অসম বিধানসভা অধিৱেশনৰ চতুৰ্থ দিন। NDA চৰকাৰে তৃতীয়বাৰৰ বাবে কাৰ্যভাৰ গ্ৰহণ কৰাৰ পাছত যোৱা ২১ মে’ৰ পৰা এই অধিৱেশন আৰম্ভ হৈছিল। আজি মুখ্যমন্ত্ৰী হিমন্ত বিশ্ব শৰ্মাই সদনত বহুতো কথা উল্লেখ কৰে।
ভাষণত মুখ্যমন্ত্ৰীয়ে কয়, “যোৱা ৪ বছৰত চাৰিৰ পৰা ৮ লাখলৈ বৃদ্ধি হৈছে অসমৰ GDP আৰু অসম চৰকাৰে ২০২৮ চনৰ ভিতৰত ৰাজ্যখনক ১০ লাখ কোটি টকাৰ অৰ্থনীতিলৈ ৰূপান্তৰিত কৰাৰ দিশত কাম কৰি আছে। বিজেপিয়ে ৰাজ্যৰ শান্তি আৰু উন্নয়নৰ এজেণ্ডাকলৈ কাম কৰি আছে।”
অসম বিধানসভাত ৰাজ্যপালৰ ভাষণৰ প্ৰতি ধন্যবাদৰ প্ৰস্তাৱ সন্দৰ্ভত আলোচনাৰ সময়ত ভাষণ দি শৰ্মাই কয় যে এন ডি এৰ নিৰ্বাচনী প্ৰদৰ্শনে সমগ্ৰ ৰাজ্যৰ ভোটাৰৰ মাজত মিত্ৰতাৰ ওপৰত ক্ৰমাৎ আস্থা বৃদ্ধি পোৱা বুলি প্ৰকাশ কৰিছে।
ভাষণৰ আৰম্ভণিত মুখ্যমন্ত্ৰীয়ে ১ কোটি লোকৰ ভোট লাভ কৰি ১০২ খন আসনত বিজেপি মিত্ৰজোঁট জয়ী হৈ ৰাজনৈতিক ইতিহাসত মাইলৰ খুটি স্থাপন কৰিছে। বিজেপিয়ে ৮২ লাখ, অগপই ১৪ লাখ আৰু BPFএ ৮ লাখ ভোট লাভ কৰি একপ্ৰকাৰ ৫০ শতাংশ লোকৰ ভোট লাভ কৰিছে বুলি উল্লেখ কৰে। এই ভাষণত ২০৩১ৰ নিৰ্বাচনত এই ১৮জন ধৰ্মীয় সংখ্যালঘু বিধায়ক নিৰাপদ নহয় বুলিও মুখ্যমন্ত্ৰীয়ে উল্লেখ কৰে।
ইফালে ভাষণৰ মাজতে মুখ্যমন্ত্ৰীয়ে বিৰোধীক কটাক্ষ কৰি কয়, “বিধায়ক হ’ল বুলিয়েই অহংকাৰ নকৰিব আজি বিধায়ক বুলিয়েই কাইলৈও হৈ থাকিব বুলি কোনো কথা নাই। MP হৈ অহংকাৰ কৰাৰ কাৰণে যোৰহাটত এজনক ৰাইজে হৰুৱালে, দৰ্পচূৰ্ণ, অহংকাৰ পৰিত্যাগ কৰিলেহে বাৰে বাৰে বিধায়ক হ’ব পাৰিব। যদি মোৰ অহংকাৰ হয় আপোনালোকে মোক দেখুৱাই দিব, অহংকাৰী বিধায়কক কেতিয়াও ৰাইজে প্ৰশ্ৰয় নিদিয়ে।”
ইফালে মুখ্যমন্ত্ৰীয়ে PA, OSD কলৈ সাৱধান কৰি দিলে ৰাজ্যৰ বিধায়কসকলক। বছৰে বছৰে বিধায়কে সলনি কৰক PA, OSD, কেৱল PA, OSD ৰ ওপৰতে নিৰ্ভৰশীল হৈ থাকিব নালাগে বুলি কয় বিধায়কসকলে।
মান্ধাতাযুগত বাস কৰিব নিবিচাৰে অসমবাসীয়ে বুলি কৈ মুখ্যমন্ত্ৰীয়ে কয়, “অসমৰ ৰাইজে এতিয়া হিংসা নিবিচাৰে। বোমা-বিস্ফোৰণৰ শব্দত এতিয়া নুপুৱাই ৰাতি। শান্তি-সমৃদ্ধিৰ নতুন দ্বীপলৈ পৰিণত হৈছে অসম। ইয়াৰ বাবে অসমে দেখিছে এক নতুন যুগ। ৬ হাজাৰ যুৱক-যুৱতীয়ে অস্ত্ৰ ত্যাগ কৰি মূল সুতিলৈ ঘুৰি আহিছে। কেন্দ্ৰীয় চৰকাৰৰ প্ৰচেষ্টাৰ বাবেই আজিৰ যুৱ সমাজে পূৰ্বৰ ৰক্তাক্ত পৰিৱেশ দেখা নাই। নিৰ্বাচনৰ ফলাফলে স্পষ্ট কৰি দিছে ৰাইজে কোনো উদ্যোগপতিক বেয়া নাপায়, উন্নয়নৰ পক্ষত যি থাকে তেওঁলোকৰ পক্ষতে থাকে অসমবাসী”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
