অসম লাইভ২৪ঃ প্ৰৱল তুষাৰপাতৰ বাবে স্থগিত ৰখা হৈছে চাৰিধাম যাত্ৰা৷ কেদাৰনাথ আৰু বদ্ৰীনাথত প্ৰবল তুষাৰপাত হৈছে৷ তীৰ্থযাত্ৰীসকলে যাতে কোনো বিপদত নপৰে তাৰবাবে চাৰিধাম যাত্ৰা স্থগিত ৰাখিছে উত্তৰাখণ্ডৰ প্ৰশাসনে৷ শনিবাৰে নিশাৰে পৰাই কেদাৰনাথ আৰু বদ্ৰীনাথত বৃদ্ধি পাইছে তুষাৰপাত৷ সেয়ে শ্ৰীনগৰত আৰক্ষীয়ে আধাবাটতেই ৰখাই দিছে প্ৰতিজন তীৰ্থযাত্ৰীক৷ আৰক্ষীয়ে তীৰ্থযাত্ৰীসকলক নিৰাপদ স্থানত থাকিবলৈ পৰামৰ্শ দিছে৷ ইপিনে তুষাৰপাতেই নহয়, বৰষুণৰ বাবে অধিক ভয়াৱহ হৈ পৰিছে যাত্ৰাপথো৷
শ্ৰীনগৰ আৰক্ষীয়ে জনোৱা অনুসৰি চাৰিধাম যাত্ৰাৰ তীৰ্থযাত্ৰীসকলক উত্তৰাখণ্ডৰ এন আই টি আৰু বদ্ৰীনাথ বাছ আস্থানতেই ৰখাই দিয়া হৈছে৷ যিসকলে অনলাইন বুকিং কৰিছে তেওঁলোকক ৰুদ্ৰপ্ৰয়াগলৈকে যোৱাৰ অনুমতি দিয়া হৈছে৷
উল্লেখ্য যে কেদাৰনাথত বিগত ১২ দিন ধৰি তুষাৰপাত হৈ আছে৷ সেয়ে কোনো ধৰণৰ যাতে অঘটন নহয় তাৰবাবেই আগতীয়া সতৰ্কতা অৱলম্বন কৰি উত্তৰাখণ্ড চৰকাৰে বন্ধ কৰিছে কেদাৰনাথ যাত্ৰা৷ ২৫ এপ্ৰিলত কেদাৰনাথৰ দুৱাৰ মুকলি কৰা হৈছিল৷ ইপিনে বদ্ৰীনাথৰ দুৱাৰ মুকলি কৰা হৈছিল ২৭ এপ্ৰিলত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
