আমেৰিকাৰ নিউ জাৰ্ছী ষ্টেডিয়ামত ইতিহাস সৃষ্টি কৰি দ্বিতীয়বাৰলৈ ফিফা বিশ্বকাপৰ চেম্পিয়নৰ মুকুট শিৰত পিন্ধিলে স্পেইনে। তাৰকাখচিত গেলাৰীৰ পৰাই ফুটবলৰ নিৰপেক্ষ অনুৰাগীসকলৰ অভিনন্দন আৰু শুভেচ্ছাৰ বৰ্ষা স্পেইনলৈ অৰ্পণ কৰাৰ সমান্তৰালভাৱে ফুটবলৰ মহানায়ক মেছিৰ অশ্ৰুৰ বন্যাৰে ভৰি পৰা দুগালো কিন্তু বিশ্বৰ চুকে কোণে থকা অসংখ্য অজস্ৰ অনুৰাগীয়ে প্ৰত্যক্ষ কৰি মৰ্মে মৰ্মে উপলব্ধি কৰিছিল মেছিৰ হৃদয় ভাঙি যোৱা বেদনা। এতিয়াৰে পৰা যে ফুটবল বিশ্বকাপত অন্তত মেছিৰ দুভৰিৰ যাদু অনুৰাগীসকলে দেখিবলৈ নাপাব। কিন্তু খেলত যেনেকৈ বিনোদন থাকে তেনেকৈ নিৰ্মম বাস্তৱো থাকে যাক মানিবই লাগিব। স্পেইনৰ ফেৰান ট’ৰেছে অতিৰিক্ত সময়ৰ দ্বিতীয়াৰ্ধৰ আৰম্ভণিতে লেফ্ট উইংগাৰ উইলিয়ামছৰ সুন্দৰ এছিষ্টটোক গললৈ পৰিৱৰ্তন নকৰাহেঁতেন হয়টো আমি নেদেখিলোঁতেন মেছিৰ এই অশ্ৰু অঞ্জলি। কিন্তু আপুনি জানেনে ফাইনেলত নিৰ্ণায়কসূচক একমাত্ৰ গ’লটো কৰা ফেৰান ট’ৰেছে আহিছিল গুৱাহাটীলৈ। গুৱাহাটীৰ সৰুসজাই ষ্টেডিয়ামত খেলি গৈছিল ফুটবল।
গুৱাহাটীলৈ আহিছিল ফিফা বিশ্বকাপৰ ফাইনেলৰ নায়ক ফেৰান ট’ৰেছ
সেয়া ২০১৭ চনৰ কথা। সেইবছৰ অনূৰ্ধ ১৭ ফিফা বিশ্বকাপ আয়োজন কৰাৰ সৌভাগ্য লাভ কৰিছিল ভাৰতে। সেইসূত্ৰে গুৱাহাটীৰ সৰুসজাই ষ্টেডিয়ামতো অনুষ্ঠিত হৈছিল বিশ্বকাপৰ মেচ। ২০১৭ চনৰ ১৭ অক্টোবৰত ৰাউণ্ড অব ১৬ৰ এখন মেচ গুৱাহাটীৰ সৰুসজাই ষ্টেডিয়ামত ফ্ৰান্সৰ বিৰুদ্ধে খেলিছিল স্পেইনে। সেই মেচখন ১-২গলত জয়ী হৈছিল স্পেইনে। স্পেইনৰ হৈ জুৱান মিৰাণ্ডা আৰু আবেল ৰুইছে দিযছিল গ’ল দুটা। সেই মেচখনত সৰুসজাই ষ্টেডিয়ামত খেলিছিল ফিফা বিশ্বকাপৰ নায়ক ফেৰান ট’ৰাছে।
সমগ্ৰ মেচখনতেই নিস্প্ৰভ হৈ আছিল আৰ্জেণ্টিনা
অতিৰিক্ত সময়কে ধৰি মেচখনৰ ১০৬ মিনিটলৈ গ’ল শূন্যভাৱে থাকিলেও সমগ্ৰ মেচখনতে স্পেইনৰ সমুখত একেবাৰেই নিস্প্ৰভ হৈ আছিল আৰ্জেণ্টিনা। আৰ্জেণ্টিনাৰ গ’ল কীপাৰ মাৰ্টিনাজে দুৰ্দান্ত প্ৰদৰ্শন নকৰা হ’লে ফাইনেল মেচখনত আৰু কমেও দুটা গ’ল হজম কৰিবলগীয়া হ’লহেঁতেন আৰ্জেণ্টিনাই। স্পেইনৰ ষ্ট্ৰাইকাৰসকলৰ কেইবাটাও তীক্ষ্ণ শ্বটক অতি নিপুণতাৰে মাৰ্টিনাজে ৰক্ষা কৰি আৰ্জেন্টিনাক অতি শোচনীয় পৰাজয়ৰ পৰা ৰক্ষা কৰিলে। মাৰ্টিনাজৰ এই দুৰ্দান্ত প্ৰদৰ্শনৰ সুবাদতে মেচখনৰ স্ক’ৰ ১-০ৰ ব্যৱধানতে সীমিত থাকিল।
একেৰাহে দ্বিতীয়বাৰলৈ এমবাপেলৈ গোল্ডেন বুটৰ সন্মান
চলিত ফিফা বিশ্বকাপত এমবাপেক পিছ পেলাই শীৰ্ষস্থানত আৰোহণ কৰিবলৈ মেছিক প্ৰয়োজন আছিল অতি কমেও দুটা গ’ল আৰু এটা এছিষ্টৰ। কিন্তু কাৰ্যত সেয়াই হৈ নুঠিল।১০ টা গল আৰু ৪টা এছিষ্টেৰে শীৰ্ষত আছে ফ্ৰান্সৰ তাৰকা ষ্ট্ৰাইকাৰ এমবাপে। ইয়াৰ বিপৰীতে সমসংখ্যক এছিষ্ট আৰু ৮টা গ’লেৰে দ্বিতীয় স্থানতেই ক্ষান্ত থাকিল লিয়নেল মেছি। কাটাৰত অনুষ্ঠিত ২০২২ৰ ফিফা বিশ্বকাপতো ৮টা গ’লেৰে এমবাপেই লাভ কৰিছিল গোল্ডেন বুটৰ সন্মান। একেদৰে ৭টা গ’লেৰে দ্বিতীয় স্থানত আছিল মেছি। পুৰুষৰ ফিফা বিশ্বকাপত একেৰাহে দুবাৰকৈ গোল্ডেন বুট বিজয়ী একমাত্ৰ খেলুৱৈজনেই হৈছে এমবাপে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
