অসম লাইভ২৪ঃ ‘মোক তোমালোকে আৰু দেখা নাপাবা। সিঁহতে মোক এতিয়া মাৰি পেলাব। মোলৈ আৰু ফোন নকৰিবা, মই যাবলৈ সাজু হলো।’ মৃত্যুৰ পূৰ্বে পত্নীলৈ শেষ ফোনকল বাবুলৰ। এক শিহৰণকাৰী ঘটনা। এটা ফোনকল শুনিলে আপোনাৰো গাৰ নোম শিয়ৰি উঠিব। গহপুৰৰ বাবুলৰ ঘৰত কান্দোনৰ ৰোল। কিয়নো চিৰনিদ্ৰাত শুই পৰিল ঘৰখনৰ একমাত্ৰ পুত্ৰ। কোনো হিংস্ৰ মানৱে কাঢ়ি নিলে যুৱকজনৰ প্ৰাণ। বহিঃৰাজ্যত কৰ্ম সংস্থাপনৰ বাবে গৈ প্ৰাণ হেৰুৱালে গহপুৰৰ বাবুল বৰাই। মাতৃৰ চিকিত্সাৰ বাবে ঘৰলৈ অহা বাবুলৰ প্ৰাণ কাঢ়ি নিলে এদল নৃশংস দানৱে।
ট্ৰেইনতে সংঘটিত হৈছিল এক শিহৰণকাৰী হত্যাকাণ্ড। মৃত্যুৰ পূৰ্বে বাবুলে পত্নীলৈ কৰিছিল শেষৰটো ফোনকল। সেই ফোনকলত পত্নীক কি কৈছিল বাবুলে? ফোনকলৰ মতে, কিষাণগঞ্জ ষ্টেচনত অচিনাক্ত দুৰ্বৃত্তই যুৱক জনৰ ওচৰতে যাত্ৰা কৰা দুজন যাত্ৰীক হত্যা কৰে। সেই ঘটনা গহপুৰৰ যুৱক জনে প্ৰত্যক্ষ কৰাৰ পাছতেই বাবুল বৰুৱাকো মাৰিবলৈ উদ্যত হয় দুৰ্বৃত্তৰ দলে। আৰু ইয়াৰ পাছতেই মৃত্যুৰ আগমূহূৰ্তত সম্পূৰ্ণ ঘটনা ফোনযোগে পত্নীক অৱগত কৰে বাবুলে।
সন্মুখত মৃত্যু, ঘৰত ৰুগীয়া মাতৃ আৰু পত্নীৰ কোলাত এজনী কণমানি সন্তান। বাহিৰলৈ গৈ দুপইচা অৰ্জন কৰি , মাতৃৰ অসুখ ভাল কৰিম বুলি ভবা বাবুলৰ সপোন সপোন হৈয়ে ৰ’ল। মৃত্যুৰ পূৰ্বে পত্নীলৈ শেষ আহ্বান বাবুলৰ, ‘ছোৱালীক ডাঙৰ মানুহ কৰিবা। তোমালোক ভালে থাকিবা। মাক চাবা।’
আজি ঘৰখনত কান্দোনৰ ৰোল। স্বামী আহিব আহিব বুলি ৰৈ থকা পত্নীৰ সন্মুখত স্বামীৰ নিঠৰ দেহ। অসহায় পত্নী। কিন্তু কেনেকৈ এই ঘটনা সংঘটিত হ’ল? যুৱকজনক কোনে কিয় হত্যা কৰিলে তাৰ কোনো সম্ভেদ পোৱা নাই। এতিয়া সমগ্ৰ বিষয়ত মুখ্যমন্ত্ৰীৰ হস্তক্ষেপ বিচাৰিছে ভুক্তভোগী পৰিয়ালে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ