সাহিত্য সভাৰ সভাপতি পদৰ পৰা নাম প্ৰত্যাহাৰ ভীমকান্ত বৰুৱা আৰু অনুৰাধা শৰ্মা পূজাৰীৰ
আজি ১৪ নৱেম্বৰ বৃহস্পতিবাৰ অসম সাহিত্য সভাৰ সভাপতি পদৰ বাবে সন্মতি প্ৰদানৰ অন্তিম দিন আছিল। এই সভাপতি পদৰ বাবে মনোনীত কৰা হৈছিল ৫ গৰাকী বিশিষ্ট লোক। পাছে তাৰেই মাজৰ দুগৰাকী লোকে সভাপতি পদৰ পৰা নাম প্ৰত্যাহাৰ কৰে।
বিশিষ্ট ভাষাবিদ ভীমকান্ত বৰুৱা আৰু বিশিষ্ট সাহিত্যিক অনুৰাধা শৰ্মা পূজাৰীয়ে আজি অসম সাহিত্য সভাৰ সভাপতি পদৰ বাবে সন্মতি প্ৰদান নকৰাৰ লগতে নিজৰ নাম প্ৰত্যাহাৰ কৰে।
মুঠ ৫ গৰাকী সাহিত্যৰ সৈতে জড়িত বিশিষ্ঠ লোকৰ নাম মনোনীত কৰা হৈছিল। এই ৫ গৰাকী লোক ক্ৰমে – ভাষাবিদ ভীমকান্ত বৰুৱা, ড০ বসন্ত কুমাৰ গোস্বামী, ড০ গোবিন্দ প্ৰসাদ শৰ্মা , ড০ উপেন ৰাভা হাকাচাম আৰু অনুৰাধা শৰ্মা পূজাৰী।
এই পৰ্য্যন্ত তিনি গৰাকী মনোনীত প্ৰাৰ্থীৰ সন্মতি প্ৰকাশ। সন্মতি প্ৰকাশ কৰা তিনি প্ৰাৰ্থী বসন্ত কুমাৰ গোস্বামী, গোবিন্দ প্ৰসাদ শৰ্মা অৰু উপেন ৰাভা হাকাচাম।
প্ৰধান সম্পাদক উপেন্দ্ৰজিৎ শৰ্মালৈ এখন পত্ৰ লিখি অনুৰাধা শৰ্মা পূজাৰীয়ে নিজৰ নাম প্ৰত্যাহাৰ কৰি কয়- অসম সাহিত্য সভাৰ ২০২৫-২৭ বৰ্ষৰ সভাপতি পদৰ বাবে প্ৰস্তুত কৰা ৫জনীয়া তালিকাত মোৰ নাম প্ৰস্তাৱ কৰাৰ বাবে আন্তৰিক ধন্যবাদ আৰু কৃতজ্ঞতা প্ৰকাশ কৰিছো। কিন্তু মই মোৰ নাম উক্ত তালিকাখনৰ পৰা প্ৰত্যাহাৰ কৰিবলৈ অনুৰোধ জনালো।
উল্লেখ্য যে, কাইলৈ ১৫ নৱেম্বৰ শুকুৰবাৰে প্ৰতিখন জিলালৈ ভোটদানৰ বাবে প্ৰেৰণ কৰা হ’ব বেলট পেপাৰ। জিলা সমিটি সমূহৰ পৰা শাখা সমিটি সমূহলৈ প্ৰেৰণ কৰা হ’ব বেলট।
প্ৰতিখন শাখাৰ এক তৃতীযাংশ সদস্যৰ সমৰ্থন ক্ৰমে ভোটদান প্ৰদান কৰিব। ২১ নবেম্বৰৰ পৰা আৰম্ভ হ’ব ভোটদান প্ৰক্ৰিয়া । ৪ ডিচেম্বৰত অন্ত পৰিব ভোটদান পৰ্ব।
৫ ডিচেম্বৰত নিৰ্বাচনী বিষয়াৰ উপস্থিতি বেলট বাকচ সমূহ চীল কৰা হ’ব মেঘদূত ভৱনত। ডিচেম্বৰৰ অন্তিম সপ্তাহত অনুষ্ঠিত হ’ব লগা কাৰ্য্যনিৰ্বাহকতে ভোট গনণা সম্পন্ন হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
