অসম বিধানসভা নিৰ্বাচনৰ পূৰ্বে দেওবাৰে কেন্দ্ৰীয় গৃহমন্ত্ৰী অমিত শ্বাহে কৰে বৃহৎ ঘোষণা। নলবাৰীত ৰাজহুৱা সভাত ভাষণ দি অমিত শ্বাহে কয় যে আগন্তুক দিনত বিজেপি চৰকাৰে অসমত ইউনিফৰ্ম চিভিল কোড (ইউচিচি) প্ৰৱৰ্তন কৰি চাৰিটা বিবাহ নিষিদ্ধ কৰিব। ভোট-বেংক ৰাজনীতিৰ বাবে কংগ্ৰেছ দলে ৰাজ্যৰ জনগাঁথনি সলনি কৰাৰ অভিযোগ উত্থাপন কৰে। আগন্তুক পাঁচ বছৰৰ ভিতৰত বিজেপি চৰকাৰে দেশৰ পৰা “প্ৰতিজন অনুপ্ৰৱেশকাৰী” চিনাক্ত কৰি বহিষ্কাৰ কৰিব বুলিও মন্তব্য কৰে।
শ্বাহে কয় , “ভোটৰ লোভত কংগ্ৰেছ দলে অসমৰ সমগ্ৰ জনগাঁথনি সলনি কৰি দিছে। ধুবুৰী আৰু ইয়াৰ আশে-পাশে থকা নখন জিলা এতিয়া অনুপ্ৰৱেশকাৰীৰে ভৰি পৰিছে।”
তেওঁ আৰু অভিযোগ কৰে যে পূৰ্বৰ কংগ্ৰেছ চৰকাৰসমূহে দশক দশক ধৰি অবৈধ অনুপ্ৰৱেশৰ অনুমতি দিছিল। শ্বাহে কয়, ‘কংগ্ৰেছ চৰকাৰে বছৰ বছৰ ধৰি অসমৰ ভিতৰত অনুপ্ৰৱেশকাৰীৰ বাবে দুৱাৰ মুকলি কৰি ৰাখিছিল। আমাৰ মুখ্যমন্ত্ৰী হিমন্ত বিশ্ব শৰ্মাই সীমান্ত বন্ধ কৰি অনুপ্ৰৱেশকাৰীয়ে দখল কৰা ১.২৫ লাখ একৰ মাটি উভতাই লৈছে।”
কেন্দ্ৰীয় মন্ত্ৰীগৰাকীয়ে অনুপ্ৰৱেশৰ বিৰুদ্ধে এক শক্তিশালী ৰোডমেপৰ ৰূপৰেখা দাঙি ধৰে। তেওঁ কয়, “আজি মই নলবাৰীলৈ আহিছো ক’বলৈ: তৃতীয়বাৰৰ বাবে ‘পদুম’ৰ চৰকাৰ গঠন কৰক। অহা পাঁচ বছৰত আমি প্ৰতিজন অনুপ্ৰৱেশকাৰীক চিনাক্ত কৰি দেশৰ পৰা বহিষ্কাৰ কৰিম।”
বিজেপিৰ এই স্থিতি পুনৰবাৰ উল্লেখ কৰি শ্বাহে কয় যে, আমি প্ৰতিজন অনুপ্ৰৱেশকাৰীক বিচাৰি উলিয়াম, তেওঁলোকক বিচাৰি পাম, ভোটাৰ তালিকাৰ পৰা আঁতৰাই তেওঁলোক য’ৰ পৰা আহিছে তালৈ ঘূৰাই পঠিয়াই দিম।
তেওঁ কয়, “১০ বছৰৰ ভিতৰত… আমি বড়ো শান্তি চুক্তি, কাৰ্বি আংলং চুক্তি, ডি এন এল এ চুক্তি, আৰু আলফাৰ সৈতে চুক্তি স্বাক্ষৰ কৰিলোঁ। আজি ১০ হাজাৰ লোকে অস্ত্ৰ-শস্ত্ৰ এৰিছে।” এই কথাটো তেওঁ কংগ্ৰেছৰ শাসনকালত হোৱা অশান্তিৰ ইতিহাসৰ সৈতে তুলনা কৰে।
অসমত ৯ এপ্ৰিলত ১২৬ খন বিধানসভাৰ আটাইকেইখন আসনৰ বাবে একক পৰ্যায়ত ভোটদানৰ প্ৰস্তুতি চলিছে। ভাৰতীয় নিৰ্বাচন আয়োগৰ তথ্য অনুসৰি অহা ৪ মে’ত ভোটগণনা হ’ব। অসমত এই প্ৰতিদ্বন্দ্বিতা হ’ব বৰ্তমানৰ বিজেপি নেতৃত্বাধীন এন ডি এ চৰকাৰ আৰু কংগ্ৰেছৰ মাজত। মুখ্যমন্ত্ৰী হিমন্ত বিশ্ব শৰ্মাৰ নেতৃত্বত বিজেপি চৰকাৰ পুনৰ ক্ষমতালৈ আহিব। এই নিৰ্বানচৰ পাছতেই অসমত বলবৎ হ’ব UCC। হিন্দু, মুছলিম সকলোৰে বিবাহ বিচ্ছেদৰ নিয়ম হ’ব একে। চৰকাৰে অসমত ইউনিফৰ্ম চিভিল কোড প্ৰৱৰ্তন কৰি চাৰিখন বিবাহ নিষিদ্ধ কৰিব, লগতে শ্বাহে ৰাজ্যৰ পৰা অনুপ্ৰৱেশকাৰীক বহিষ্কাৰ আৰু বিতাড়নৰ প্ৰতিশ্ৰুতিও দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
