অসম লাইভ ২৪ঃ বুষ্টাৰ ড’জ৷ দেশৰ সাম্প্ৰতিক কোভিড পৰিস্থিতিৰ পৰিপ্ৰেক্ষিতত বুষ্টাৰ ড’জৰ গ্ৰহণযোগ্যতা অতি জৰুৰী৷ কোভিডৰ তৃতীয় ঢৌৰ আশংকাৰ মাজতে আজিৰে পৰা দেশত আৰম্ভ হয় বুষ্টাৰ ড’জৰ টীকাকৰণ৷ প্ৰথম পৰ্যায়ত ফ্ৰণ্টলাইন ৱৰ্কাৰচ, স্বাস্থ্য কৰ্মী আৰু ৬০ৰ ঊৰ্ধৰ ব্যক্তিক প্ৰদান কৰা হ’ব কোভিডৰ তৃতীয় ড’জ ভেকচিন বুষ্টাৰ ড’জ৷ কিন্তু বুষ্টাৰ ড’জ ভেকচিনেচনৰ ক্ষেত্ৰত উদয় হৈছে বিভিন্ন প্ৰশ্নৰ৷ প্ৰকৃততে কোনসকল ব্যক্তিয়ে গ্ৰহণ কৰিব পাৰিব বুষ্টাৰ ড’জ৷ দ্বিতীয় পালি ভেকচিন গ্ৰহণ কৰাৰ কিমান দিনৰ পাছত গ্ৰহণ কৰিব পাৰি বুষ্টাৰ ড’জ ভেকচিন৷ এইসন্দৰ্ভত জানক সবিশেষ তথ্য—
কোনবিধ ভেকচিন প্ৰদান কৰা হ’ব?
ভেকচিন গ্ৰহণ কৰা ব্যক্তিয়ে প্ৰথম আৰু দ্বিতীয় পালি যি ভেকচিন গ্ৰহণ কৰিছে সেই অনুযায়ী কোভাক্সিন বা কোভিশ্বিল্ডৰ বুষ্টাৰ ড’জ প্ৰদান কৰিব চৰকাৰে৷
পুনৰ নাম পঞ্জীয়ন কৰিব লাগিব নেকি?
কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি প্ৰথমে দুয়োপালি ভেকচিন গ্ৰহণ কৰা ব্যক্তিয়ে পুনৰ নামপঞ্জীয়ন কৰিব নালাগে বুষ্টাৰ ড’জৰ বাবে৷ কিন্তু Cowin প’ৰ্টেলৰ জৰিয়তে নামভৰ্তি কৰিব লাগিব ব্যক্তিয়ে বা ভেকচিনেচন চেণ্টাৰত গৈ পোনপটীয়াকৈ গ্ৰহণ কৰিব পাৰিব তৃতীয় পালি ভেকচিন৷
বুষ্টাৰ ড’জ গ্ৰহণৰ সময়সীমা কি?
দ্বিতীয় পালি ভেকচিন গ্ৰহণ কৰাৰ ৯ মাহৰ পাছত গ্ৰহণ কৰিব পাৰিব বুষ্টাৰ ড’জ৷ ৯ মাহ সম্পূৰ্ণ হোৱাৰ পাছতহে বুষ্টাৰ ড’জ বাবে আৱেদন কৰিব পাৰিব ব্যক্তিয়ে৷
ভেকচিনেচনৰ বাবে কি তথ্য জমা দিব লাগিব?
স্বাস্থ্য মন্ত্ৰালয়ে সদৰী কৰা অনুসৰি, ভোটাৰ আইডি, পেন কাৰ্ড, আধাৰ কাৰ্ড, ড্ৰাইভিং লাইচেন্স আদি পৰিচয় পত্ৰ জমা দিব লাগিব বুষ্টাৰ ড’জ গ্ৰহণ কৰিব বিচৰা ব্যক্তিয়ে৷
উল্লেখ্য, প্ৰথম পৰ্যায়ত কেৱল ফ্ৰণ্টলাইন ৱৰ্কাৰচ, স্বাস্থ্য কৰ্মী আৰু ৬০ৰ ঊৰ্ধৰ ব্যক্তিক প্ৰদান কৰা হ’ব কোভিডৰ তৃতীয় ড’জ ভেকচিন৷ কোভিড ভেকচিন গ্ৰহণ কৰা ১০০ শতাংশ ব্যক্তিক বুষ্টাৰ ড’জ প্ৰদানৰ পৰিকল্পনা গ্ৰহণ কৰিছে চৰকাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
