‘অসমৰ চৰকাৰী হাস্পতালত, অসম চৰকাৰৰ অধীনত কাম নকৰো৷’ এগৰাকী চিকিৎসকে কি লিখিছে সামাজিক মাধ্যমত?

চাকৰিৰ প্ৰতি মোহভংগ চৰকাৰি চিকিৎসকৰ! পোহৰলৈ আহিছে ৰাজ্যৰ স্বাস্থ্য খণ্ডৰ বিস্ফোৰক তথ্য৷ অসমৰ ৪০ গৰাকী চৰকাৰী চিকিৎসকে কৰিলে পদত্যাগ৷ GMCHৰ ১৬ গৰাকী চিকিৎসকৰ পদত্যাগৰ লগতে JMCHৰ ১৩ গৰাকী চিকিৎসকৰ পদত্যাগ৷ পদত্যাগ কৰিলে AMCH ৰো ১১ গৰাকী চিকিৎসকে৷
পদত্যাগৰ তালিকাত আছে আন কেইবাখনো চিকিৎসা মহাবিদ্যালয়ৰ চিকিৎসক৷ হঠাৎ চিকিৎসকৰ এই পদত্যাগৰ পাছতে ৰাজ্যজুৰি ব্যাপক চৰ্চা
ৰাজ্যৰ স্বাস্থ্য খণ্ডৰ বিস্ফোৰক তথ্য পোহৰলৈ আনিছে কেইবাগৰাকী চিকিৎসকে৷ দীগন্ত বুঢ়াগোঁহাই নামৰ এগৰাকী চিকিৎসকে সামাজিক মাধ্যমত লিখিছে,

‘মেডিকেল কলেজৰ Resignation সন্দৰ্ভত

দুবছৰ আগলৈকে মই গুৱাহাটী চিকিৎসা মহাবিদ্যালয়ত আছিলোঁ । ছাত্ৰ হিচাপে, PG হিচাপে, ঠিকাভিত্তিক পঞ্জীয়ক হিচাপে । যোৱা দুবছৰৰপৰা NEIGRIHMS(Central Institute)-ত আছোঁ – DM trainee হিচাপে। GMCH ত থাকোঁতে ঘনাই খঙ উঠিছিল- সহকৰ্মীৰ ওপৰত, ৰোগীৰ অভিভাৱকৰ ওপৰত, subordinatesৰ ওপৰত । ওলাই আহোঁতেই পণ লৈছিলোঁ যে অসম চৰকাৰৰ চাকৰিত কাম নকৰোঁ ।
আগতে দিনৌ যিমান কাম কৰিছিলোঁ, এতিয়াও কৰোঁ । কিন্তু, আজিকালি দুবছৰ আগৰ দৰে খং নুঠে ।
কাৰণবোৰ ভাবিছোঁ:

১) Doctor: Patient অনুপাতৰ লগতে Doctor: Paramedics আৰু Paramedics:Patient অনুপাত সমানেই গুৰুত্বপূৰ্ণ। অসমৰ চৰকাৰী হাস্পতালত Paramedics(নাৰ্চকে ধৰি)ৰ সংখ্যা প্ৰয়োজনৰ তুলনাত দহভাগৰ এভাগো নহয় । ডাক্তৰৰ সংখ্যা মোটামুটি ঠিক । অৰ্থাৎ নেতাৰ সংখ্যা ঠিক । কিন্তু, কৰ্মী তেনেই কম ।
NEIGRIHMS’ত এই আটাইবোৰ অনুপাত অন্ততঃ ১০ গুণ বেছি ভাল । গতিকে, কামবোৰ সময়ত আৰু নিয়াৰিকৈ হয়।

২) Report, Test আদিৰ কাৰণে অসমৰ চৰকাৰী হাস্পতালত ৰোগীৰ অভিভাৱকে line ধৰিব লাগে । সময়ত sample জমা দিয়া আৰু report অনা অভিভাৱকৰ কাম ।
NEIGRIHMSত কেৱল বিল জমা কৰাটোহে অভিভাৱকৰ কাম । Sample জমা‌ কৰা, report অনাৰ বাবে কৰ্মচাৰী পৃথক । গতিকে, পৰীক্ষা সময়ত হয় আৰু report সময়ত আহে।

৩) NEIGRIHMS- ত ‘System’ৰ কাৰণে কোনোৱে কাম নকৰে । ৰোগী, চিকিৎসক আৰু কৰ্মচাৰীৰ বাবে NEIGRIHMSৰ System-টোৱে কাম কৰে । জবাবদিহিৰ লগতে System- এ Encouragement’ও যথেষ্ট দিয়ে । গতিকে, আটায়ে নিজকে Valued অনুভৱ কৰে ।
সেইবোৰ আমাৰ চৰকাৰী হাস্পতালত নাই ।

৪) ৰাজনৈতিক হস্তক্ষেপ, VIP culture, সঘনাই transfer অসমৰ চৰকাৰী হাস্পতালত সাধাৰণ কথা ।
NEIGRIHMS’ত সেইবোৰ ব্যতিক্ৰম ।

৫) DM trainee হিচাপে আজিৰ দিনটোত মোৰ Stipend অসমৰ চৰকাৰী হাস্পতালৰ Assistant Professorৰ দৰমহাতকৈ বেছি ।
টকাই সকলো নহʼলেও টকাও জৰুৰী । মোৰ দৰে ১৫ বছৰ চিকিৎসা বিজ্ঞানৰ আনুষ্ঠানিক শিক্ষা গ্ৰহণ কৰা ব্যক্তি এজনে সন্মানজনক উপাৰ্জনৰ সন্ধান কৰিবই ।

(কাৰণ আৰু অনেক আছে । পাছত লিখিম । কিন্তু, এটা কথা ঠিক যে, নিজৰ জীৱনৰ প্ৰশান্তিৰ স্বাৰ্থত অসম চৰকাৰৰ অধীনস্থ চৰকাৰী হাস্পতালত কাম নকৰোঁ- যি প্ৰশান্তি অবিহনে মই ডিগ্ৰী আৰু জ্ঞান থাকিও ডাক্তৰ হʼব নোৱাৰোঁ।)’

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ