অসম লাইভ২৪ঃ দিল্লীৰ মুখ্যমন্ত্ৰী অৰবিন্দ কেজৰিৱালে বুধবাৰে এখন ৰাজহুৱা সভাত চকুলো টুকিছে। তেওঁৰ কেবিনেট মন্ত্ৰী মনীষ চিছোডিয়াৰ কথা কৈ চকুলো টুকিছে মুখ্যমন্ত্ৰী কেজৰিৱালে। দিল্লীৰ শিক্ষামন্ত্ৰী মনীষ চিছোডিয়াই গঢ় দিয়া শিক্ষাৰ মডেলক ধৰাশায়ী কৰিবলৈকে তেওঁক জে’লত দিয়া হৈছে বুলিও প্ৰকাশ কৰিছে কেজৰিৱালে।
থোকাথুকি মাতেৰে কেজৰিৱালে মনীষ চিছোডীয়া সন্দৰ্ভত কয়, ‘মোদী চৰকাৰে দিল্লীৰ শিক্ষা মডেলক ধ্বংস কৰিবলৈকে মনীষ চিছোডিয়াক কাৰাগাৰলৈ প্ৰেৰণ কৰিছে। দিল্লীৰ শিক্ষামডেলক তেওঁলোকে কেতিয়াও ধ্বংস কৰিব নোৱাৰে। মনীষ চিছোডিয়াৰ সপোন আমি ভাঙি যাবলৈ নিদিও। মনীষ চিছোডিয়াই সপোন দেখিছিল দিল্লীৰ সকলো শিশুৱেই শিক্ষা লাভ কৰক। সেই কাম তেওঁ আৰম্ভও কৰিছিল। কিন্তু কেন্দ্ৰীয় চৰকাৰে তেওঁৰ ভাল কামত যতি পেলাবলৈকে জে’ললৈ পঠিয়ালে।’
ইয়াৰোপৰি কেজৰিৱালে ভাষণত কয় যে, মনীষ চিছোডিয়াই যদি শিক্ষাৰ ক্ষেত্ৰত ভাল কাম নকৰিলেহেতেন তেন্তে তেওঁক জে’লত দিয়া নগ’লহেতেন। দিল্লীৰ শৈক্ষিক আন্দোলন কেন্দ্ৰীয় চৰকাৰৰ সহ্য হোৱা নাছিল। সমগ্ৰ দেশতেই আজি দিল্লীৰ শৈক্ষিক মডেলৰ চৰ্চা চলে। সেই চৰ্চায়েই কেন্দ্ৰীয় চৰকাৰক কষ্ট দিছে।
উল্লেখ্য যে, আৱকাৰী গোচৰত ২৬ ফেব্ৰুৱাৰীত চিবিআইয়ে গ্ৰেপ্তাৰ কৰে মনীষ চিছোডিয়াক। ইয়াৰ পাছতেই মনীষ চিছোডিয়াই উপমুখ্যমন্ত্ৰী পদৰ পৰা ইস্তাফা দিয়ে। পাছলৈ মাৰ্চ মাহত ই ডিয়ে তেওঁক পুনৰ গ্ৰেপ্তাৰ কৰে। বৰ্তমান মনীষ চিছোডিয়া ন্যায়িক জিম্মাতেই আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
