অকলেই এখন বিশাল নৈ পৰিষ্কাৰ কৰি দেশজুৰি চৰ্চাত এইজন যুৱক

বহুতে সমস্যাৰ বাবে চৰকাৰী ব্যৱস্থাক দোষ দিয়ে। কিন্তু কিছুমান মানুহে সমস্যাৰ সমাধানৰ বাবে নিজেই আগবাঢ়ি আহে। মধ্যপ্ৰদেশৰ ৰাজগড় জিলাৰ বিয়াওৰাৰ ২০ বছৰীয়া যুৱক বিট্টু তবাহী তেনে এজন ব্যতিক্ৰমী যুৱক। নিজৰ একক প্ৰচেষ্টাৰে তেওঁ আজনাৰ নামৰ নদীখন চাফা কৰি এক নতুন ৰূপ দিলে। পৰিবেশ সংৰক্ষণৰ ক্ষেত্ৰত বিট্টুৰ এই প্ৰচেষ্টা এতিয়া বহু লোকৰ বাবে অনুপ্ৰেৰণাৰ বিষয় হৈ পৰিছে।

এসময়ত জীৱনদায়িনী আছিল আজনাৰ নদী

ৰাজগড় জিলাৰ আন্দলহেৰা গাঁৱৰ পৰা উৎপত্তি হোৱা আজনাৰ নদীখন এসময়ত অঞ্চলটোৰ অন্যতম গুৰুত্বপূৰ্ণ জলধাৰা আছিল। স্থানীয় লোকসকলে এই নদীৰ পানী খোৱা আৰু কৃষিকাৰ্যত ব্যৱহাৰ কৰিছিল। কিন্তু সময়ৰ লগে লগে জনসংখ্যা বৃদ্ধি, প্লাষ্টিকৰ ব্যৱহাৰ আৰু মানুহৰ অৱহেলাৰ ফলত নদীখনৰ অৱস্থা অতি শোচনীয় হৈ পৰে। নদীৰ বুকু প্লাষ্টিক, জলজ অপতৃণ আৰু বিভিন্ন ধৰণৰ আৱৰ্জনাৰে ভৰি পৰিছিল। পানীৰ পৰা দুৰ্গন্ধ ওলাইছিল আৰু জলজ জীৱ-জন্তুৰ বাবেও পৰিৱেশ অনুপযোগী হৈ পৰিছিল। এসময়ৰ পৰিষ্কাৰ নদীখন ক্ৰমাৎ এখন লেতেৰা নলাৰ দৰে হৈ পৰিছিল।

২৬ জানুৱাৰীৰ পৰা আৰম্ভ প্ৰচেষ্টা

২০২৬ চনৰ ২৬ জানুৱাৰী, গণৰাজ্য দিৱসৰ দিনটোতে বিট্টু তবাহীয়ে এটা বিশেষ সংকল্প গ্ৰহণ কৰে। তেওঁৰ লক্ষ্য আছিল—আজনাৰ নদীখনক পুনৰ পৰিষ্কাৰ কৰি আগৰ অৱস্থালৈ ঘূৰাই অনা। প্ৰথমে কেইজনমান বন্ধুৱেও তেওঁৰ সৈতে এই কামত যোগ দিছিল। কিন্তু নদী চাফা কৰাৰ কাম অতি কঠিন আৰু কষ্টকৰ হোৱাৰ বাবে লাহে লাহে বন্ধুসকলে আঁতৰি যায়। বন্ধুসকল আঁতৰি যোৱাৰ পিছতো বিট্টুৱে হাৰ নামানিলে। তেওঁ অকলে নদীখন পৰিষ্কাৰ কৰাৰ দায়িত্ব ল’লে। প্ৰতিদিনে পুৱা ঘৰৰ পৰা ওলাই বিট্টু পোনে পোনে নদীৰ পাৰলৈ গৈছিল। খালী হাতেৰে নদীৰ পৰা প্লাষ্টিক, আৱৰ্জনা আৰু অন্যান্য পেলনীয়া সামগ্ৰী আঁতৰাইছিল। ঘণ্টাৰ পিছত ঘণ্টা ধৰি তেওঁ এই কাম কৰিছিল। চাফাইৰ বাবে কোনো ডাঙৰ চৰকাৰী যন্ত্ৰপাতি বা বিশেষ সহায় নথকাৰ পিছতো তেওঁ নিজৰ প্ৰচেষ্টা অব্যাহত ৰাখিছিল। কামৰ মাজতে কেইবাবাৰো অসুস্থ হৈ পৰিছিল যদিও তেওঁ পিছহুঁহকি নাহিল। নদীখনৰ গভীৰ অংশত জমা হৈ থকা গধুৰ আৱৰ্জনা আঁতৰাবলৈ তেওঁ নিজৰ পকেটৰ পৰাই ধন খৰচ কৰি জেচিবি মেচিনৰ সহায় লৈছিল।

অৱশেষত প্ৰায় তিনিমাহ ধৰি চলোৱা কঠোৰ পৰিশ্ৰমৰ ফলত আজনাৰ নদীৰ ৰূপ সলনি হ’বলৈ ধৰে। যিখন নদী এসময়ত আৱৰ্জনা আৰু দুৰ্গন্ধৰে ভৰি আছিল, সেই নদীখনতে পুনৰ পৰিষ্কাৰ পানী বৈ যাবলৈ আৰম্ভ কৰে। বিট্টুৱে নদীখন চাফা কৰাৰ আগৰ আৰু পিছৰ ছবি ছ’চিয়েল মিডিয়াত প্ৰকাশ কৰে। ছবিসমূহ অতি কম সময়ৰ ভিতৰতে ভাইৰেল হৈ পৰে। তেওঁৰ এই অনন্য প্ৰচেষ্টাই দেশজুৰি চৰ্চা লাভ কৰে।

আনন্দ মহিন্দ্ৰাৰো প্ৰশংসা

বিট্টুৰ কামৰ কথা ছ’চিয়েল মিডিয়াত ভাইৰেল হোৱাৰ পিছত প্ৰখ্যাত উদ্যোগপতি আনন্দ মহিন্দ্ৰায়ো তেওঁৰ প্ৰচেষ্টাক প্ৰশংসা কৰে। মহিন্দ্ৰাই বিট্টুৰ কাহিনী ছ’চিয়েল মিডিয়াত শ্বেয়াৰ কৰি কয় যে ছ’চিয়েল মিডিয়াক ইতিবাচক কামৰ বাবে কেনেদৰে ব্যৱহাৰ কৰিব পাৰি, বিট্টুৰ উদাহৰণ তাৰ এক সুন্দৰ নিদৰ্শন। সমাজ আৰু পৰিৱেশৰ বাবে কাম কৰা এনে যুৱক-যুৱতীক উৎসাহিত কৰা উচিত বুলিও তেওঁ মত প্ৰকাশ কৰে।

বিট্টু তবাহী নামেৰে পৰিচিত বিট্টু সিং ৰঘুবংশীয়ে কেৱল নিজৰ সময় আৰু শ্ৰমেই নদীখনৰ বাবে ব্যয় কৰা নাছিল। নদীখন পৰিষ্কাৰ কৰিবলৈ তেওঁ নিজৰ ধনো খৰচ কৰিছিল। গভীৰ অংশত জমা হৈ থকা গধুৰ আৱৰ্জনা আৰু ধ্বংসাৱশেষ আঁতৰাবলৈ জেচিবি ব্যৱহাৰ কৰাৰ খৰচো তেওঁ নিজেই বহন কৰিছিল। বিট্টুৰ এই প্ৰচেষ্টাই এটা গুৰুত্বপূৰ্ণ বাৰ্তা দিছে—পৰিৱেশ ৰক্ষাৰ দায়িত্ব কেৱল চৰকাৰৰ নহয়, সাধাৰণ নাগৰিকেও নিজৰ সামৰ্থ্য অনুসৰি আগবাঢ়ি আহিলে ডাঙৰ পৰিৱৰ্তন সম্ভৱ।

আজনাৰ নদীৰ কেইটামান গুৰুত্বপূৰ্ণ তথ্য

আজনাৰ নদীৰ উৎপত্তিস্থল ৰাজগড় জিলাৰ আন্দলহেৰা অঞ্চলত। এসময়ত নদীখনৰ পানী খোৱা আৰু জলসিঞ্চনৰ বাবে ব্যৱহাৰ কৰা হৈছিল। নদীখন ৰক্ষাৰ বাবে স্থানীয় লোকসকলেও প্ৰচেষ্টা চলাই আহিছে। প্ৰদূষণ আৰু আৱৰ্জনাৰ ফলত নদীখনৰ প্ৰাকৃতিক পৰিৱেশ যথেষ্ট ক্ষতিগ্ৰস্ত হৈছিল। বিট্টু তবাহীৰ একক প্ৰচেষ্টাই নদীখন পুনৰ পৰিষ্কাৰ কৰাৰ ক্ষেত্ৰত নতুন আশা সৃষ্টি কৰিছে।

বিট্টুৰ কাহিনী কেৱল এজন যুৱকৰ নদী পৰিস্কাৰ কৰাৰ কাহিনী নহয়। ই দেখুৱাইছে যে পৰিৱৰ্তনৰ বাবে সদায় ডাঙৰ দল, বৃহৎ বাজেট বা চৰকাৰী ব্যৱস্থাৰ অপেক্ষা কৰিব নালাগে। এজন মানুহে আন্তৰিকতাৰে আৰম্ভ কৰা সৰু এটা পদক্ষেপেও এদিন বৃহৎ পৰিৱৰ্তনৰ ৰূপ ল’ব পাৰে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ