দিল্লীৰ দক্ষিণ-পূব অঞ্চলৰ কিলোকৰি গাঁৱত দেওবাৰে নিশা সংঘটিত হয় এক চাঞ্চল্যকৰ ঘটনা। প্ৰকাশিত তথ্য অনুসৰি, নিশা প্ৰায় ১১.৩০ বজাত মণিপুৰৰ প্ৰখ্যাত সংগীতশিল্পী চোংথম বিক্ৰম সিঙে নিজৰ গৃহৰ তললৈ নামি আহিছিল। তেওঁৰ ঘৰৰ ওচৰত কেইজনমান লোকে হুলস্থুল কৰি থকাৰ লগতে যথেষ্ট শব্দ কৰি আছিল। সেই শব্দৰ বাবে তেওঁ আপত্তি জনাই লোককেইজনক শান্ত হ’বলৈ কৈছিল। ইয়াৰ পিছতে পৰিস্থিতি উত্তপ্ত হৈ পৰে। আৰক্ষীৰ মতে, ঘটনাত জড়িত লোকসকলৰ মাজত কিছুমান ডেলিভাৰী কৰ্মী থকাৰ লগতে ওচৰৰ ধাবা বা খাদ্য প্ৰতিষ্ঠানৰ কৰ্মচাৰীও আছিল বুলি তদন্তত পোহৰলৈ আহিছে। বিক্ৰম সিঙৰ সৈতে তেওঁলোকৰ প্ৰথমে তৰ্ক-বিতৰ্ক হয় আৰু ইয়াৰ পিছতে এই কাজিয়াই ভয়ংকৰ শাৰীৰিক আক্ৰমণৰ ৰূপ লয়।
CCTV ফুটেজৰ ভিত্তিত প্ৰকাশিত প্ৰতিবেদন অনুসৰি, বিক্ৰম সিঙক কেৱল ঘৰৰ বাহিৰতে নহয়, তেওঁ থকা অট্টালিকাৰ চিৰিৰ লবীতো খেদি গৈ আক্ৰমণ কৰা হৈছিল বুলি অভিযোগ উঠিছে। দুটাকৈ CCTV ফুটেজত আক্ৰমণকাৰীসকলক অট্টালিকাৰ পৰা ওলাই যোৱা আৰু কিছু সময় পিছত বিক্ৰমৰ পৰিয়ালৰ লোকে তেওঁক চিকিৎসালয়লৈ লৈ যোৱা দৃশ্য দেখা গৈছে। পৰিয়ালৰ অভিযোগ অনুসৰি, আক্ৰমণৰ সময়ত বিক্ৰমে সহায়ৰ বাবে চিঞৰিছিল। ওচৰ-চুবুৰীয়াই সেই নিশা চিঞৰ-বাখৰ শুনিছিল যদিও ঘটনাটো ইমান ভয়াৱহ বুলি তেওঁলোকে তেতিয়া বুজিব পৰা নাছিল। এগৰাকী চুবুৰীয়াই পিছত জনোৱা মতে, তেওঁ কেইজনমান লোকক ফোনত কথা পাতি আন লোকক মাতি থকা শুনিছিল।
গুৰুতৰভাৱে আহত বিক্ৰম সিঙক তেওঁৰ পুত্ৰই ততাতৈয়াকৈ দক্ষিণ দিল্লীৰ হলি ফেমিলী হাস্পতাললৈ লৈ যায়। কিন্তু চিকিৎসাধীন অৱস্থাতে সোমবাৰে পুৱা তেওঁৰ মৃত্যু হয়। চিকিৎসালয়ৰ প্ৰতিবেদন অনুসৰি, গুৰুতৰ আঘাত আৰু hemorrhagic shock-ৰ ফলতেই তেওঁৰ মৃত্যু হয় বুলি উল্লেখ কৰা হৈছে। ঘটনাৰ পিছতে দিল্লী আৰক্ষীয়ে তদন্ত আৰম্ভ কৰে। প্ৰকাশিত শেহতীয়া তথ্য অনুসৰি, ঘটনাৰ সৈতে জড়িত ৮জন অভিযুক্তক গ্ৰেপ্তাৰ কৰা হৈছে, যাৰ ভিতৰত এগৰাকী নাবালকো আছে বুলি বিভিন্ন প্ৰতিবেদনত প্ৰকাশ পাইছে। কেন্দ্ৰীয় মন্ত্ৰী কিৰেন ৰিজিজুৱেও সকলো অভিযুক্ত গ্ৰেপ্তাৰ হোৱা আৰু শীঘ্ৰে শক্তিশালী অভিযোগনামা দাখিল কৰাৰ কথা প্ৰকাশ কৰিছে। অৱশ্যে আৰক্ষীয়ে এতিয়ালৈকে ঘটনাটোৰ আঁৰত কোনো নিৰ্দিষ্ট জাতিগত বা বৰ্ণবাদী উদ্দেশ্য নিশ্চিত কৰা নাই। তদন্ত আগবঢ়াৰ লগে লগে আক্ৰমণৰ সম্পূৰ্ণ কাৰণ আৰু ঘটনাৰ প্ৰতিটো পৰ্যায় স্পষ্ট হোৱাৰ সম্ভাৱনা আছে।
কোন আছিল চোংথম বিক্ৰম সিং?
চোংথম বিক্ৰম সিং কেৱল এগৰাকী সংগীত শিক্ষক নাছিল; তেওঁ মণিপুৰৰ সংগীত জগতৰ এগৰাকী পৰিচিত নাম আছিল। মণিপুৰৰ থাংমেইবন্দ লৌৰুঙ পুৰেল লেইকাই অঞ্চলৰ বাসিন্দা বিক্ৰম সিঙে ১৯৮০ৰ দশকৰ পৰাই সংগীতৰ সৈতে জড়িত হৈ আছিল। তেওঁ Ultra Vires-ৰ সৈতে সংগীত যাত্ৰা আৰম্ভ কৰাৰ পিছত মণিপুৰৰ জনপ্ৰিয় ৰক বেণ্ড Phoenixৰ মুখ্য গীটাৰবাদক হিচাপে পৰিচিতি লাভ কৰিছিল। পিছত Eastern Darkৰ সৈতেও কাম কৰিছিল। মণিপুৰৰ আৰম্ভণিৰ ৰক সংগীতৰ বিকাশত তেওঁৰ অৱদান গুৰুত্বপূৰ্ণ আছিল বুলি সংগীত জগতৰ লোকসকলে উল্লেখ কৰিছে।
প্ৰায় দুটা দশক পূৰ্বে তেওঁ দিল্লীলৈ আহিছিল। ৰাজধানী চহৰখনতো তেওঁ সংগীতৰ সৈতে সম্পৰ্ক অটুট ৰাখিছিল। তেওঁ দিল্লীত এখন সংগীত বিদ্যালয় স্থাপন কৰাৰ লগতে ঘৰত ছাত্ৰ-ছাত্ৰীক সংগীতৰ শিক্ষা দিছিল। দিল্লী স্কুল অব মিউজিকতো তেওঁ শিক্ষক হিচাপে কাম কৰিছিল। বিক্ৰম সিং এটা সংগীতপ্ৰধান পৰিয়ালৰ সন্তান আছিল। তেওঁৰ মাতৃ চোংথম কমলা মণিপুৰৰ এগৰাকী প্ৰখ্যাত শাস্ত্ৰীয় আৰু আধুনিক সংগীতশিল্পী। ১৯৭২ চনৰ মণিপুৰী ছবি Matamgi Manipurতো তেওঁৰ মাতৃয়ে কণ্ঠদান কৰিছিল। মণিপুৰী সংগীত আৰু চলচ্চিত্ৰ জগতত তেওঁৰ বিশেষ পৰিচিতি আছিল। বিক্ৰম সিঙে BAFTA বঁটা লাভ কৰা ছবি Boong-ৰ পৰিচালিকা লক্ষ্মীপ্ৰিয়া দেৱীৰো আত্মীয় আছিল বুলি প্ৰতিবেদনত প্ৰকাশ পাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
