অসম লাভই ২৪ঃ ক’ৰোনা মহামাৰীয়ে দুখীয়াৰ ঘৰ পোহৰ কৰা চাকি গছিয়েই নহয়, নুমুৱাই পেলালে জুইশালৰ জুইকুৰাও। দিন হাজিৰা কৰা লোকসকলৰ ঘৰৰ পৰিয়ালসমূহে কোভিডৰে নহয়, এতিয়া যুঁজিছে পেটৰ ভোকৰ সৈতে। আজি আমি আপোনালোকৰ সন্মুখলৈ লৈ আহিছো এটা দুর্ভগীয়া পৰিয়ালৰ কাহিনী, যি দুর্ভগীয়া পৰিয়ালটো এই সংকটৰ সময়ত কোভিডৰে নহয়, যুঁজিছে ভোকেৰে। কিন্তু তেওঁলোকৰ পৰিয়ালটোৰ ২ কণমানি থিয় দিছে সাহস হিচাপে। প্ৰতিবেদনখন অনুপ্ৰেৰণামূলক, শেষলৈকে পঢ়িব। দিন হাজিৰা কৰি পেট প্ৰৱর্তোৱা বীৰুৰ পৰিয়ালটো উত্তৰাখণ্ডৰ দেৰাডুনৰ। পৰিয়ালটোৱে ক’ৰোনাৰ সমানে যুঁজিছে ভোকৰ সৈতে; কিন্তু হাৰ মনা নাই। পৰিয়ালটোৱে প্ৰস্তুত কৰিছে লেফাফা। বীৰুৰ কণমানি কন্যা আৰু পুত্ৰই বজাৰলৈ নিজেই গৈ দুবেলাৰ বাবে গোটাইছে ৰেচন। ক’ৰোনা কালে সকলোকে বিপাঙত পেলাইছে। ব্যৱসায় শেষ। প্ৰত্যেক ঘৰতে কিবা নহয়, কিবা ৰোগৰ ৰোগী আছে। পদপথৰ ব্যৱসায়ীসকলৰ পৰা আৰম্ভ কৰি দিন হাজিৰা কৰা লোকসকলৰ পৰিয়াল কোভিডৰ লগতে ভোকৰ সৈতেও যুঁজিছে। কার্ফিউ আৰম্ভ হোৱাৰ পাছত দিন হাজিৰা কৰা বীৰুৰ অৱস্থাও একে হ’ল। বীৰুৰ পৰিয়ালটোত পত্নীৰ বাহিৰে আছে আন ৬টাকৈ কণমানি। বহুকেইটা দিন ভোকেৰে যুঁজি হাৰ নামানিলে বীৰুৰ পৰিয়ালটো। বীৰুৰ পত্নী ফাতেমা, পুত্ৰ বংশ আৰু কন্যা বংশিকাই পৰিয়ালৰ কামান চম্ভালিলে। আৰম্ভ কৰিলে বাতৰি কাকতৰ পৰা লেফাফা প্ৰস্তুত কৰিবলৈ। ১০ বছৰীয়া পুত্ৰ বংশ আৰু ১২ বছৰীয়া কন্যা বংশিকাই লেফাফাসমূহ এটা মোনাত ভৰাই বিক্ৰী কৰিবলৈ লৈ যায় বজাৰলৈ। ভাতৃ-ভগ্নীয়ে মিলি লেফাফাসমূহ লৈ খোজকাঢ়ি চহৰৰ অলিয়ে-গ’লিয়ে বিক্ৰী কৰে। বর্তমান সময়ত যিহেতু চিঠিৰ জনপ্ৰিয়তা কমিল সেইবাবে সাধাৰণ লোকসকলতকৈ লেফাফাসমূহৰ বেছি চাহিদা বংশিকা আৰু বংশই পালে ঔষধৰ দোকানসমূহত। বাকী দোকানসমূহে বংশিকা-বংশৰ লেফাফা ক্ৰয় কৰিবলৈ আগ্ৰহ নেদেখুৱায়। গোটেই দিনটো ঘূৰি ২০০ টকা পর্যন্ত লেফাফা বিক্ৰী কৰে তেওঁলোকে। তাৰ মাজতে কোনোবা এটা দিনত ১০০ টকাৰ লেফাফাও বিক্ৰী নহয়। সেইদিনা এবেলা খাই এবেলা চিন্তা কৰোতেই যায় বীৰুহঁতৰ পৰিয়ালটো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
