ফুটবল বিশ্বকাপৰ ইতিহাসত কেতিয়াবা কেৱল জয়ী দলেই নহয়, পৰাজিত দলেও নিজৰ সাহস, আত্মবিশ্বাস আৰু অদম্য যুঁজৰ বাবে কোটি কোটি ফুটবল অনুৰাগীৰ হৃদয় জিনিবলৈ সক্ষম হয়। আজি ঠিক তেনেকুৱা যুঁজ এখনেই উপভোগৰ সৌভাগ্য অৰ্জন কৰিলে আমেৰিকাৰ মিয়ামি গ্ৰীন ষ্টেডিয়ামত উপস্থিত হোৱা হাজাৰ হাজাৰ দৰ্শকে। মিয়ামি ষ্টেডিয়ামৰ আসন সংখ্যাতকৈও বহুগুণে কম জনসংখ্যা কেপ ভাৰ্ডেৰ জনসংখ্যা। মাত্ৰ প্ৰায় ৫ লাখ জনসংখ্যাৰ এখন দেশে প্ৰথমবাৰৰ বাবে বিশ্বকাপত অংশগ্ৰহণ কৰিয়েই বিশ্ব চেম্পিয়ন আৰ্জেণ্টিনাৰ বিৰুদ্ধে দেখুওৱা সাহসিকতা নিঃসন্দেহে বিশ্ব ফুটবলৰ অন্যতম অনুপ্ৰেৰণাদায়ক কাহিনীত পৰিণত হোৱাৰ যোগ্য। ফুটবলৰ জীৱন্ত কিংবদন্তি লিঅ’নেল মেছিৰ আৰ্জেণ্টিনাক শেষ মুহূৰ্তলৈকে চাপত ৰখা কেপ ভাৰ্ডেৰ যুঁজে প্ৰমাণ কৰিলে যে ফুটবলত নাম-যশ বা শক্তিয়েই সকলো নহয়, অদম্য মনোবল আৰু যুঁজাৰু স্পৃহাও সমানে গুৰুত্বপূৰ্ণ।
লিঅ’নেল মেছিৰ ইতিহাস
মিয়ামি গ্ৰীন ষ্টেডিয়ামৰ সেউজ ঘাঁহনিত শিশু দেশখনৰ বিৰুদ্ধে হোৱা এই ৰোমাঞ্চকৰ মুখামুখিত আৰ্জেণ্টিনাই ৩–২ গ’লৰ ব্যৱধানত জয় লাভ কৰে। মেচখনৰ ২৯ মিনিটতে লিঅ’নেল মেছিয়ে কৰা গ’লটোৰ পিছতে বিশ্বকাপ ইতিহাসত এক নজিৰ স্থাপন কৰিবলৈ সক্ষম হয় ফুটবলৰ যাদুকৰজনে।
ফুটবল বিশ্বকাপত ৩০খন মেচ খেলা ইতিহাসৰ প্ৰথমজন খেলুৱৈত পৰিণত হোৱাৰ উপৰিও বিশ্বকাপত ২০টা গ’ল কৰাও প্ৰথমজন ফুটবলাৰ হিচাপে মেছিয়ে নিজৰ নাম সোণালী আখৰেৰে লিখিবলৈ সক্ষম হৈছে। ইয়াৰ উপৰিও একেৰাহে ৮খন বিশ্বকাপ মেচত গ’ল কৰা প্ৰথম খেলুৱৈ,বিশ্বকাপত ১৪খন ভিন্ন দেশৰ বিৰুদ্ধে গ’ল কৰা প্ৰথম খেলুৱৈৰ উপৰিও বিশ্বকাপত ৯টা এছিষ্ট সম্পূৰ্ণ কৰা প্ৰথমজন খেলুৱৈত পৰিণত হৈছে মেছি। বিশ্বকাপত সৰ্বাধিক গ’ল কৰা খেলুৱৈসকলৰ তালিকাত মেছি শীৰ্ষস্থান অধিকাৰ কৰাৰ বিপৰীতে এই তালিকাত ১৮টা গ’লেৰে দ্বিতীয় স্থানত আছে ফ্ৰান্সৰ কিলিয়ান এমবাপে আৰু ১৬টা গ’লেৰে তৃতীয় স্থানত আছে জাৰ্মানীৰ মিৰ’শ্লাভ ক্ল’জ।
বীৰৰ দৰে বিদায় কেপ ভাৰ্ডেৰ
মাত্ৰ ৫ লাখ জনসংখ্যাৰ এখন দেশ কেপ ভাৰ্ডেই সীমিত সম্পদ আৰু সুযোগ লাভ কৰিও বিশ্বকাপত খেলিবলৈ সুযোগ গ্ৰহণ কৰাটোৱেই ডাঙৰ কথা। কিন্তু কেপ ভাৰ্ডেই যেন কেৱল বিশ্বকাপত অংশগ্ৰহণ কৰিবলৈয়ে অহা নাছিল, আহিছিল ফুটবল বিশ্বৰ অগণন অনুৰাগীৰ হৃদয়ত স্থান লাভ কৰিবলৈ। প্ৰথমবাৰ বিশ্বকাপত অংশগ্ৰহণ কৰিয়েই ‘নৱজাতক’ কেপ ভাৰ্ডেই ‘প্ৰাপ্তবয়স্ক’ আৰ্জেণ্টিনাক যি প্ৰত্যাহ্বান জনালে সেয়া বহু দিনলৈ মনত ৰাখিব ফুটবল বিশ্বই। বিশ্ব চেম্পিয়ন আৰ্জেণ্টিনাক ১২০ মিনিটলৈকে অত্যন্ত চাপত ৰখা কেপ ভাৰ্ডেৰ খেলুৱৈসকলে যি সাহস, আত্মবিশ্বাস আৰু যুঁজাৰু মানসিকতাৰ পৰিচয় দিলে সেয়াও বিশ্ব ফুটবলৰ ইতিহাসত বহুদিনলৈ সজীৱ হৈ থাকিব।
মেচখনৰ ২৯ মিনিটত ৰেকৰ্ড সৃষ্টি কৰা গ’লটোৰে আৰ্জেণ্টিনাই অগ্ৰগতি লাভ কৰিলেও ৫৯ মিনিটত ডেৰয় দুৱাৰ্টেৰ গ’লটোৰে সমতা স্থাপন কৰিবলৈ সক্ষম হয় কেপ ভাৰ্ডেই। নিৰ্ধাৰিত সময়লৈ ১-১ গ’লত সমতা স্থাপন কৰা মেচখনৰ অতিৰিক্ত সময়ৰ ৯২ মিনিটত মাৰ্টিনাজে আৰ্জেণ্টিনাৰ হৈ দ্বিতীয়টো গ’লেৰে অগ্ৰগতি লাভ কৰিলেও ১০৩ মিনিটত ছিডনে ল’পেজ কাব্ৰালে কেপ ভাৰ্ডেৰ হৈ দ্বিতীয়টো গ’ল স্ক’ৰ কৰি পুনৰ আৰ্জেণ্টিনাক চাপলৈ আনে। অৱশ্যে মেচখনৰ ১১১ মিনিটত আৰ্জেণ্টিনাৰ হৈ ডিনেই নিৰ্ণায়কসূচক গ’লটো স্ক’ৰ কৰি Round of 16ৰ টিকট নিশ্চিত কৰে। যদিও আৰ্জেণ্টিনাৰ বিৰুদ্ধে মেচখনত ৩-২ গ’লৰ ব্যৱধানত শিশু দেশখনে পৰাজয় বৰণ কৰিলে তথাপিও এয়াও যেন তেওঁলোকৰ আছিল এক নৈতিক জয়। শক্তিশালী আৰ্জেণ্টিনাৰ বিৰুদ্ধে পৰাস্ত হলেও ‘নৱজাতক’ কেপ ভাৰ্ডেই প্ৰথমবাৰ ফুটবল বিশ্বকাপত ভুমুকি মাৰিয়েই বীৰৰ দৰে প্ৰস্থান কৰিলে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
