সম্প্ৰতি ছ’চিয়েল মিডিয়াত BAT-BMS নামৰ এটা চীনা মোবাইল এপক লৈ ব্যাপক চৰ্চা চলিছে। অভিযোগ অনুসৰি, বহু উদণ্ড লোকে এই এপটোৰ অপব্যৱহাৰ কৰি ব্লুটুথৰ জৰিয়তে চলন্ত ই-ৰিক্সা মাজপথতে বন্ধ কৰি দিছে। এই ঘটনাৰ ভিডিঅ’ ভাইৰেল হোৱাৰ পিছতে নেটিজেনে এপটোক নিষিদ্ধ কৰাৰ দাবী জনাইছে। ভাইৰেল ভিডিঅ’সমূহত দেখা গৈছে, কিছুমান ব্যক্তিয়ে কেৱল আমোদৰ বাবে বা তথাকথিত‘prank’ৰ নামত চলি থকা ই-ৰিক্সাৰ বেটাৰীৰ সৈতে ব্লুটুথে সংযোগ স্থাপন কৰি বাহনখন বন্ধ কৰি দিছে। ইয়াৰ ফলত চালকৰ লগতে যাত্ৰীসকলেও যথেষ্ট অসুবিধাৰ সন্মুখীন হ’বলগীয়া হৈছে।
কি এই বিতৰ্কিত BAT-BMS App?
BAT-BMS হৈছে চীনৰ Shenzhen Grenergy Technology-এ নিৰ্মাণ কৰা এটা মোবাইল এপ। এই এপটোৰ মূল কাম হৈছে ব্লুটুথ-সক্ষম লিথিয়াম বেটাৰীৰ স্বাস্থ্য, চাৰ্জ, ভল্টেজ আৰু তাপমাত্ৰা আদিৰ তথ্য তাঁৰৰ সংযোগ অবিহনে পৰ্যবেক্ষণ বা পৰীক্ষা কৰা। ই মূলতঃ এটা Battery Management System (BMS) ইণ্টাৰফেচ হিচাপে কাম কৰে। কিন্তু সমস্যাৰ সৃষ্টি হৈছে এপটোৰ অপব্যৱহাৰক লৈ। ছচিয়েল মিডিয়া Xত প্ৰকাশ পোৱা তথ্য অনুসৰি, ভাৰতত ব্যৱহৃত বহু সস্তীয়া লিথিয়াম বেটাৰী পেকত ব্লুটুথ-সক্ষম BMS ইউনিট থাকে, য’ত পাছৱৰ্ড সুৰক্ষা অতি দুৰ্বল অথবা একেবাৰেই নাথাকে। এনে ক্ষেত্ৰত ১০–১৫ মিটাৰৰ ভিতৰত থকা যিকোনো ব্যক্তিয়ে বেটাৰীৰ সৈতে সংযোগ স্থাপন কৰি ডিছচাৰ্জ ফাংচন বন্ধ কৰিব পাৰে। এই ফাংচনৰ জৰিয়তেই মটৰলৈ শক্তি যোগান ধৰা হয়। সেয়েহে ইয়াক বন্ধ কৰি দিলেই ই-ৰিক্সাখন লগে লগে থমকি যাব পাৰে। ঘটনাটোক লৈ Xত বহু ব্যৱহাৰকাৰীয়ে ক্ষোভ প্ৰকাশ কৰিছে। বহুতেই -‘ই-ৰিক্সা চালকসকলৰ জীৱিকা এই বাহনৰ ওপৰত নিৰ্ভৰশীল। কোনো ব্যক্তিয়ে আমোদ-প্ৰমোদৰ বাবে মাজপথতে বাহন বন্ধ কৰি দিয়াটো কেতিয়াও গ্ৰহণযোগ্য নহয়। চৰকাৰে এনে এপৰ বিৰুদ্ধে কঠোৰ ব্যৱস্থা লোৱা উচিত।’ বুলি ক্ষোভ প্ৰকাশ কৰিছে।
BAT-BMS এতিয়াও ডাউনলোড কৰিব পাৰিনে?
ভাইৰেল বিতৰ্কৰ পিছত Apple App Store-ৰ পৰা BAT-BMS এপটো ইতিমধ্যে আঁতৰাই দিয়া হৈছে বুলি জানিব পৰা গৈছে। গুগলত এপটোৰ App Storeৰ পৰাও এই এপটো আঁতৰাই দিয়া হৈছে। অৱশ্যে, অন্যান্য প্লেটফৰ্মত এপটোৰ উপলব্ধতা সম্পৰ্কে এতিয়াও স্পষ্ট তথ্য পোৱা হোৱা নাই। এই ঘটনাই ব্লুটুথ-সক্ষম বেটাৰী ব্যৱস্থাৰ সুৰক্ষা ব্যৱস্থা শক্তিশালী কৰাৰ প্ৰয়োজনীয়তাক পুনৰ এবাৰ উজাগৰ কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
