IIT বাবা অভয় সিং পুনৰ বাতৰিৰ শিৰোনামত। মহাকুম্ভত ‘আইআইটিয়ান বাবা’ নামেৰে বিখ্যাত হোৱা অভয় সিঙ শেহতীয়াকৈ বিবাহপাশত আবদ্ধ হৈছে। এতিয়া তেওঁ অকলশৰীয়া নহয়, বা সাধু হৈয়ো থকা নাই৷ আই আইটি বাবা এতিয়া বিবাহিত৷ পত্নী প্ৰীতিকাৰ সৈতে এৰি অহা ঘৰলৈ আকৌ উভতিছে বাবা অভয় সিং। নৱবধুক মাতৃয়ে কৰাইছে গৃহপ্ৰৱেশ৷ ১৫ ফেব্ৰুৱাৰীত হিমাচল প্ৰদেশত মহাশিৱৰাত্ৰিৰ দিনটোতে দুয়োৱে বিবাহপাশত আবদ্ধ হয় বুলি সূত্ৰই প্ৰকাশ কৰিছে৷ বিবাহৰ পিছত ৬ এপ্ৰিলত হাৰিয়ানাৰ ঝজ্জাৰত থকা অভয়ৰ পূৰ্বপুৰুষৰ ঘৰত বেংক সম্পৰ্কীয় কিছু কাম সম্পূৰ্ণ কৰিবলৈ আহিছিল অভয় আৰু তেওঁৰ নৱবিবাহিতা পত্নী৷ তেতিয়াই পোহৰলৈ আহে সমগ্ৰ খবৰ৷
অভয় সিঙৰ পত্নী প্ৰীতিকা কোন?
অভয় সিঙৰ পত্নী প্ৰীতিকা কৰ্ণাটকৰ৷ মূলতঃ তেওঁ বেংগালুৰুৰ। প্ৰীতিকা এগৰাকী অভিযন্তাও আৰু আধ্যাত্মিকতাৰ প্ৰতি তেওঁৰো আছে তীব্ৰ আগ্ৰহ। সংবাদ মাধ্যমৰ সৈতে হোৱা কথা-বতৰাত অভয়ে প্ৰীতিকাক অতি সহজ-সৰল, সৎ, প্ৰকৃতিৰ ব্যক্তি বুলি অভিহিত কৰিছে। বিবাহ জীৱনত অতি সুখী আৰু বৰ্তমান হিমাচল প্ৰদেশৰ ধৰ্মশালাতেই দুয়ো থাকে বুলি জনাই বাবা অভয় সিঙে৷ প্ৰীতকাইয়ো অভয়ক অতি সহজ-সৰল, সৎ, প্ৰকৃত ব্যক্তি বুলি বৰ্ণনা কৰিছে। প্ৰীতিকা পঢ়া-শুনাতো অতি চোকা আছিল বুলিও জনাইছে অভয়ে৷ মঙ্গলুৰ ছেইণ্ট জোচেফ ইঞ্জিনিয়াৰিং কলেজ (এছজেইচি)ৰ পৰা ইলেক্ট্ৰনিক্স আৰু কমিউনিকেচনত বি.টেক ডিগ্ৰী লাভ কৰিছে প্ৰীতিকাই। তাৰপিছত এম আই টি মণিপালৰ পৰা জ্যোতিৰ্বিজ্ঞান আৰু মহাকাশ অভিযান্ত্ৰিক বিষয়ত স্নাতকোত্তৰ ডিগ্ৰী লাভ কৰে। স্নাতকোত্তৰ কালত বেংগালুৰুৰ ইণ্ডিয়ান ইনষ্টিটিউট অৱ এষ্ট্ৰ’ফিজিক্স (আই আই এ)ত গৱেষণাৰ ইন্টাৰশ্বিপো কৰিছিল। বিশ্বব্ৰহ্মাণ্ডৰ ৰহস্যসমূহ অন্বেষণ কৰি থাকোঁতে প্ৰীতিকাই নিজেই আধ্যাত্মিকতাৰ ফালে মন মেলে৷
অভয় সিং কোন আৰু তেওঁৰ ডিগ্ৰী কি?
১৯৯০ চনৰ ৩ মাৰ্চত হাৰিয়ানাৰ ঝজ্জাৰ জিলাৰ ছাছৰোলি গাঁৱত জন্ম আই আই টিয়ান বাবা নামেৰে পৰিচিত অভয় সিঙৰ । পিতৃৰ নাম কৰণ সিং আৰু মাকৰ নাম শীলা দেৱী। তেওঁৰ সৰু ভনীয়েক এগৰাকীও আছে। অভয়ে আই আই টি মুম্বাইৰ পৰা এৰোস্পেচ ইঞ্জিনিয়াৰিঙৰ বি.টেক ডিগ্ৰী লাভ কৰে। ২০২০ চনত তেওঁ কানাডালৈ গুচি যায় আৰু তাত এটা কোম্পানীত কাম কৰে। ২০২১ চনত ভাৰতলৈ উভতি অহাৰ পিছত তেওঁ ফটোগ্ৰাফী আৰম্ভ কৰে। ২০২৪ চনত তেওঁ পৰিয়ালৰ পৰা বিচ্ছিন্ন হৈ পৰে৷ ২০২৫ চনত প্ৰয়াগৰাজ মহাকুম্ভত বাবাৰ সাজ-পোছাক পৰিধান কৰি “আই আই টি বাবা” নামেৰে বিখ্যাত হৈ পৰে অভয়৷ তাৰপিছতেই বিগত প্ৰায় এবছৰমান আগতে প্ৰীতিকাক লগ পায় অভয়ে৷ প্ৰথম অৱস্থাত দুয়ো ভাল বন্ধু হৈ পৰিল, তাৰ পিছত ক্ৰমান্বয়ে প্ৰেমতো পৰিল। মাত্ৰ আঠ মাহৰ বন্ধুত্বৰ অন্তত তেওঁলোকে বিয়া কৰোৱাৰ সিদ্ধান্ত লয়।
১৫ ফেব্ৰুৱাৰীত মহাশিৱৰাত্ৰি উপলক্ষে হিমাচল প্ৰদেশত বিবাহপাশত আবদ্ধ হয় দুয়ো৷ দুয়োজনে কয় যে তেওঁলোকে একেলগে এটা বৃহত্তৰ উদ্দেশ্যত কাম কৰি আছে। অভয় আৰু প্ৰীতিকাই কয় যে, তেওঁলোকে শ্ৰী বিশ্ববিদ্যালয় স্থাপনৰ কাম কৰি আছে, যি প্ৰতিষ্ঠানে জ্ঞানৰ সৈতে আধ্যাত্মিক অনুশীলনৰ সংমিশ্ৰণ ঘটাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
