বছৰি মাত্ৰ ২০ টকাৰে পাব ২ লাখ টকাৰ বীমা

কেন্দ্ৰীয় চৰকাৰৰ এনে এখন আঁচনি আছে, যাৰ জৰিয়তে অতি কম প্ৰিমিয়ামত পৰিয়াললৈ দুৰ্ঘটনাজনিত আৰ্থিক সুৰক্ষা লাভ কৰিব পাৰি। এই আঁচনিখনৰ নাম হৈছে প্ৰধানমন্ত্ৰী সুৰক্ষা বীমা যোজনা (PMSBY)। এই আঁচনিৰ বাৰ্ষিক প্ৰিমিয়াম মাত্ৰ ২০ টকা। অৰ্থাৎ মাহে হিচাপ কৰিলে ২ টকাতকৈও কম। এই সামান্য পৰিমাণৰ প্ৰিমিয়ামৰ বিনিময়ত যোগ্য ব্যক্তিয়ে ২ লাখ টকা পৰ্যন্ত দুৰ্ঘটনা বীমা কভাৰ লাভ কৰিব পাৰে। আঁচনিখনৰ আন এটা উল্লেখযোগ্য দিশ হৈছে—ইয়াৰ বাবে কোনো চিকিৎসা পৰীক্ষা কৰোৱাৰ প্ৰয়োজন নাই। লগতে বীমা এজেণ্টৰ ওচৰলৈ গৈ আবেদন কৰাৰো প্ৰয়োজন নাই।

কোনে PMSBY আঁচনিৰ সুবিধা ল’ব পাৰে?

১৮ বছৰৰ পৰা ৭০ বছৰ বয়সৰ ভিতৰৰ ভাৰতীয় নাগৰিকে এই আঁচনিৰ সুবিধা ল’ব পাৰে। ভাৰতত থকা যোগ্য ব্যক্তিৰ লগতে প্ৰবাসী ভাৰতীয় নাগৰিকেও নিৰ্ধাৰিত চৰ্ত পূৰণ কৰিলে এই আঁচনিত যোগদান কৰিব পাৰে। ইয়াৰ বাবে নিজৰ নামত এটা সঞ্চয় বেংক একাউণ্ট থাকিব লাগিব। বেংক একাউণ্টৰ জৰিয়তে পোনপটীয়াকৈ আঁচনিখনত নাম অন্তৰ্ভুক্ত কৰিব পাৰি। এজন ব্যক্তিয়ে কেৱল এটা বেংক একাউণ্টৰ জৰিয়তেহে PMSBY-ৰ সুবিধা ল’ব পাৰে। একাধিক একাউণ্ট থাকিলেও একাধিকবাৰ এই বীমা ল’ব নোৱাৰি।

কেনেকৈ প্ৰিমিয়াম কৰ্তন হয়?

PMSBY-ত যোগদান কৰাৰ সময়ত একাউণ্টৰ পৰা প্ৰিমিয়াম স্বয়ংক্ৰিয়ভাৱে কৰ্তন কৰাৰ বাবে অনুমতি দিব লাগে। তাৰ পিছত প্ৰতি বছৰে নিৰ্ধাৰিত সময়ত বেংক একাউণ্টৰ পৰা ২০ টকা কৰ্তন কৰি বীমা নবীকৰণ কৰা হয়। কোনোবাই বছৰৰ মাজভাগত আঁচনিখনত যোগদান কৰিলে, নিৰ্ধাৰিত প্ৰিমিয়াম কৰ্তন হোৱাৰ পিছত বীমাৰ কভাৰ আৰম্ভ হয়।

দুৰ্ঘটনাত মৃ*ত্যু হ’লে ২ লাখ টকাৰ কভাৰ

PMSBY মূলতঃ এটা ব্যক্তিগত দুৰ্ঘটনা বীমা আঁচনি। দুৰ্ঘটনাৰ ফলত বীমাকৃত ব্যক্তিৰ মৃ*ত্যু হ’লে মনোনীত ব্যক্তি বা আইনী উত্তৰাধিকাৰীয়ে ২ লাখ টকাৰ বীমা দাবী লাভ কৰিব পাৰে। পথ দুৰ্ঘটনা, ৰেল দুৰ্ঘটনা, ডুব যোৱা, বানপানী, ভূমিকম্পৰ দৰে বিভিন্ন আকস্মিক ঘটনাৰ ফলত মৃ*ত্যু ঘটিলে আঁচনিৰ নিয়ম অনুসৰি দাবী কৰিব পৰা যায়। অপৰাধমূলক ঘটনাত হ*ত্যা হ’লেও নিৰ্ধাৰিত নিয়ম আৰু প্ৰমাণৰ ভিত্তিত দাবী কৰিব পাৰি। চিকিৎসালয়ৰ খৰচ এই আঁচনিত নাথাকে বহু লোকৰ ধাৰণা থাকে যে PMSBY-ৰ অধীনত দুৰ্ঘটনাৰ পিছত চিকিৎসালয়ৰ খৰচো বহন কৰা হয়। কিন্তু সেয়া নহয়। এই আঁচনিখন মেডিকেল বা হেল্থ ইঞ্চুৰেন্স নহয়, বৰং ব্যক্তিগত দুৰ্ঘটনা বীমা। সেয়েহে চিকিৎসালয়ত ভৰ্তি হোৱা, ঔষধ ক্ৰয় কৰা বা চিকিৎসাৰ অন্যান্য খৰচ এই আঁচনিৰ অধীনত সাধাৰণতে পৰিশোধ কৰা নহয়। দুৰ্ঘটনাৰ ফলত মৃ*ত্যু হ’লে নিৰ্ধাৰিত বীমাৰ ধন মনোনীত ব্যক্তি বা আইনী উত্তৰাধিকাৰীক প্ৰদান কৰা হয়। আনহাতে, দুৰ্ঘটনাৰ ফলত নিৰ্ধাৰিত ধৰণৰ স্থায়ী অক্ষমতা হ’লে নিয়ম অনুসৰি বীমাকৃত ব্যক্তিয়ে বীমাৰ ধন লাভ কৰিব পাৰে।

দাবী কৰাৰ সময়ত কি কি নথি লাগে?

দুৰ্ঘটনাৰ ধৰণ অনুসৰি দাবীৰ সময়ত বিভিন্ন নথি-পত্ৰৰ প্ৰয়োজন হ’ব পাৰে। পথ দুৰ্ঘটনা, ৰেল দুৰ্ঘটনা, বাহন দুৰ্ঘটনা, ডুব যোৱা বা হ*ত্যাৰ দৰে ঘটনাৰ ক্ষেত্ৰত আৰক্ষীৰ FIR, পঞ্চনামা বা সংশ্লিষ্ট চৰকাৰী প্ৰতিবেদন গুৰুত্বপূৰ্ণ নথি হিচাপে প্ৰয়োজন হ’ব পাৰে। আনহাতে, গছৰ পৰা পৰি আঘাত পোৱা বা বিষাক্ত সাপে কামোৰাৰ দৰে ঘটনাৰ ক্ষেত্ৰত পৰিস্থিতি অনুসৰি চিকিৎসালয়ৰ জৰুৰীকালীন চিকিৎসাৰ ৰেকৰ্ড আৰু চিকিৎসকৰ প্ৰমাণ-পত্ৰৰ জৰিয়তে দাবী প্ৰক্ৰিয়া আগবঢ়াব পৰা যায়।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ