অসম লাইভ ২৪ঃ কোভিডত মৃত্যু হোৱা দেশৰ প্ৰতিটো পৰিয়ালক আৰ্থিক সাহায্য প্ৰদান কৰিব লাগিব কেন্দ্ৰীয় চৰকাৰে। বুধবাৰে এক শুনানিযোগে এই নিৰ্দেশ প্ৰদান কৰে দেশৰ উচ্চতম ন্যায়ালয়ে। নিৰ্দেশনাযোগে এই নীতি নিৰ্ধাৰণৰ বাবে কেন্দ্ৰক ৬ সপ্তাহৰ সময়সীমা বান্ধি দিছে ন্যায়ালয়ে। ইয়াৰোপৰি ক্ষতিপূৰণ হিচাপে প্ৰতিটো পৰিয়ালক কিমান পৰিমাণৰ আৰ্থিক সাহায্য প্ৰদান কৰিব তাৰ ৰূপৰেখা তৈয়াৰ কৰিব লাগিব। উচ্চতম ন্যায়ালয়ে সেই দায়িত্ব ন্যস্ত কৰিছে ৰাষ্ট্ৰীয় দুৰ্যোগ প্ৰশমন বিভাগৰ হাতত। দুৰ্যোগ প্ৰশমন বিভাগে বিবেচনা কৰি সিদ্ধান্ত গ্ৰহণ কৰিব কোনটো পৰিয়ালে কিমান সাহায্য লাভ কৰিব। উল্লেখ্য, পূৰ্বে কোভিডত প্ৰাণ হেৰুওৱা লোকৰ পৰিয়ালৰ বাবে ৪ টকাৰ ক্ষতিপূৰণৰ দাবীৰে আৱেদন জনাইছিল উচ্চতম ন্যায়ালয়ত। কিন্তু কেন্দ্ৰীয় চৰকাৰে ইমান টকাৰ ক্ষতিপূৰণ দিবলৈ অসমৰ্থ বুলি সদৰী কৰে। কিন্তু ৰাষ্ট্ৰীয় দুৰ্যোগ আইনৰ ধাৰা-১২ অনুসৰি, ক্ষতিপূৰণ হিচাপে মৃতকৰ পৰিয়ালক আৰ্থিক সাহায্য প্ৰদানৰ বাবে চৰকাৰ দায়বদ্ধ। গতিকে কেন্দ্ৰীয় চৰকাৰক এক নিৰ্দেশনাযোগে আৰ্থিক সাহায্য প্ৰদানৰ নিৰ্দেশ দিয়ে দেশৰ শীৰ্ষ আদালতে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
