অসম লাইভ২৪ঃ কৰ্ণাটকৰ বিধানসভা নিৰ্বাচনৰ প্ৰচাৰ এতিয়া তুংগত। কৰ্ণাটকৰ নিৰ্বাচনৰ প্ৰচাৰ চলাবলৈ গৈ কংগ্ৰেছৰ বিৰুদ্ধে ব্যক্তিগত আক্ৰমণৰ অভিযোগ আনিছে প্ৰধানমন্ত্ৰী মোদীয়ে। শনিবাৰে হুমনাবাদত বিজেপিৰ সভাত মল্লিকাৰ্জূন খড়্গেৰ বিৰুদ্ধে এই অভিযোগ আনিছে প্ৰধানমন্ত্ৰীয়ে। প্ৰধানমন্ত্ৰীগৰাকীয়ে কয়, ‘কংগ্ৰেছ নেতাসকলে এতিয়ালৈ ৯১ বাৰ মোক ব্যক্তিগত আক্ৰমণ কৰিছে।’
কংগ্ৰেছ সভাপতি মল্লিকাৰ্জুন খড়্গে বৃহস্পতিবাৰে কালবুৰ্গিত এক নিৰ্বাচনী জনসভাত প্ৰধানমন্ত্ৰী নৰেন্দ্ৰ মোদীক বিষধৰ সাপৰ সৈতে তুলনা কৰিছিল। কিন্তু এই মন্তব্য কৰাৰ পাছত দুঃখপ্ৰকাশো কৰিছিল কংগ্ৰেছ সভাপতিগৰাকীয়ে। নিজৰ মন্তব্যৰ স্পষ্টীকৰণ দি পাছত মল্লিকাৰ্জূন খড়্গে কৈছিল, ‘মোদীয়েই নহয় বিজেপিৰ সমূহ কৰ্মকৰ্তাই বিষাক্ত সাপৰ দৰে। মুখ মেলিলেই মৃত্যু অৱধাৰিত।’
আগন্তুক ১০ মেত ২২৪ আসনৰ বাবে কৰ্ণাটকৰ বিধানসভা নিৰ্বাচন অনুষ্ঠিত হ’ব। ১৩ মে’ত হ’ব ভোটগণনা। বহুকেইটা নিৰ্বাচনী সমীক্ষাই কোৱামতে এইবাৰ দক্ষিণ ভাৰতৰ একমাত্ৰ বিজেপি শাষিত ৰাজ্যৰ পৰাও বিজেপিয়ে বিদায় ল’ব। কংগ্ৰেছেই চৰকাৰ গঠন কৰিব। এইবাৰ শাসনভাৰ লাভ কৰিবনে এই বিষয়টোক লৈ শংকা অহাত প্রধানমন্ত্ৰী নিজেই নামি পৰিছে প্ৰচাৰত। দুদিনীয়া ভ্ৰমণসূচীয়ে মোদী উপস্থিত হৈছে কৰ্ণাটকত। বিজেপিৰ এক সূত্ৰই প্ৰকাশ কৰামতে কৰ্ণাটকত প্ৰথমদিনা ৬ খন নিৰ্বাচনী প্ৰচাৰ সভাত ভাগ ল’ব মোদীয়ে। দুদিনত মুঠ ২২ খন প্ৰচাৰসভাত মোদীয়ে ভাগ ল’ব বুলিও জনাইছে একাংশ কৰ্মকৰ্তাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
