Deadly Landslide in Northern Papua New Guinea 100 dead
ৰুষ্ট প্ৰকৃতি, ভয়ংকৰ ভূমিস্খলনৰ ফলত কমেও ১০০ জন লোকৰ মৃত্যু, বৰ্তমানেও অব্যাহত উদ্ধাৰ অভিযান
বিশ্বৰ বিভিন্ন প্ৰান্তত যেন প্ৰকৃতিয়ে কালৰূপ ধাৰণ কৰিছে। কোনো ঠাইত যদি ধাৰাসাৰ বৰষুণ, কোনো ঠাইত বানপানী, কোনো ঠাইত প্ৰচণ্ড ধুমুহা, ঘূৰ্ণীবতাহ। তাৰে মাজেত আহিছে ভয়ংকৰ ভূমিস্খলনৰ খবৰ। একেলগে শতাধিক লোকৰ প্ৰাণহানি হোৱাৰ খবৰ।
পাপুয়া নিউগিনিত সংঘটিত হৈছে এই শোকাৱহ ঘটনা। পাপুয়া নিউগিনি গাঁৱত ভূমিস্খলন হৈ কমেও ১০০ জন লোকৰ মৃত্যুৰ খবৰ। বৰ্তমানেও সেই খহি অহা মাটিৰ মাজত লোক আৱদ্ধ হৈ থকাৰ আশংকা। অব্যাহত আছে উদ্ধাৰ অভিযান।
পাপুয়া নিউগিনিৰ এখন দুৰ্গম গাঁৱত ভূমিস্খলনৰ ফলত কমেও ১০০ জন লোকৰ মৃত্যু হোৱা বুলি জানিব পৰা গৈছে। অষ্ট্ৰেলিয়াৰ সংবাদ মাধ্যমৰ মতে, স্থানীয় সময় অনুসৰি পুৱা প্ৰায় ৩ মান বজাত এংগা প্ৰদেশৰ কাওকালাম গাঁৱৰ সমীপত সংঘটিত হোৱা ভূমিস্খলনে বহু ঘৰ ধ্বংস কৰে।
উদ্ধাৰকাৰী দলে অব্যাহত ৰাখিছে উদ্ধাৰকাৰ্য। বহু মৃতদেহও উলিয়াই অনা হৈছে। আহতো হৈছে বহু লোক। কিন্তু উদ্ধাৰৰ কাৰ্য প্ৰত্যাহ্বানমূলক হৈছে।
কিছুমান বিশাল শিল আৰু গছ-গছনি, অট্টালিকাবোৰেৰে হেচা মাৰি ধৰি আছে সকলো। যাৰ বাবে মৃতদেহবোৰ দ্ৰুতভাৱে বিচাৰি পোৱাটো কঠিন হৈ পৰিছে। পাহাৰৰ এটা অংশ ভাঙি যোৱাৰ ফলত ঘৰবোৰ ধ্বংস হৈছিল, সেই সময়ত ঘৰবোৰত মানুহবোৰে গভীৰ নিদ্ৰাত আছিল যাৰ বাবে কোনো লোকে নিজকে ৰক্ষা কৰিব নোৱাৰে। সেয়ে কেৱল অনুমান কৰা হৈছে সেই খহি পৰা মাটিৰ তলত পোত যোৱা অৱস্থাত আছে প্ৰায় ১০০ৰো অধিক লোক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
