গান্ধী জয়ন্তীৰ দিনাই তামিলনাডুৰ মহিলাসকলৰ বাবে এক বিশেষ আঁচনিৰ সম্প্ৰসাৰণ কৰিলে মুখ্যমন্ত্ৰী চি জোচেফ বিজয়ে। চেন্নাইত মহিলাসকলৰ বাবে বিনামূলীয়া বাছ যাত্ৰাৰ সম্প্ৰসাৰিত আঁচনি ‘ভেত্ৰী পয়নম’ৰ শুভাৰম্ভ কৰে মুখ্যমন্ত্ৰীগৰাকীয়ে। আঁচনিৰ শুভাৰম্ভ অনুষ্ঠানত মুখ্যমন্ত্ৰী বিজয়ে নিজেই এখন চৰকাৰী বাছত উঠি মহিলাসকলৰ সৈতে যাত্ৰী হিচাপে যাত্ৰা কৰে। কেৱল যাত্ৰী হিচাপেই নহয়, তেওঁ কিছু সময়ৰ বাবে কণ্ডাক্টৰৰ ভূমিকাও পালন কৰে। বাছত থকা মহিলা যাত্ৰীসকলক নিজ হাতে ‘শূন্য টিকট’ প্ৰদান কৰে মুখ্যমন্ত্ৰীগৰাকীয়ে। টিকট লোৱাৰ সময়ত মহিলা যাত্ৰীসকলৰ মাজতো যথেষ্ট উৎসাহ দেখা যায়। কেইবাগৰাকীও মহিলাই মুখ্যমন্ত্ৰী বিজয়ক চকলেট দি শুভেচ্ছা জনায়।
কি সুবিধা থাকিব এই আঁচনিত?
‘ভেত্ৰী পয়নম’ আঁচনিৰ সম্প্ৰসাৰণৰ ফলত এতিয়াৰে পৰা মহিলা আৰু কিন্নৰ যাত্ৰীসকলে কেৱল সাধাৰণ চিটি বাছতেই নহয়, বিভিন্ন শ্ৰেণীৰ চৰকাৰী বাছতো বিনামূলীয়াকৈ যাত্ৰা কৰিব পাৰিব। ইয়াৰ ভিতৰত এক্সপ্ৰেছ, ডিলাক্স, লিমিটেড ষ্টপ, দূৰৱৰ্তী পাহাৰীয়া অঞ্চললৈ চলাচল কৰা বাছ আৰু আন্তঃজিলা বা মফচিল বাছ অন্তৰ্ভুক্ত কৰা হৈছে।
এই আঁচনিৰ অধীনত মহিলা যাত্ৰীসকলৰ বাবে কোনো আয়ৰ সীমা ৰখা হোৱা নাই। অৰ্থাৎ আয় বা আৰ্থিক অৱস্থা নিৰ্বিশেষে ৰাজ্যৰ সকলো শ্ৰেণীৰ মহিলাই এই সুবিধা লাভ কৰিব পাৰিব। আনহাতে, এগৰাকী মহিলা যাত্ৰীয়ে এদিনত কিমানবাৰ বাছত উঠিব পাৰিব তাৰ কোনো সীমা নিৰ্ধাৰণ কৰা হোৱা নাই। অৰ্থাৎ প্ৰয়োজন অনুসৰি এগৰাকী মহিলাই এদিনত যিমানবাৰ ইচ্ছা সিমানবাৰ বিনামূলীয়াকৈ চৰকাৰী বাছত যাত্ৰা কৰিব পাৰিব।
কিমান মহিলা উপকৃত হ’ব?
তামিলনাডু চৰকাৰৰ এই সম্প্ৰসাৰিত আঁচনিৰ জৰিয়তে প্ৰতিদিনে ৰাজ্যখনৰ ৮৪ লাখতকৈ অধিক মহিলা উপকৃত হোৱাৰ সম্ভাৱনা আছে। ৰাজ্যৰ সাতটা চৰকাৰী পৰিবহণ নিগমৰ মুঠ ১২,৬৯২খন বাছ এই আঁচনিৰ আওতালৈ অনা হৈছে। ফলত চহৰৰ লগতে দূৰৱৰ্তী অঞ্চলৰ মহিলাসকলেও বিনামূলীয়া বাছ যাত্ৰাৰ সুবিধা লাভ কৰিব পাৰিব। ‘ভেত্ৰী পয়নম’ নামটোৰ অৰ্থ হৈছে ‘বিজয়ী যাত্ৰা’। শাসকীয় দল তামিলাগা ভেত্ৰী কাঝাগামৰ নামৰ পৰাও এই নামটো অনুপ্ৰাণিত হৈছে। মহিলাসকলৰ দৈনন্দিন যাতায়াতৰ খৰচ হ্ৰাস কৰাৰ লগতে তেওঁলোকৰ যাতায়াত অধিক সহজ কৰি তোলাৰ লক্ষ্যৰে এই আঁচনিৰ সম্প্ৰসাৰণ কৰা হৈছে বুলি চৰকাৰৰ ফালৰ পৰা জনোৱা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
