আকৌ অনলাইন গেমতেই মৃত্যুফান্দ৷ এযুগৰ পূৰ্বে আত্মপ্ৰকাশ কৰা ৰাছিয়াৰ ব্লু হোৱেলে প্ৰাণ কাঢ়িছিল বহু কিশোৰ কিশোৰীৰ৷ এইবাৰ গাজিয়াবাদৰ তিনি ভনীয়েকে একেলগে নিজকে শেষ কৰিলে কোৰিয়ান লাভ গেমৰ নামত৷ টাস্ক শেষৰ নিচাত মত্ত হৈ পৰিছিল তিনি কিশোৰী৷ আৰু সেই খেলৰ নামতেই জীৱন শেষ হ’ল তিনি যুৱতীৰ৷
কিন্তু জানেনে কি এই লাভ গেম? কেনেকৈ খেলিব লাগে এই খেলা? জনা গৈছে এয়া এটা অনলাইন কোৰিয়ান গেম৷ সম্ভৱত ইয়াত অংশগ্ৰহণকাৰীসকলক মুঠ ৫০ টা টাস্ক দিয়া হয়৷ এটা টাস্ক শেষ কৰাৰ পাছতহে পৰবৰ্তী নিৰ্দেশ আহে৷ আৰু এই টাস্ক যিকোনো মূল্যৰ বিনিময়ত শেষ কৰিব লাগে অংশগ্ৰহণকাৰীয়ে৷ এইক্ষেত্ৰতো ঠিক সেয়াই হৈছিল৷ এটাৰ পাছত আনটো টাস্ক শেষ কৰি ৫০ নম্বৰত উপনীত হৈছিল তিনিগৰাকী ভনীয়েক৷ ধাৰণা কৰা হৈছে ৫০ নম্বৰ টাস্কতেই আছিল আত্মহত্যা৷ সেয়া পূৰণ কৰিবলৈকে ১০ তলাৰ পৰা একেবাৰতে জাপ দিয়ে তিনিগৰাকী ভনীয়েকে৷
কভিড কালত এই প্ৰাণঘাতী গেমৰ প্ৰতি আসক্তি বাঢ়িছিল তিনিওগৰাকীৰ৷ পঢ়াশুনাত তিনিও বৰ বিশেষ ভাল নাছিল৷ কৰ’নাৰ পৰবৰ্তীকালত স্কুলো বাদ দিয়ে তিনিগৰাকীয়ে৷ দিনে নিশাই গেম খেলিয়েই সময় কটায়৷ পিতৃ-মাতৃয়ে একাধিকবাৰ এই বিষয়ক লৈ সতৰ্কও কৰিছিল৷ কিন্তু কোনো লাভ নহ’ল৷ সৰ্বদা মোবাইলতেই মুখ গুজি থাকিছিল তিনিও৷ কোৰিয়ান গেমেই সকলো আছিল তিনিওৰে৷ মৃতকৰ পিতৃয়ে লাভ কৰিছে ৩ কন্যাই লিখি যোৱা চুইছাইড নোটো৷ তাত লিখা আছে, ‘দেউতা আমি কোৰিয়ান গেম এৰিব নোৱাৰিম৷ কোৰিয়ান গেমেই আমাৰ সকলো৷ তোমালোকে আমাক তাৰ পৰা আঁতৰাই আনিব নোৱাৰিবা৷ আমি আমাৰ জীৱন শেষ কৰিছো৷’ কিন্তু এই গেম কি আছিল সেয়া এতিয়াও নিশ্চিত নহয়৷ মৃতকসকল কোৰিয়ান কালচাৰৰ প্ৰতি আসক্ত আছিল সেয়া স্পষ্ট৷
গেম যে প্ৰাণঘাতী হ’ব পাৰে সেয়া পূৰ্বেও দেখিছে বিশ্বই৷ কেতিয়াবা মম চেলেঞ্জ, কেতিয়াবা ব্লু হোৱেল, কেতিয়াবা আকৌ লেথাল কোম্পানি, ছেজো ফাইট২, জম্বি কিলাৰৰ দৰে গেমে প্ৰাণ কাঢ়িছে৷ বহু কিশোৰ-কিশোৰীয়ে গেমৰ টাৰ্গেট মানি আত্মহত্যা কৰিছে৷ কোনো ক্ষেত্ৰত দেখা গৈছে গেমক লৈ প্ৰৱল মানসিক চাপৰ পৰা চৰম ঘটনা ঘটাইছে বহু যুৱক-যুৱতীয়ে৷ সেয়ে আৰক্ষী প্ৰশাসনৰ পৰামৰ্শ সন্তানসকলক এই ধৰণৰ গেমৰ পৰা দূৰৈত ৰাখিব লাগিব৷ প্ৰয়োজনত চিকিৎসকৰ সৈতে যোগাযোগ কৰিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
