সাধাৰণতে পিঠি খজুৱাই দিলে কোনোবাই টকা ল’ব বুলি ভাবিবই নোৱাৰি। কিন্তু চীনৰ এজন ৩২ বছৰীয়া যুৱকে মানুহৰ গা–পিঠি খজুৱাই দিয়াকেই এক অভিনৱ ব্যৱসায়লৈ ৰূপান্তৰ কৰি এতিয়া মাহে লাখ লাখ টকা উপাৰ্জন কৰিছে। তেওঁৰ এই অদ্ভুত ব্যৱসায় ইতিমধ্যে চীনৰ ছ’চিয়েল মিডিয়াতো যথেষ্ট চৰ্চা লাভ কৰিছে। এই অভিনৱ ব্যৱসায়ৰ উদ্যোক্তাগৰাকী হৈছে ঝাং শ্বিয়াওকিয়াও। তেওঁৰ বয়স ৩২ বছৰ আৰু চীনৰ শ্বেনঝেন চহৰত তেওঁ এই ব্যৱসায় আৰম্ভ কৰিছে। ‘Suma’ নামৰ ব্ৰেণ্ডৰ অধীনত তেওঁ ‘itch-scratching’ অৰ্থাৎ মানুহৰ শৰীৰৰ খজুৱতি বা পিঠি খজুৱাই দিয়াৰ বিশেষ সেৱা আগবঢ়াইছে। তেওঁ প্ৰথমখন দোকান শ্বেনঝেনৰ বাওৱান জিলাত চলিত বৰ্ষৰ মে’ৰ আৰম্ভণিতে মুকলি কৰে। ইয়াৰ প্ৰায় এমাহৰ পাছতে ফুটিয়ানত দ্বিতীয়খন দোকানো আৰম্ভ কৰে।
এই সেৱাৰ বাবে গ্ৰাহকে প্ৰতি ঘণ্টাত প্ৰায় ৩০০ ইউয়ান দিব লাগে। ভাৰতীয় মুদ্ৰাত এই পৰিমাণ প্ৰায় ৪,২০০ টকা। গ্ৰাহকক বিছনাৰ দৰে বিশেষ স্থানত শুৱাই দি প্ৰশিক্ষিত কৰ্মীয়ে শৰীৰৰ নিৰ্দিষ্ট অংশ লাহে লাহে খজুৱাই দিয়ে। ইয়াৰ বাবে বিশেষভাৱে তৈয়াৰ কৰা দীঘল আৰু জোঙা নখৰ দৰে সঁজুলিও ব্যৱহাৰ কৰা হয়। এই সেৱাৰ উদ্দেশ্য কেৱল খজুৱতি দূৰ কৰা নহয়। উদ্যোক্তাগৰাকীৰ মতে, ইয়াৰ জৰিয়তে গ্ৰাহকে মানসিক চাপ কমোৱা, শৰীৰ-মন শিথিল কৰা আৰু ভালদৰে টোপনি যোৱাত সহায় পোৱা বুলি অনুভৱ কৰে।
দুখন দোকান মিলি বৰ্তমান প্ৰতি মাহত প্ৰায় ১ লাখ ইউয়ান, অৰ্থাৎ প্ৰায় ১৪ লাখ টকাৰ মুঠ ব্যৱসায়িক আয় কৰাৰ কথা ঝাঙে প্ৰকাশ কৰিছে। গুৰুত্বপূৰ্ণ কথাটো হ’ল—এই ১৪ লাখ টকা তেওঁৰ ব্যক্তিগত লাভ নহয়; ই হৈছে দোকান দুখনৰ মুঠ ব্যৱসায়িক আয়। তেওঁ দাবী কৰা মতে, ব্যৱসায়টোৱে ইতিমধ্যে break-even point পাৰ কৰি লাভ কৰিবলৈ আৰম্ভ কৰিছে।
আনহাতে, চীনৰ Cover News-ক দিয়া সাক্ষাৎকাৰত ঝাঙে ইয়াতকৈ অধিক আয়ৰ দাবী কৰিছে। তেওঁৰ মতে, আগতে প্ৰকাশিত ১ লাখ ইউয়ানৰ হিচাপটো যথেষ্ট কমকৈ কোৱা হৈছিল আৰু আগষ্টত এখন দোকানৰ মাহিলী turnover প্ৰায় ১৩ লাখ ইউয়ানৰ ওপৰত আছিল; আনখন দোকানে কোনো কোনো মাহত ১৫–১৭ লাখ ইউয়ান পৰ্যন্ত turnover কৰিছিল বুলি তেওঁ কয়। অৱশ্যে এই অধিক আয়ৰ পৰিসংখ্যা উদ্যোক্তাগৰাকীৰ নিজা দাবী।
ঝাঙৰ জীৱনো আৰম্ভণিৰ পৰা সফল নাছিল। কলেজ শেষ কৰাৰ পাছৰ প্ৰথম বছৰত তেওঁ ৭টা চাকৰি সলনি কৰিছিল। এই সকলোবোৰ চাকৰি মূলতঃ sales-সম্পৰ্কীয় আছিল। পাছত তেওঁ নিজাকৈ ব্যৱসায় কৰাৰ সিদ্ধান্ত লয়। ২০২৫ চনত তেওঁ ছ’চিয়েল মিডিয়াত বিভিন্ন বিষয় লৈ কাম কৰাৰ চেষ্টা কৰিছিল। এদিন তেওঁ ছ’চিয়েল মিডিয়াত এগৰাকী মহিলাই স্বামীক পিঠি খজুৱাই দিয়াৰ এটা ভিডিঅ’ দেখা পায়। ভিডিঅ’টোত যথেষ্ট engagement দেখি তেওঁৰ মনত নতুন ব্যৱসায়ৰ চিন্তা আহে। ইয়াৰ পাছত তেওঁ পোনপটীয়াকৈ দোকান খোলাৰ পৰিৱৰ্তে প্ৰায় ৪ মাহ ASMR-ধৰণৰ খজুৱাই দিয়াৰ ভিডিঅ’ বনাই বজাৰখন পৰীক্ষা কৰে। তেওঁ ১,০০০ৰো অধিক লোকৰ পৰা surveyৰ জৰিয়তে জানিবলৈ চেষ্টা কৰে—মানুহে শৰীৰৰ কোন অংশ খজুৱাবলৈ ভাল পায়, কিমান দাম দিবলৈ ৰাজী আৰু কেনেধৰণৰ পৰিৱেশ বিচাৰে। সেই তথ্যৰ ওপৰত ভিত্তি কৰিয়েই সেৱাৰ মূল্য আৰু পেকেজ নিৰ্ধাৰণ কৰা হয়।
চীনত এনে ব্যৱসায়ৰ পূৰ্বৰ উদাহৰণ নথকাৰ বাবে ঝাঙে কোনো বিশেষ গুৰুৰ পৰা এই কৌশল শিকা নাছিল। তেওঁ নিজেই বিভিন্ন তথ্য অধ্যয়ন কৰি শৰীৰৰ কোনবোৰ অংশত খজুৱালে অধিক আৰাম অনুভৱ হয়, সেই বিষয়ে পৰীক্ষা-নিৰীক্ষা কৰে। তেওঁ শৰীৰক ৫টা ডাঙৰ খজুৱতিৰ অঞ্চল আৰু ৩০টাৰো অধিক সৰু অঞ্চলত ভাগ কৰি সেৱাৰ এক বিশেষ শৈলী তৈয়াৰ কৰে। এই পদ্ধতি উন্নত কৰিবলৈ প্ৰায় ৪ মাহ ধৰি বন্ধু আৰু followers-ৰ ওপৰত পৰীক্ষা চলাই feedback লৈছিল।
Cover Newsৰ প্ৰতিবেদন অনুসৰি, তেওঁৰ বিপণিত কেইবাটাও package আছে। উদাহৰণস্বৰূপে—
৩০ মিনিট: মূৰ আৰু পিঠি খজুৱাই দিয়া।
৬০ মিনিট: মূৰ, পিঠি, কান্ধ-ডিঙি, মুখ, হাত আৰু কাষলতি আদি অংশ সামৰি সেৱা।
৮০ মিনিট: সম্পূৰ্ণ শৰীৰৰ সেৱা; ইয়াৰ মূল্য প্ৰায় ২৮৯ ইউয়ান।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
