অসম লাইভ২৪ঃ উচ্চতম ন্যায়ালয়ে দিল্লী চৰকাৰৰ ক্ষমতা বঢ়াই দিয়াৰ ২৪ ঘণ্টা নৌহওঁতেই দিল্লী চৰকাৰে লৈছে বৃহৎ সিদ্ধান্ত। বৃহস্পতিবাৰে ক্ষমতা পায়েই দিল্লী প্ৰশাসনে লৈছে বিশেষ সিদ্ধান্ত। ক্ষমতা পায়েই দিল্লীৰ এজন শীৰ্ষ আমোলাক বিদায় দিলে মুখ্যমন্ত্ৰী অৰবিন্দ কেজৰিৱালে। কেৱল সেয়াই নহয়, চৰকাৰৰ সমূহ কাম কাজত যিসকল আমোলাই হস্তক্ষেপ কৰি আহিছে সেইসকলৰ বিৰুদ্ধেও কাঢ়া পদক্ষেপ ল’ব বুলি প্ৰকাশ কৰিছে কেজৰিৱাল চৰকাৰে। উচ্চতম ন্যায়ালয়ৰ ৰায়দানৰ পাছতেই সংবাদমেল অনুষ্ঠিত কৰি কেজৰিৱালে কয়, ‘ইমান দিনে আমি আমোলা কৰ্মচাৰীৰ কাম কাজত বিশেষ মাত মাতিব পৰা নাছিলো। এইবাৰ আমি ক্ষমতা পাইছো। এতিয়াৰে পৰা যিসকল আমোলা, বিষয়া, কৰ্মচাৰীয়ে নিজৰ দায়িত্বত গাফিলতি কৰে তেওঁলোকৰ বিৰুদ্ধে আমি কঠোৰ হম।’ ইপিনে আপৰ তৰফৰ পৰাও কৰা হৈছে বিশেষ টুইট, ‘নিৰ্বাচিত চৰকাৰৰ আমোলা বিষয়াৰ বদলি কৰাৰ ক্ষমতা আছে। চৰকাৰী দপ্তৰৰ কৰ্মচাৰীয়ে চৰকাৰৰ অধীনতেই কাম কৰিব লাগিব।’
দিল্লীৰ ক্ষমতা কাৰ হাতত থাকিব? কেন্দ্ৰীয় চৰকাৰ নে আপ চৰকাৰৰ হাতত ক্ষমতা থাকিব সেই বিবাদৰ নিষ্পতি ঘটাইছে সৰ্বোচ্চ ন্যায়ালয়। দেশৰ প্ৰধান বিচাৰপতি ডিৱাই চন্দ্ৰচূড়ৰ নেতৃত্বাধীন সাংবিধানিক বেঞ্চে সৰ্বসন্মতিক্ৰমে লৈছে এই সিদ্ধান্ত। আদালতৰ তৰফৰ পৰা জনোৱা অনুসৰি ‘জনগণৰ ইচ্ছা’ক বাস্তবায়িত কৰাৰ বাবেই একন চৰকাৰক নিৰ্বাচিত কৰা হয়। সেয়ে প্ৰশাসনিক সমস্ত কামৰ যাৱতীয় সিদ্ধান্ত চৰকাৰৰ হাতত থকাটো খুবেই গুৰুত্বপূৰ্ণ। চৰকাৰৰ নিয়ম নীতি উপৰাজ্যপালেও মানি চলাটো খুবেই গুৰুত্বুপূৰ্ণ। উচ্চতম ন্যায়ালয়ৰ ন্যায়াধীশে ৰায় পঢ়ি দিওতে কয়, ‘যদি কৰ্মচাৰী, আমোলা, বিষয়াসকলে মন্ত্ৰীসকলৰ কাষত নিজৰ কামকাজৰ খতিয়ান দাঙি ধৰাটো এই দায়িত্ব। যদি এই দায়িত্ব পালন নকৰে তেন্তে সেয়া নীতি উলংঘন কৰা এক বিষয়। প্ৰয়োজনত উপৰাজ্যপালে মুখ্যমন্ত্ৰী আৰু মন্ত্ৰীসভাক পৰামৰ্শ দিব পাৰিব যদিও অধিকাৰ খটুৱাব নোৱাৰিব।
উল্লেখ্য যে, দিল্লী অন্যান্য কেন্দ্ৰীয়শাষিত অঞ্চলৰ তুলনাত কিছু পৃথক। সেই কথাও উল্লেখ কৰি আদালতে জনাই, আমোলা, বিষয়া আদিৰ বদলীৰ ক্ষেত্ৰতো ৰাজ্য চৰকাৰে কোনোধৰণৰ হস্তক্ষেপ পূৰ্বে কৰিব পৰা নাছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
