ইন্টাৰনেশ্যনেল ক্ৰিকেটৰ পৰা সন্যাস ৰবিচন্দ্ৰন অশ্বিনৰ, গাবা টেষ্টৰ পাছতে ঘোষণা
ইন্টাৰনেশ্যনেল ক্ৰিকেটৰ পৰা সন্যাস ঘোষণা ভাৰতীয় ক্ৰিকেট দলৰ স্পীনাৰ ৰবিচন্দ্ৰন অশ্বিনৰ। অষ্ট্ৰেলিয়াত চলি থকা টেষ্ট মেছৰ তৃতীয়খন খেল গাবা টেষ্টৰ পাছতে ঘোষণা এই অৱসৰৰ।
ভাৰতীয় ক্ৰিকেট দলৰ তাৰকা স্পিনাৰ ৰবিচন্দ্ৰন অশ্বিনে আজি ১৮ ডিচেম্বৰ বুধবাৰে আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা ঘোষণা কৰিছে।
২০১০ চনৰ ১২ জুনত হাৰাৰেত জিম্বাবুৱেৰ বিৰুদ্ধে ভাৰতৰ হৈ টি-২০ত অভিষেক ঘটা অশ্বিনে মুঠ ৬৫খন মেচত খেলিছিল য’ত তেওঁ ৭২টা উইকেট দখল কৰিছিল।
আনহাতে ২০১১ চনৰ ৬ নৱেম্বৰত দিল্লীত ৱেষ্ট ইণ্ডিজৰ বিৰুদ্ধে ভাৰতৰ হৈ টেষ্ট খেলত অভিষেক ঘটোৱাৰ পাছৰে পৰা অশ্বিনে মুঠ ১০৬খন মেচ খেলিছে আৰু ৫৩৭ আউট দখল কৰিছে। ভাৰতৰ হৈ পাঁচ দিনীয়া টেষ্ট ফৰ্মেটত অশ্বিনতকৈ অধিক আউট দখল কৰা খেলুৱৈ কেৱল এগৰাকী, সেয়া হৈছে অনিল কুম্বলে (৬১৯)৷
২০১১ চনত এম এছ ধোনিৰ নেতৃত্বত পুৰুষৰ ৫০ অভাৰৰ এদিনীয়া বিশ্বকাপ বিজয়ী ভাৰতীয় দলৰো সদস্য আছিল অশ্বিন।
ভাৰতৰ হৈ ৪১ খন বিশ্ব টেষ্ট চেম্পিয়নশ্বিপ (WTC) মেচ খেলা অশ্বিনে তেওঁৰ নামত ১৯৫ টা উইকেট লাভ কৰিছে। টেষ্ট ক্ৰিকেটত সুন্দৰ প্ৰদৰ্শনৰ উপৰিও অশ্বিনে ভাৰতৰ হৈ ১১৬ খন এদিনীয়া আৰু ৬৫ খন টি-২০ খেল খেলি ক্ৰমে ১৫৬ আৰু ৭২ টা আউট দখল কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
