৯ এপ্ৰিলত ৰাজ্যত বিধানসভা নিৰ্বাচন৷ আজি অৰ্থাৎ ২৩ মাৰ্চ নমিনেছন দাখিলৰ শেষ দিন৷ শেষ দিনটোতেই স্পষ্ট হৈ পৰিছে বহু নেতাৰ মন৷ প্ৰতিটো ৰাজনৈতিক দলে নিজৰ নিজৰ প্ৰাৰ্থী প্ৰক্ষেপ কৰিছে ৰাজ্যৰ বিভিন্ন বিধানসভা সমষ্টিত৷ প্ৰাৰ্থী তালিকা ঘোষণাৰ পাছতেই প্ৰত্যেকটো দলতেই লাগিছে আওল৷ কি কংগ্ৰেছ, কি বিজেপি, কি অগপ, কি এজেপি! প্ৰায় সকলো দলতেই আৰম্ভ হৈছে কন্দল৷ বিগত সময়ত নিষ্ঠাৰে নিজ নিজ দলৰ হৈ কাম কৰি থকা বহু নিষ্ঠাবান কৰ্মীয়েই ত্যাগ কৰিছে ইমান দিনে কাম কৰি থকা দল৷ নিজৰ দলৰ আদৰ্শ প্ৰচাৰ কৰি কৰি সমষ্টিৰ উন্নয়ন অথৱা নিজৰ উন্নয়ন হয়তো আশা কৰি আছিল দল বাগৰা বহুজন নেতাই৷ কিন্তু মন থাকিলেও দলে নিদিলে৷ বিধায়ক হোৱা নোহোৱাৰ সিদ্ধান্ত ৰাইজৰ হাতত কিন্তু দলেই ৰাইজৰ সেৱা কৰাৰ বাবে যোগ্য বুলি নাভাৱিলে বহু নেতাক৷ সেয়ে ক্ষোভ উজাৰি বহুজনেই ত্যাগ কৰিছে নিজা নিজা দল৷
ৰাজনীতিত এই ধৰণৰ ঘটনা ঘটিয়েই থাকে যদিও এইবাৰৰ নিৰ্বাচন অলপ বেলেগ বুলি বহু ৰাজনীতিৰ সৈতে যুক্ত ব্যক্তিয়েই মন্তব্য ৰাখিছে৷ বহুতেই কৈছে অসমৰ ৰাইজে এইবাৰ কি কৰে ঠিক নাই৷ বহুতেই কৈছে অসমত এন ডি এৰ বিকল্প নাই৷ কিন্তু তাৰমাজতে আমি জনাব বিচাৰিছো নিৰ্বাচনৰ প্ৰাকক্ষণত টিকট বঞ্চিত হৈ কোন দলৰ কোন হেভিৱেট নেতাই দল সলনি কৰি হঠাতে সলালে দলীয় আদৰ্শ৷
টিকট বঞ্চিত হৈ সৰ্বাধিক চৰ্চা হোৱা নেতা হৈছে প্ৰদ্যুৎ বৰদলৈ৷ এন ডি এ দলীয় টিকট ঘোষণা কৰাৰ মাত্ৰ এদিন পূৰ্বে তেওঁ কংগ্ৰেছ দল ত্যাগ কৰি বিজেপি দলত আনুষ্ঠানিকভাৱে যোগদান কৰে৷ যোগদানৰ এটা নিশাৰ পাছতেই তেওঁ এন ডি এ জোঁটৰ বিজেপি দলৰ হৈ দিছপুৰ সমষ্টিৰ পৰা দলীয় টিকটো লাভ কৰিছে৷ উল্লেখ কৰা প্ৰয়োজন যে প্ৰদ্যুৎ বৰদলৈয়ে মাত্ৰ ১৬ বছৰ বয়সৰ পৰাই কংগ্ৰেছ কৰি আহিছিল৷ প্ৰদ্যুৎ বৰদলৈয়ে টিকট লাভ কৰাৰ পাছতেই সৰ্বাধিক ছচিয়েল মিডিয়াত ভাইৰেল হোৱা আন এজন নেতা হৈছে জয়ন্ত দাস৷ জয়ন্ত দাসে বিগত ৩৫ বছৰে বিজেপি দলৰ হৈ কাম কৰি আহিছিল৷ তেওঁ দিছপুৰ সমষ্টিৰ পৰা বিজেপিৰ দলীয় টিকটৰ দাবীদাৰ আছিল কিন্তু প্ৰদ্যুৎ বৰদলৈক দিছপুৰ সমষ্টিত টিকট দিয়াৰ পাছতেই ক্ষোভত ফাঁটি জয়ন্ত দাসে ত্যাগ কৰিছে বিজেপি দল৷ তেওঁ নিজাকৈ তৃণমূল বিজেপি বুলি এটা দল খোলাৰ কথাও ঘোষণা কৰিছে৷ অৱশ্যে এইবাৰৰ বিধানসভা নিৰ্বাচনত তেওঁ নিৰ্দলীয় হিচাপেই নিৰ্বাচন খেলিব দিছপুৰৰ পৰা৷
তাৰপিছতেই চৰ্চাত আছে নন্দিতা গাৰ্লোছা৷ নন্দিতা গাৰ্লোছাইয়ো হাফলং সমষ্টিৰ পৰা ২০২১ চনৰ নিৰ্বাচনত বিজেপি দলৰ সৈতে প্ৰতিদ্বন্দ্বিতা কৰি বিজয়ীও হৈছিল৷ তাৰপিছতেই বিজেপিৰ মন্ত্ৰীসভাত স্থানো লাভ কৰে তেওঁ৷ হিমন্ত বিশ্ব শৰ্মাৰ নেতৃত্বত থকা মন্ত্ৰীসভাত ক্ৰীড়া আৰু সংখ্যালঘূ পৰিক্ৰমা মন্ত্ৰী আছিল নন্দিতা গাৰ্লোছা৷ নন্দিতা গাৰ্লোছাই ২০২৬ৰ নিৰ্বাচনত এন ডি এ মিত্ৰজোঁটৰ পৰা টিকট লাভ নকৰিলে৷ সেয়ে নন্দিতাই অৱশেষত দলত্যাগ কৰি কংগ্ৰেছ দলত যোগদান কৰিছে৷ কংগ্ৰেছত যোগদান কৰি তেওঁ হাফলং সমষ্টিৰ পৰা কংগ্ৰেছৰ প্ৰাৰ্থী হৈ ২৩ মাৰ্চত মনোনয়ন পত্ৰও দাখিল কৰে৷
চৰ্চাত থকা আন এজন নেতা হৈছে জয়ন্ত খাউণ্ড৷ জয়ন্ত খাউণ্ডে অগপ দলত দীৰ্ঘদিন ধৰি এজন কৰ্মকৰ্তা তথা এজন কোষাধ্যক্ষ হিচাপে কাম কৰি আহিছিল৷ এইবাৰ জয়ন্ত খাউণ্ডেও হঠাতে দল সলনি কৰিছে৷ নিৰ্বাচনত প্ৰাৰ্থী তালিকা ঘোষণাৰ পূৰ্বেই দলত্যাগ কৰি কংগ্ৰেছত যোগদান কৰিছে জয়ন্ত খাউণ্ডে৷ জয়ন্ত খাউণ্ডে এইবাৰ কংগ্ৰেছ দলৰ হৈ ৰঙানদী সমষ্টিত নিৰ্বাচনী প্ৰতিদ্বন্দ্বিতা আগবঢ়াইছে৷
টিকট নাপায় দল সলনি কৰা আৰু এজন নেতা হৈছে শ্বেৰমান আলী৷ বাঘবৰ সমষ্টিৰ প্ৰাক্তন বিধায়ক শ্বেৰমান আলিয়ে কংগ্ৰেছৰ পৰা নিলম্বিত হৈছিল৷ তাৰপিছতেই যোগদান কৰিছিল ৰাইজৰ দলত৷ ৰাইজৰ দলেও নিজৰ দলৰ পৰা প্ৰাৰ্থিত্ব দিয়াৰ আশা দি নিৰাশ কৰে শ্বেৰমানক৷ শেষত শ্বেৰমানে ৰাইজৰ দল ত্যাগ কৰি যোগদান কৰিছে তৃণমূল কংগ্রেছত৷ ২০২৬ৰ বিধানসভা নিৰ্বাচনত শ্বেৰমানে তৃণমূল কংগ্ৰেছৰ হৈ মন্দিয়া সমষ্টিৰ পৰা প্ৰতিদ্বন্দ্বিতা কৰিছে৷
টিকট নাপায় দল এৰা আৰু এজন নেতা হৈছে শশীকান্ত দাস৷ ২০২১ৰ বিধানসভা নিৰ্বাচনত কংগ্ৰেছ দলৰ পৰা বিধায়ক হৈছিল শশীকান্ত৷ সেই শশীকান্তই এইবাৰ কংগ্ৰেছ দলৰ পৰা টিকট লাভ নকৰিলে৷ সেয়ে ৰাইজৰ জনপ্ৰতিনিধি হৈ থকাৰ আশা বুকুত বান্ধি বিজেপি দলত যোগদান কৰি বিজেপিৰ টিকট লাভ কৰিছে৷ ৰহাত বিজেপি দলৰ হৈ নিৰ্বাচনত প্ৰতিদ্বন্দ্বিতা আগবঢ়াইছে শশীকান্তই৷
টিকট বঞ্চিত আৰু এজন জনপ্ৰিয় নেতা হৈছে তিতাবৰৰ ভাস্কৰ বৰুৱা৷ ভাস্কৰ বৰুৱাইয়ো বিগত নিৰ্বাচনত কংগ্ৰেছৰ বিধায়ক হৈ বিধানসভালৈ আহিছিল৷ সেই ভাস্কৰ বৰুৱাই এইবাৰ তিতাবৰত টিকট লাভ নকৰিলে৷ সেয়ে মনৰ দুখত কংগ্ৰেছ দল ত্যাগ কৰিছে ভাস্কৰ বৰুৱাই৷ দলত্যাগতেই শান্ত নাথাকি নিৰ্দলীয়ভাৱে নিৰ্বাচন খেলিবলৈ সাজু হৈছে ভাস্কৰ বৰুৱা৷
মনৰ দুখত কংগ্ৰেছ ত্যাগ কৰা আন এজন নেতা হৈছে ভূপেন বৰা৷ অসম প্ৰদেশ কংগ্ৰেছৰ প্ৰাক্তন সভাপতি ভূপেন বৰাই কিছুদিন পূৰ্বে বিজেপি দলত যোগদান কৰিছে৷ বিজেপি দলে তেওঁক বিহপূৰীয়া সমষ্টিৰ পৰা টিকটো প্ৰদান কৰিছে৷ পূৰ্বৰ বিহপূৰীয়া সমষ্টিৰ বিধায়ক অমিয় কুমাৰ ভূঁঞাক টিকট প্ৰদান নকৰি ন’কৈ বিজেপি দললৈ অহা ভূপেন বৰাক টিকট প্ৰদান কৰিছে বিজেপি দলে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
