তেলেংগানাৰ মুখ্যমন্ত্ৰী ৰেৱন্ত ৰেড্ডীৰ এটা মন্তব্যক কেন্দ্ৰ কৰি দেশজুৰি ৰাজনৈতিক বিতৰ্কৰ সৃষ্টি হৈছে। সোমবাৰে সংবাদ মাধ্যমৰ এক অনুষ্ঠানত ৰেড্ডীয়ে উত্তৰ আৰু দক্ষিণ ভাৰতৰ ধৰ্মীয় তথা ৰাজনৈতিক পৰিচয়ৰ মাজত পাৰ্থক্যৰ কথা উল্লেখ কৰে। তেওঁৰ মন্তব্যক লৈ বিজেপিয়ে তীব্ৰ প্ৰতিক্ৰিয়া প্ৰকাশ কৰিছে। অনুষ্ঠানটোত ৰেৱন্ত ৰেড্ডীয়ে বিজেপিয়ে সঘনাই ব্যৱহাৰ কৰা ‘জয় শ্ৰী ৰাম’ ধ্বনিৰ প্ৰসংগ উত্থাপন কৰে। তেওঁ প্ৰশ্ন কৰে যে প্ৰধানমন্ত্ৰী নৰেন্দ্ৰ মোদী আৰু বিজেপিৰ নেতাসকলে ‘হৰ হৰ মহাদেৱ’ ধ্বনি একেদৰে কিয় নিদিয়ে।
ৰেৱন্ত ৰেড্ডীয়ে কয়, ‘আমি দ্ৰাবিড়, তেওঁলোক আৰ্য। আমি ভগৱান শিৱৰ ভক্ত, আনহাতে তেওঁলোক ভগৱান ৰামৰ ভক্ত।’ ইয়াৰ লগতে তেওঁ ভগৱান শিৱক দুখীয়া লোকৰ দেৱতা আৰু ভগৱান ৰামক ধনী লোকৰ দেৱতা বুলি অভিহিত কৰে। অৱশ্যে তেওঁ দুয়োগৰাকী দেৱতাকে মানুহে পূজা কৰে বুলিও উল্লেখ কৰে। ৰেড্ডীৰ মতে, উত্তৰ আৰু দক্ষিণ ভাৰতৰ ৰাজনৈতিক সংস্কৃতিৰ মাজত যথেষ্ট পাৰ্থক্য আছে। এই পাৰ্থক্যৰ কথাকে তেওঁ নিজৰ মন্তব্যৰ জৰিয়তে উত্থাপন কৰে।
অনুষ্ঠানটোত ৰেৱন্ত ৰেড্ডীয়ে লোকসভাৰ সমষ্টি পুনৰ নিৰ্ধাৰণ বা ‘ডিলিমিটেশ্যন’ প্ৰক্ৰিয়াক লৈও উদ্বেগ প্ৰকাশ কৰে। তেওঁৰ যুক্তি হৈছে, ভৱিষ্যতে জনসংখ্যাৰ ভিত্তিত লোকসভাৰ আসনৰ সংখ্যা বৃদ্ধি পালে দক্ষিণ ভাৰতৰ ৰাজ্যসমূহৰ ৰাজনৈতিক গুৰুত্ব আৰু প্ৰতিনিধিত্বৰ ওপৰত ইয়াৰ প্ৰভাৱ পৰিব পাৰে।
ৰেৱন্ত ৰেড্ডীৰ মন্তব্যৰ পাছতে বিজেপিয়ে তীব্ৰ প্ৰতিক্ৰিয়া প্ৰকাশ কৰে। কেন্দ্ৰীয় মন্ত্ৰী তথা বিজেপি নেতা বন্দী সঞ্জয় কুমাৰে ৰেড্ডীৰ মন্তব্যক সমালোচনা কৰি কয় যে ভগৱান ৰাম আৰু ভগৱান শিৱক ৰাজনৈতিকভাৱে পৃথক কৰাৰ চেষ্টা কৰা হৈছে। সঞ্জয় কুমাৰে প্ৰধানমন্ত্ৰী নৰেন্দ্ৰ মোদীৰ কাশী বিশ্বনাথ মন্দিৰৰ সৈতে থকা সম্পৰ্কৰ কথা উল্লেখ কৰে। লগতে তেওঁ মোদীয়ে তেলেংগানাৰ ৱেমুলাৱাড়া ভ্ৰমণ কৰাৰ কথাও উল্লেখ কৰি ৰেৱন্ত ৰেড্ডীৰ এই দাবী খণ্ডন কৰে যে বিজেপিৰ নেতাসকলে ভগৱান শিৱৰ নাম নলয়। বিজেপি নেতাগৰাকীয়ে অভিযোগ কৰে যে কংগ্ৰেছে ৰাজনৈতিক সমৰ্থন সংগ্ৰহৰ বাবে ধৰ্মীয় আৰু আঞ্চলিক পৰিচয়ক ব্যৱহাৰ কৰিছে। তেওঁৰ মতে, হিন্দু পৰম্পৰাক উত্তৰ-দক্ষিণ বা ধনী-দুখীয়া আদি ভাগত বিভক্ত কৰা উচিত নহয়। তেওঁ লগতে কয় যে তেলেংগানাতেই ৱেমুলাৱাড়াৰ ‘দক্ষিণ কাশী’ আৰু ভদ্ৰাচলমৰ ‘দক্ষিণ অযোধ্যা’ অৱস্থিত। সেয়ে ৰেৱন্ত ৰেড্ডীয়ে ভগৱান ৰাম আৰু ভগৱান শিৱক উত্তৰ আৰু দক্ষিণ ভাৰতৰ মাজত ভাগ কৰাৰ চেষ্টা কৰা উচিত নহয় বুলি বিজেপি নেতাগৰাকীয়ে মন্তব্য কৰে। ৰেৱন্ত ৰেড্ডীৰ মন্তব্য আৰু তাৰ প্ৰতিক্ৰিয়াই ইতিমধ্যে তেলেংগানাৰ ৰাজনীতিত নতুন বিতৰ্কৰ সূচনা কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
