কৰ্মচাৰী প্ৰভিডেণ্ট ফাণ্ড অৰ্গেনাইজেশ্যনে আৰম্ভ কৰিছে EPS-95 ৰ পৰিৱৰ্তে কৰ্মচাৰী পেঞ্চন আঁচনি EPS-2026। ইয়াৰ মাজতে কৰ্মচাৰীৰ নূন্যতম পেঞ্চন বৃদ্ধিৰ বিষয়টোক লৈ আলোচনা আৰম্ভ হৈছে। দীৰ্ঘদিন ধৰি বিভিন্ন কৰ্মচাৰী সংগঠনে মাহিলী নূন্যতম পেঞ্চন ১০০০ টকাৰ পৰা ৭৫০০ টকালৈ বৃদ্ধিৰ দাবী জনাই আহিছে। ইয়াৰ সমান্তৰালকৈ মৌলিক দৰমহাত ডিয়াৰনেছ এলাৱেন্স (ডি এ) যোগ কৰাৰ দাবী উত্থাপন হৈছে।
সংসদত এই দুয়োটা বিষয়ত চৰকাৰৰ স্থিতি স্পষ্ট কৰি দিছে কেন্দ্ৰীয় শ্ৰম আৰু নিয়োগ ৰাজ্যিক মন্ত্ৰী শোভা কৰণ্ডলাজে।
পেঞ্চন বৃদ্ধিৰ দাবীক লৈ কি ক’লে চৰকাৰে?
নূন্যতম পেঞ্চন বৃদ্ধি আৰু মৌলিক দৰমহাত ডি এ সংযোজন কৰাৰ বাবে বিভিন্ন ট্ৰেড ইউনিয়ন, জনপ্ৰতিনিধি আৰু অন্যান্য অংশীদাৰসকলৰ পৰা চৰকাৰক দাবী লাভ কৰা বুলিও মন্ত্ৰীগৰাকীয়ে কয়। তেওঁ কয় যে ইপিএছ-৯৫ (বৰ্তমান ইপিএছ-২০২৬) হৈছে নিৰ্ধাৰিত অৱদান–নিৰ্ধাৰিত সুবিধা আঁচনি। অৰ্থাৎ এই আঁচনিখনত যিমানেই অৱদান থাকিব সিমানেই সুবিধা লাভ কৰিব। ই এক সামাজিক সুৰক্ষা আঁচনি, যি সম্পূৰ্ণৰূপে অৱদানৰ ওপৰত নিৰ্ভৰশীল।
বৰ্তমানৰ পেঞ্চনৰ নিয়ম কি?
- বৰ্তমানৰ নিয়ম অনুসৰি ইপিএছ-৯৫/ইপিএছ-২০২৬ৰ অধীনত সদস্যসকলৰ বাবে নূন্যতম মাহিলী পেঞ্চন ১০০০ টকা।
- বৰ্তমান নিয়োগকৰ্তাই কৰ্মচাৰীজনৰ মৌলিক দৰমহাৰ ১২ শতাংশ ইপিএফৰ অৱদানৰ ভিতৰত ৮.৩৩ শতাংশ ইপিএছত বৰঙণি আগবঢ়ায়।
- তদুপৰি কেন্দ্ৰীয় চৰকাৰৰ অৰিহণা ১.১৬ শতাংশ।
- ইপিএফঅ’ৰ এই অৱদান সৰ্বোচ্চ ১৫ হাজাৰ টকাৰ দৰমহাৰ ভিত্তিত গণনা কৰা হয়।
মন্ত্ৰীগৰাকীয়ে আৰু কয় যে বৰ্তমান চৰকাৰে নূন্যতম ১০০০ টকা পেঞ্চন প্ৰদানৰ বাবে আৰ্থিক সাহায্য আগবঢ়াইছে। অৱশ্যে ৭৫০০ টকালৈ বৃদ্ধি কৰাৰ কোনো সিদ্ধান্ত এতিয়াও লোৱা হোৱা নাই।
ভৱিষ্যতে পেঞ্চন বৃদ্ধি কৰিব পাৰেনে?
শোভা কৰণ্ডলাজে কয় যে, ইপিএফঅ’ৰ সদস্যসকলৰ পেঞ্চন বৃদ্ধিৰ দাবী চৰকাৰে বিবেচনা কৰি আছে। এই সন্দৰ্ভত আলোচনা চলি আছে। অৱশ্যে পেঞ্চন বৃদ্ধি কৰাৰ পূৰ্বে পেঞ্চন পুঁজিত জমা হোৱা বৰঙণি, ভৱিষ্যতৰ আৰ্থিক দায়বদ্ধতা আৰু পুঁজিৰ ক্ষমতাৰ সকলো দিশ পৰীক্ষা কৰা হ’ব বুলি তেওঁ স্পষ্ট কৰি দিয়ে। ভৱিষ্যতে যিকোনো সিদ্ধান্ত সংশ্লিষ্ট সকলো পক্ষৰ সৈতে আলোচনা কৰি লোৱা হ’ব।
ডি এ বেচিক পেৰ সৈতে সংযুক্ত হ’বনে?
অষ্টম দৰমহা আয়োগ ঘোষণাৰ পিছৰে পৰা কৰ্মচাৰীসকলৰ মাজত প্ৰশ্ন উত্থাপন হৈছে যে মৌলিক দৰমহাৰ সৈতে ডিয়াৰনেছ এলাৱেন্স (ডি এ) জড়িত হ’বনে? কৰ্মচাৰী সংগঠনসমূহেও দৰমহা আয়োগৰ বৈঠকত এই দাবী উত্থাপন কৰিছে। অৱশ্যে ডি এক বেচিক পে’ৰ সৈতে সংযোগ কৰাৰ সন্দৰ্ভত চৰকাৰে এতিয়াও কোনো আনুষ্ঠানিক ঘোষণা কৰা নাই।
বৰ্তমানৰ নিয়ম অনুসৰি দৰমহা আয়োগ কাৰ্যকৰী হোৱাৰ সময়ত যদি ডি এ ৫০ শতাংশতকৈ অধিক হয়, তেন্তে ইয়াক মৌলিক দৰমহাৰ সৈতে একত্ৰিত কৰা বুলি গণ্য কৰা হয়। অৱশ্যে এই সন্দৰ্ভত এতিয়ালৈকে চৰকাৰে চূড়ান্ত সিদ্ধান্ত লোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
