বিতৰ্কৰ মাজতেই মুখ খুলিছে মেৰিকমে৷ ইয়াৰ পূৰ্বে তেওঁৰ এজনে আনজনক বিভিন্ন ধৰণে দোষাৰোপ কৰি আছিল৷ প্ৰাক্তন স্বামী কাৰুণ অনলেৰক বেকাৰ বুলি কৈছিল মেৰিকমে৷ সেই মন্তব্যক বহুতেই ভালকৈ লোৱা নাছিল৷ এইবাৰ সেয়ে ভিডিঅ’ বাৰ্তাযোগে ক্ষমা বিচাৰিছে ৬বাৰৰ বিশ্বচেম্পিয়ন বক্সাৰ মেৰিকমে৷ ভিডিঅ’বাৰ্তাত তেওঁ জনাইছে যে তেওঁ কাকো আঘাত দিব খোৱা নাছিল৷
ইনষ্টাগ্ৰামত এক ভিডিঅ’বাৰ্তাত মেৰিয়ে কয়, ‘কাকো আঘাত কৰা, সমাজত ভাঙোন ধৰাৰ বাবে বা নেতিবাচক বাৰ্তা দিয়াৰ কোনো উদ্দেশ্য নাছিল৷ কাকো আঘাত দিব খোজা নাছিলো৷ আৰম্ভণিৰে পৰাই আমাৰ বিবাহিত জীৱনত সমস্যা আছিল বুলিব নোৱাৰি৷ প্ৰথমে সকলো ঠিকেই আছিল৷ কিন্তু ধীৰে ধীৰে সমস্যা বাঢ়িল৷ ফলত আমি এজনে আনজনক জীৱনৰ পৰা বিদায় দিয়াৰ সিদ্ধান্ত লৈছো৷
প্ৰাক্তন স্বামীয়ে কোনো ৰোজগাৰ নকৰে, গলিয়ে গলিয়ে ফুটবল খেলি ফুৰা বুলি অভিযোগ কৰিছিল মেৰিয়ে৷ সেই বিষয়টো ফুটবলপ্ৰেমীয়েও ভাল ভাৱে লোৱা নাই৷ সেই বিষয়েও ছাফাই দিছে মেৰিকমে৷ মেৰিকমে জনাইছে যে ফুটবল, যুৱ সম্প্ৰদায় বা ক্ৰীড়াবিদৰ বিৰুদ্ধে তেওঁৰ কোনো অভিযোগ নাই৷ মেৰিকমে এই বিষয়ত কৈছে, ‘মোৰ কথা ভুল বাখ্যা কৰা হৈছে৷ বহু এনে ব্যক্তি আছে যিয়ে জীৱনত বহু যুঁজ কৰি উঠি আহিছে৷ সাফল্য লাভ কৰিছে৷ ফুটবলত সুনীল ছেত্ৰী, বাইছুং ভুটিয়াৰ দৰে তাৰকাই দেশক কিমান সন্মান আনি দিছে৷ যদি মোৰ কথাত কোনোৱে আঘাত পাইছে তেন্তে মই ক্ষমা বিচাৰিছো৷’
১৮ বছৰৰ বিবাহিত জীৱন কটোৱাৰ পাছত ২০২৩ চনৰ ডিচেম্বৰত বিবাহ বিচ্ছেদ হয় মেৰিকম আৰু অনলেৰৰ৷ বিগত মাহত এক সাক্ষাৎকাৰত প্ৰাক্তন স্বামীক বেকাৰ বুলি আখ্যা দি চৰ্চালৈ আহে এই খবৰ৷ মেৰিকমে কৈছিল, ‘সফল কেৰিয়াৰ দূৰৈৰ কথা, অনলৰয়ে গলিয়ে গলিয়ে ফুটবল খেলি ফুৰে৷ কোনোদিনো এটকাও উপাৰ্জন কৰি পোৱা নাই৷ কোনো ত্যাগ, অবদান নাই৷ দিনেনিশাই কেৱল টোপনি মাৰি থাকে৷ মই বহু টকা উপাৰ্জন কৰিছো৷ বিশ্বাস কৰি তেওঁৰ হাতত সকলোবোৰ তুলি দিছিলো৷ সংসাৰৰ আৰ্থিক বিষয়বোৰত মই মূৰ ঘমোৱা নাছিলো৷ তেতিয়ালৈকে সকলো ঠিকেই আছিল৷ কিন্তু যেতিয়াই মই বিষয়বোৰত চকু দিলো তেতিয়া বুজিলো ভিতৰত কি চলি আছে৷ চাৰিওফালে বহু ধাৰ৷ মোৰ সম্পত্তি বন্ধকত দি ধাৰ কৰিছে৷ সেই ধাৰ শোধো কৰিব পৰা নাই৷ ফলত আমাৰ সকলো সম্পত্তি বাজেয়াপ্ত হৈ গৈছে৷’
মেৰিকমে ৰাষ্ট্ৰীয় সংবাদমাধ্যমত এই মন্তব্য ৰখাৰ পাছতেই মেৰিকমৰ বিৰুদ্ধে পৰকীয়া প্ৰেমৰ অভিযোগ আনিছে মেৰিকমৰ স্বামীয়ে৷ মেৰিকমৰ স্বামীয়ে এই সন্দৰ্ভত কৈছিল, ‘সন্তানৰ মুখলৈ চাই আইনী যুঁজ কৰা নাই৷ কিন্তু সম্পত্তি হস্তগত কৰা বিষয়টো মই নামানো৷ ২০১৩ চনৰ পৰা এগৰাকী জুনিয়ৰ বক্সাৰৰ সৈতে পৰকীয়াত সোমাইছে মেৰিকম৷ সেই বিষয়ক লৈ মোৰ সৈতে তুমুল যুঁজো চলিছে৷ তাতেই শেষ নহয়, মেৰিৰ দ্বিতীয় পৰকীয়াৰ কথা জনাই অনলৰে কৈছে, ‘২০১৭ চনৰ পৰা নিজৰ বক্সিং একাডেমিত নিযুক্ত এগৰাকী কৰ্মীৰ সৈতেও সম্পৰ্ক আছিল৷ তেওঁলোকৰ হোৱাটছএপ চাটৰ প্ৰমাণ আছে৷ কিন্তু মই চুপ আছো৷ তেওঁৰ বিৰুদ্ধে কোনো অভিযোগ থাকিলে প্ৰমাণ দেখুৱাবলৈকো দাবী কৰিছিল অনলৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
