অসম লাইভ ২৪ঃ ভাৰতীয় মল্লযুঁজাৰু সংস্থাৰ সভাপতি ব্ৰিজভূষণ শৰণ সিঙক গ্ৰেপ্তাৰৰ দাবীত বিগত বহুদিন ধৰি বিক্ষোভ প্ৰদৰ্শন কৰিছে বজৰং পুনিয়া, সাক্ষী মালিক, বিনেশ ফোগটেকে ধৰি কেইবাগৰাকীও মল্লযুঁজাৰুৱে৷ দুখনকৈ FIR দাখিল কৰা হৈছে ব্ৰিজভূষণ শৰণ সিঙৰ বিৰুদ্ধে৷ ঘটনাৰ তদন্ত আৰম্ভ কৰিছে দিল্লী আৰক্ষীয়ে৷ কিন্তু মল্লযুঁজাৰুসকলে বিগত এমাহ ধৰি আন্দোলন কৰি থকা স্বত্ত্বেও কিয় আজিও মুকলি আকাশৰ তলত ব্ৰিজভূষণ শৰণ সিঙ সেই কথাক লৈ বহুতেই প্ৰশ্ন উত্থাপন কৰিছে৷
শেহতীয়াকৈ দিল্লী আৰক্ষীয়ে দিয়া প্ৰতিবেদন অনুসৰি ব্ৰিজভূষণক গ্ৰেপ্তাৰ কৰিবলৈ আৰক্ষীয়ে কোনো উপযুক্ত প্ৰমাণ পোৱা নাই৷ ইয়াৰোপৰি ব্ৰিজভূষণৰ বিৰুদ্ধে যিয়ে অভিযোগ আনিছে তেঁৱো কোনো উপযুক্ত প্ৰমাণ দাঙি ধৰিব পৰা নাই৷ যাৰবাবে ব্ৰীজভূষণ মুকলি আকাশৰ তলত আছে৷ আৰক্ষীয়ে জনোৱামতে উচ্চতম ন্যায়ালয়ৰ নিৰ্দেশ মানি আমি ১৫ দিনৰ ভিতৰতেই তদন্তৰ প্ৰতিবেদন জমা দিয়া হ’ব৷ ইয়াতেই উল্লেখ কৰা প্ৰয়োজন যে, দিল্লী আৰক্ষী বৰ্তমানো কেন্দ্ৰীয় চৰকাৰৰ অধীনতেই আছে৷ অৰ্থাৎ এক কথাত দিল্লী আৰক্ষী এতিয়াও অমিত শ্বাহৰ নিয়ন্ত্ৰণাধীন৷
ব্ৰিজভূষণৰ বিৰুদ্ধে এগৰাকী নাবালিকাসহ কেইবাগৰাকী মহিলা মল্লযুঁজাৰুক ধৰ্ষণ কৰাৰ অভিযোগ আনিছিল বজৰং, সাক্ষীকে ধৰি কেইবাগৰাকী মল্লযুঁজাৰুৱে৷ ব্ৰিজভূষণৰ গ্ৰেপ্তাৰৰ দাবীত বিগত ২৩ এপ্ৰিলৰ পৰাই যন্তৰ-মন্তৰত ধৰ্ণা দিছে মল্লযুঁজাৰুৰ দলটোৱে৷ কেন্দ্ৰীয় চৰকাৰকে ধৰি ৰাষ্ট্ৰপতিলৈকো আৱেদন কৰিছে মল্লযুঁজাৰুৰ দলটোৱে৷ কিন্তু দেশলৈ সুনাম কঢ়িয়াই অনা এইসকল মল্লযুঁজাৰুৰ কথা কোনে শুনে? চলিত চৰকাৰখনে কোনো ব্যৱস্থা গ্ৰহণ নকৰাত এই প্ৰতিবাদ আৰু জংগী হৈ উঠিল৷ মল্লযুঁজাৰুসকলে ইণ্ডিয়া গেটৰ সন্মুখত আমৰণ অনশন কৰাৰো হুংকাৰ দিছে৷ যন্তৰ-মন্তৰত ধৰ্ণা দি থাকোতেও আৰক্ষীয়ে প্ৰতিবাদত বাধা আৰোপ কৰা পৰিলক্ষিত হৈছিল৷
উল্লেখ্য যে ব্ৰিজমোহনৰ উপৰিও দিল্লী আৰক্ষীৰ বিৰুদ্ধেও শেহতীয়াকৈ অভিযোগ আনিছে মল্লযুঁজাৰুসকলে৷ মল্লযুঁজাৰুকেইগৰাকীয়ে কয়, ‘দিল্লী আৰক্ষীয়ে জোৰ কৰি যন্তৰ-মন্তৰৰ পৰা আমাৰ প্ৰতিবাদ সামৰিবলৈ বাধ্য কৰাইছে৷ আমি ব্ৰিজভূষণৰ বিৰুদ্ধে দুখন FIR দিয়েই প্ৰতিবাদ সামৰিব লগা হৈছে৷ তথাপিও আমি সংসদ ভৱন অভিমূখে আগবাঢ়িছিলো৷ তেতিয়াই আমাক দিল্লী আৰক্ষীয়ে আটক কৰে৷’ এইসমূহৰ মাজতেই মল্লযুঁজাৰুৰ দলটোৱে তেওঁলোকৰ পদকসমূহ হৰিদ্বাৰৰ গংগাঘাটত উপস্থিত হৈ গংগাত বিসৰ্জন দিবলৈ আগবাঢ়িছিল৷ ‘হৰ ৰি পৌড়ী’ ঘাটত উপস্থিত হৈ কান্দোনত ভাঙি পৰাও দেখা গৈছিল সাক্ষী, বিনেশহঁতক৷ সাক্ষীহঁতৰ এই যাত্ৰাত সংগী হৈছিল তেওঁলোকৰ পৰিয়ালক লোকসকলো৷ স্থানীয় বহুলোকেই সেই ঘাটত ভীৰ কৰাও পৰিলক্ষিত হৈছিল৷ মল্লযুঁজাৰুসকলৰ সমৰ্থনত স্থানীয় সাধাৰণ লোক থিয় দিয়াৰ সময়তে কৃষকনেতা নৰেশ টিকায়েতো তেওঁলোকৰ কাষত থিয় দিয়ে৷ গংগাৰ বিশেষ ঘাটত গুঞ্জৰিত হৈ উঠে ব্ৰিজভূষণৰ গ্ৰেপ্তাৰৰ দাবীৰ শ্লোগানেৰে৷ কৃষক নেতা নৰেশ টিকায়েতে সেই স্থানতেই মল্লযুঁজাৰুসকলক পৰামৰ্শ আগবঢ়াই যে তেওঁলোকে পদকসমূহ গংগাত উটোৱাই দিব নালাগে৷ তেওঁলোকে আৰু অলপ সময় লৈ বিষয়টোৰ পৰ্যালোচনা কৰক৷ মল্লযুঁজাৰুৰ কাষত কৃষক নেতাজন থিয় হোৱাৰ পাছতেই এতিয়া বহুজনেই আশা কৰিছে মল্লযুঁজাৰুসকলৰ এই প্ৰতিবাদে নিশ্চয় সফলতা লাভ কৰিব৷ ব্ৰিজভূষণৰ বিৰুদ্ধে কিবা এটা পদক্ষেপ আৰক্ষীয়ে গ্ৰহণ কৰিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
