অসম লাইভ ২৪ : দেশত দ্বিতীয় পৰ্যায়ৰ ক’ৰোনাৰ প্ৰতিষেধক প্ৰদানৰ প্ৰক্ৰিয়া আৰম্ভ হৈছে। কেন্দ্ৰীয় চৰকাৰে অলপতে প্ৰকাশ কৰিছিল যে চৰকাৰী হাস্পতালত বিনামূলীয়া ক’ভিড প্ৰতিষেধক প্ৰদানৰ প্ৰক্ৰিয়াৰ সমান্তৰালভাৱে ব্যক্তিগত খণ্ডৰ চিকিৎসালয়তো উপলব্ধ হ’ব ক’ভিডৰ প্ৰতিষেধক। সেই অনুসৰি দেশৰ নিৰ্বাচিত কিছু ব্যক্তিগত খণ্ডৰ চিকিৎসালয়ত প্ৰতি ড’জত ২৫০ টকাকৈ মূল্য পৰিশোধ কৰি ক’ৰোনাৰ প্ৰতিষেধক গ্ৰহণৰ ব্যৱস্থা কৰা হৈছে। দ্বিতীয় পৰ্যায়ত দেশৰ ৬০ ঊৰ্ধ্বৰ নাগৰিক আৰু কো-মৰ্বিডিটি থকা ৪৫ ঊৰ্ধ্বৰ নাগৰিকে ক’ভিডৰ প্ৰতিষেধক লাভ কৰিব। ইচ্ছুকসকলে চৰকাৰী চিকিৎসালয়ত বিনামূলীয়াকৈ প্ৰতিষেধক লাভ কৰিব। যি সকলে ব্যক্তিগত খণ্ডৰ হাস্পতালত এই প্ৰতিষেধক ল’ব বিচাৰে তেওঁলোকে প্ৰতিটো ড’জত ২৫০ টকাকৈ দি দুবাৰত মুঠ ৫০০ টকা আদায় দি ক’ভিডৰ প্ৰতিষেধক ল’ব পাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
