দিল্লীৰ ইন্দিৰা গান্ধী আন্তৰ্জাতিক বিমানবন্দৰত ইবোলা ভাইৰাছক লৈ এক বিশেষ জাননী জাৰি কৰা হৈছে৷ ইবোলাত আক্ৰান্ত দেশসমূহৰ পৰা অহা বা সেইসমূহ দেশলৈ যাবলগীয়া বিমানৰ ওপৰত কাঢ়া নজৰদাৰি ৰখা হৈছে৷ এই যাত্ৰাত বাহিৰৰ পৰা অহা কোনো যাত্ৰী অসুস্থ থাকিলে বা ইয়াৰ পৰা যাবলগীয়া কোনো যাত্ৰী অসুস্থ হৈ থাকিলে যাত্ৰীসকলে অবিলম্বে বিমানবন্দৰৰ স্বাস্থ্য কৰ্মকৰ্তাক জনাবলৈ নিৰ্দেশ দিয়া হৈছে৷
ইবোলা ভাইৰাছ যাতে দেশত বিয়পি নাযায় তাৰবাবেই এই সিদ্ধান্ত গ্ৰহণ কৰিছে বুলিও জনাইছে দিল্লী এয়াৰপৰ্টৰ তৰফৰ পৰা৷ বুধবাৰে কেন্দ্ৰীয় স্বাস্থ্য সচিবে ৰাজ্যসমূহৰ সৈতে এক উচ্চস্তৰৰ পৰ্যালোচনা বৈঠক কৰাৰ পাছতেই এই পদক্ষেপ লোৱা হৈছে৷
দিল্লী বিমানবন্দৰত কংগো, উগাণ্ডা আৰু দক্ষিণ ছুডানৰ পৰা অহা যাত্ৰীসকলক বিশেষ নজৰত ৰখা হৈছে৷ এই দেশসমূহৰ পৰা অহা বা এইসমূহ দেশলৈ যাবলগীয়া যাত্ৰীৰ স্বাস্থ্য পৰীক্ষাত নজৰ দিয়া হৈছে৷ কংগোত বৰ্তমানলৈকে ইবোলাত আক্ৰান্ত হৈছে ৫১জন লোকে প্ৰাণ হেৰুৱাইছে৷ WHOয়ে জনোৱা অনুসৰি তাত মহামাৰিৰ ৰূপেই ধাৰণ কৰিছে এই ৰোগে৷
কি কি নিৰ্দেশনা দিয়া হৈছে যাত্ৰীক?
বিমানবন্দৰ কৰ্তৃপক্ষই জনাইছে যে জ্বৰ, দুৰ্বল লগা, অৱসাদ, মূৰৰ বিষ, পেশীৰ বিষ. বমি, ডায়েৰিয়া আৰু কাৰণ অবিহনে নাক বা মুখৰ পৰা তেজ ওলোৱাই এই ৰোগৰ প্ৰাথমিক লক্ষণ৷ সেয়ে যিসকল যাত্ৰীৰ এই ৰোগ আছে তেওঁলোকৰ স্বাস্থ্য পৰীক্ষা জৰুৰী৷ ইয়াৰোপৰি বাহিৰৰ পৰা অহা কোনো ব্যক্তিৰ শৰীৰত যদি এই লক্ষণ দেখিছে তেন্তে ২১ দিনৰ কোৱাৰেণ্টাইনৰ কথাও কোৱা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
