ উদ্ধৃতিৰে চিএনবিচি টিভি১৮ৰ এক প্ৰতিবেদনত কোৱা হৈছে যে ভাৰতত এপলৰ বিনিয়োগৰ পৰিকল্পনাত কোনো পৰিৱৰ্তন হোৱা নাই আৰু কোম্পানীটোৱে ভাৰত চৰকাৰক প্ৰধান উৎপাদন ভিত্তি হিচাপে ব্যৱহাৰ কৰাৰ প্ৰতিশ্ৰুতিৰ বিষয়ে ভাৰত চৰকাৰক আশ্বাস দিছে।
আনহাতে ট্ৰাম্পৰ কালিৰ মন্তব্যৰ পাছতে ভাৰতৰ ইলেক্ট্ৰনিক ইণ্ডাষ্ট্ৰীজ এছ’চিয়েশ্যন অৱ ইণ্ডিয়াৰ (এলচিনা) মহাসচিব ৰাজো গোৱালে কয় যে, ‘অলপ লেহেমীয়া হ’ব পাৰে, কিন্তু সঁচাকৈয়ে মই নাভাবো যে ইয়াৰ দ্বাৰা ভাৰতত ইমান প্ৰভাৱ পৰিব। গোৱালে ট্ৰাম্পৰ এই মন্তব্যক “কেৱল বক্তব্য” বুলি অভিহিত কৰি আমেৰিকাৰ ৰাষ্ট্ৰপতিয়ে “নিজৰ স্থিতি সলনি কৰিব পাৰে” বুলি আশা প্ৰকাশ কৰে।
উল্লেখ্য যে, ভাৰত এপলৰ বাবে এক গুৰুত্বপূৰ্ণ উৎপাদন ভিত্তিত পৰিণত হৈছে। ২০২৫ চনৰ মাৰ্চ মাহত সমাপ্ত হোৱা বিত্তীয় বৰ্ষত কোম্পানীটোৱে দেশত প্ৰায় ২২ বিলিয়ন ডলাৰৰ আইফোন উৎপাদন কৰিছিল, যিটো পূৰ্বৰ বছৰৰ তুলনাত ৬০% বৃদ্ধি। বৰ্তমান বিশ্বৰ প্ৰতি পাঁচটা আইফোনৰ ভিতৰত এটা আইফোন ভাৰতত নিৰ্মাণ কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
