অসম লাইভ ২৪ঃ ক’ৰোনাৰ প্ৰতিষেধক covishield ভেকচিনৰ দুটা ড’জৰ মাজত সময়সীমা ১২ৰ পৰা ১৬ সপ্তাহলৈ বৃদ্ধি কৰিছে কেন্দ্ৰীয় চৰকাৰে। এই সন্দৰ্ভত আজি বৃহস্পতিবাৰে ঘোষণা আগবঢ়াইছে কেন্দ্ৰীয় স্বাস্থ্যমন্ত্ৰী ডাঃ হৰ্ষবৰ্ধনে। পূৰ্বে covishieldৰ দুটা ড’জৰ ব্যৱধান আছিল ৬ৰ পৰা ৮ সপ্তাহ। এক বিশেষজ্ঞ সমিতিৰ পৰামৰ্শৰ ভিত্তিত কেন্দ্ৰীয় চৰকাৰে এই সিদ্ধান্ত গ্ৰহণ কৰা বুলি ঘোষণা কেন্দ্ৰীয় স্বাস্থ্যমন্ত্ৰীগৰাকীৰ। ইংলেণ্ডৰ ‘ৰিয়েল লাইফ এভিডেন্স’ৰ ভিত্তিত এই সিদ্ধান্ত গ্ৰহণ কৰা বুলি ঘোষণা কেন্দ্ৰৰ। টুইটযোগে স্পষ্ট কৰিছে কেন্দ্ৰীয় স্বাস্থ্যমন্ত্ৰী ডাঃ হৰ্ষবৰ্ধনে।
লক্ষণীয়ভাৱে কেন্দ্ৰই এই সিদ্ধান্ত গ্ৰহণ কৰিছে ভেকচিনৰ নাটনিৰ সময়ত। যিসময়ত ৪৫ ঊৰ্ধ্বৰ পৰিৱৰ্তে ১৮ ঊৰ্ধ্বৰ লোকক ভেকচিন প্ৰদান কৰি থকা হৈছে এনে সময়তে ভেকচিনৰ নাটনি হোৱা পৰিস্থিতিত কেন্দ্ৰৰ এই সিদ্ধান্ত। আৰম্ভণিতে covishieldৰ দ্বিতীয়টো ড’জ ৪ৰ পৰা ৬ সপ্তাহৰ ভিতৰত, পৰৱৰ্তী পৰ্যায়ত ৪ৰ পৰা ৮ সপ্তাহৰ ভিতৰত, তাৰ পাছত ৬ৰ পৰা ৮ সপ্তাহৰ ভিতৰত প্ৰদানৰ সিদ্ধান্ত গ্ৰহণ কৰা হৈছিল; আৰু এতিয়াৰে পৰা ১২ৰ পৰা ১৬ সপ্তাহৰ ভিতৰত covishieldৰ দ্বিতীয়টো ড’জ প্ৰদানৰ সিদ্ধান্ত গ্ৰহণ কৰা হৈছে। ‘নেচনেল টেকনিকেল এডভাইছ’ৰী গ্ৰুপ অন্ ইমিউনাইজেচন’ (ntagi)-এ চৰকাৰক পৰামৰ্শ দিয়া মতে দুটা ড’জৰ মাজত ব্যৱধান বৃদ্ধি কৰিলে বেছি ভাল ফলাফল লাভ কৰা যাব। ভাৰত বায়’টেকৰ দ্বাৰা উৎপাদিত covaxinৰ দ্বিতীয়টো ড’জৰ ব্যৱধান অৱশ্যে পূৰ্বৰ দৰেই অপৰিৱৰ্তিত ৰূপত ২৮ দিনেই ৰখা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
