‘লোকলৈ হুল পুতি নিজে মৰে ফুটি’ উপায়বিহীন আমেৰিকাৰ ৰাষ্ট্ৰপতি ট্ৰাম্প!

আমেৰিকাৰ পৰা অহা এক গুৰুত্বপূৰ্ণ খবৰে ৰাছিয়া আৰু ভাৰত দুয়োখন দেশৰ বাবে নতুন সুযোগৰ সৃষ্টি কৰিছে। ৰাছিয়াৰ বিৰুদ্ধে আৰোপ কৰা কিছুমান নিষেধাজ্ঞা আৰু অতিৰিক্ত শুল্কৰ ব্যৱস্থা সাময়িকভাৱে শিথিল কৰাৰ সিদ্ধান্ত লৈছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। ৰাছিয়াৰ ওপৰত অৰ্থনৈতিক হেঁচা বৃদ্ধি কৰাৰ উদ্দেশ্যে নতুন আইনত স্বাক্ষৰ কৰাৰ মাত্ৰ কেইসপ্তাহমানৰ পিছতে আমেৰিকাই এই সিদ্ধান্ত গ্ৰহণ কৰিছে। ইউক্ৰেইনৰ ওপৰত ৰাছিয়াৰ আক্ৰমণৰ প্ৰতিক্ৰিয়া হিচাপে মস্কোৰ ওপৰত অৰ্থনৈতিক হেঁচা বৃদ্ধি কৰাই আছিল এই আইনখনৰ মূল উদ্দেশ্য। কিন্তু এতিয়া ট্ৰাম্প প্ৰশাসনে নিজৰ স্থিতি কিছু সলনি কৰিছে। ইয়াৰ আঁৰত আমেৰিকাত বৃদ্ধি পোৱা ইন্ধনৰ মূল্য আৰু আগন্তুক মধ্যকালীন নিৰ্বাচনক অন্যতম কাৰণ হিচাপে বিবেচনা কৰা হৈছে।

আমেৰিকাত ইন্ধনৰ মূল্যবৃদ্ধিৰ বাবে এই সিদ্ধান্ত?

শেহতীয়াকৈ আমেৰিকাত ডিজেলৰ মূল্য বৃদ্ধি পোৱাৰ ফলত চৰকাৰৰ ওপৰত দাম নিয়ন্ত্ৰণৰ হেঁচা বৃদ্ধি পাইছে। ইন্ধনৰ মূল্যবৃদ্ধিয়ে সাধাৰণ জনতাৰ লগতে ব্যৱসায়-বাণিজ্যতো প্ৰভাৱ পেলায়। সেয়েহে ইন্ধনৰ যোগান স্বাভাৱিক ৰখা আৰু মূল্য নিয়ন্ত্ৰণ কৰাটো ট্ৰাম্প প্ৰশাসনৰ বাবে গুৰুত্বপূৰ্ণ হৈ পৰিছে। ইয়াৰ উপৰি, ২০২৬ চনৰ নৱেম্বৰত অনুষ্ঠিত হ’বলগীয়া মধ্যকালীন নিৰ্বাচনৰ পূৰ্বে ইন্ধনৰ মূল্য নিয়ন্ত্ৰণত ৰখাটোও চৰকাৰৰ বাবে এক ডাঙৰ প্ৰত্যাহ্বান। বিশেষজ্ঞসকলৰ মতে, এই পৰিস্থিতিয়ে ভাৰতৰ বাবেও কূটনৈতিক আৰু অৰ্থনৈতিক সুযোগ সৃষ্টি কৰিব পাৰে।

১০০ % অতিৰিক্ত শুল্কৰ ভাবুকিৰ পৰা সকাহ পাব ভাৰতে!

ৰাছিয়াৰ পৰা খাৰুৱা তেল ক্ৰয় কৰা দেশসমূহৰ ওপৰত ১০০ শতাংশ পৰ্যন্ত অতিৰিক্ত শুল্ক আৰোপ কৰাৰ ক্ষমতা আমেৰিকাৰ ৰাষ্ট্ৰপতিক প্ৰদান কৰা হৈছে। এই ব্যৱস্থাৰ লক্ষ্য হৈছে ৰাছিয়াৰ তেল আৰু গেছৰ পৰা হোৱা উপাৰ্জন হ্ৰাস কৰি দেশখনৰ ওপৰত অৰ্থনৈতিক হেঁচা বৃদ্ধি কৰা। কিন্তু ট্ৰাম্পৰ শেহতীয়া সিদ্ধান্তৰ ফলত এই আইনখনৰ অধীনত থকা কিছুমান ব্যৱস্থা সাময়িকভাৱে শিথিল কৰা হৈছে। ইয়াৰ ফলত ৰাছিয়াৰ পৰা বৃহৎ পৰিমাণৰ খাৰুৱা তেল ক্ৰয় কৰা ভাৰতেও কিছু সকাহ পাব পাৰে।
ভাৰতৰ বাবে এই সিদ্ধান্ত বিশেষভাৱে গুৰুত্বপূৰ্ণ। কাৰণ, ৰাছিয়া ভাৰতৰ অন্যতম প্ৰধান খাৰুৱা তেলৰ যোগানদাতা। ৰাছিয়াৰ পৰা তেল ক্ৰয়ৰ ক্ষেত্ৰত অতিৰিক্ত শুল্কৰ আশংকা হ্ৰাস পালে ভাৰতৰ শক্তিৰ যোগান আৰু অৰ্থনৈতিক স্বাৰ্থ সুৰক্ষিত ৰখাত সহায় হ’ব পাৰে।
অৱশ্যে, এই সিদ্ধান্তক ভাৰতৰ বাবে বিশেষভাৱে প্ৰদান কৰা কোনো ৰেহাই বুলি ক’ব নোৱাৰি। বৰঞ্চ নতুন আইনখনৰ কিছুমান ব্যৱস্থা সাময়িকভাৱে শিথিল কৰাৰ ফলত ভাৰতেও পৰোক্ষভাৱে লাভৱান হোৱাৰ সম্ভাৱনা আছে।

কিয় স্থিতি সলনি কৰিলে আমেৰিকাই?

কেইসপ্তাহমান পূৰ্বে ট্ৰাম্পে ২০২৬ চনৰ লিণ্ডচে অ’ গ্ৰেহাম ৰাছিয়া আৰু ইৰাণ নিষেধাজ্ঞা আইনত স্বাক্ষৰ কৰিছিল। এই আইনখনৰ জৰিয়তে ৰাছিয়াৰ পৰা বৃহৎ পৰিমাণৰ তেল বা গেছ ক্ৰয় কৰা দেশসমূহৰ ওপৰত ১০০ শতাংশ পৰ্যন্ত শুল্ক আৰোপ কৰাৰ ক্ষমতা আমেৰিকাৰ ৰাষ্ট্ৰপতিক দিয়া হৈছিল। কিন্তু এতিয়া একে প্ৰশাসনেই আইনখনৰ কিছুমান ব্যৱস্থা সাময়িকভাৱে শিথিল কৰিছে। ইয়াৰ ফলত ট্ৰাম্পৰ নীতিৰ ক্ষেত্ৰত এক পৰিৱৰ্তন দেখা গৈছে। বিশ্লেষকসকলৰ মতে, আমেৰিকাত ইন্ধনৰ মূল্যবৃদ্ধি, শক্তিৰ যোগানৰ অনিশ্চয়তা আৰু আগন্তুক নিৰ্বাচনৰ ৰাজনৈতিক প্ৰভাৱ এই সিদ্ধান্তৰ আঁৰত থাকিব পাৰে। বিশেষকৈ আমেৰিকা আৰু ইৰাণৰ মাজত উত্তেজনা বৃদ্ধি পালে বিশ্বৰ শক্তিৰ বজাৰত অনিশ্চয়তা বাঢ়িব পাৰে। এনে পৰিস্থিতিত ইন্ধনৰ যোগান স্বাভাৱিক ৰখাটো আমেৰিকাৰ বাবেও জৰুৰী।

ভাৰতৰ বাবে কি অৰ্থ বহন কৰে এই সিদ্ধান্তই?

ভাৰতৰ বাবে এই সিদ্ধান্তৰ আটাইতকৈ ডাঙৰ গুৰুত্ব হৈছে ৰাছিয়াৰ পৰা খাৰুৱা তেল ক্ৰয়ৰ ক্ষেত্ৰত থকা অতিৰিক্ত শুল্কৰ আশংকা কিছু হ্ৰাস পোৱাৰ সম্ভাৱনা। ইয়াৰ ফলত ভাৰতৰ শক্তিৰ যোগান অব্যাহত ৰখা আৰু তেল আমদানিৰ ব্যয় নিয়ন্ত্ৰণ কৰাত সহায় হ’ব পাৰে।
তদুপৰি, এই পৰিস্থিতিয়ে ভাৰতক ৰাছিয়া আৰু আমেৰিকা—দুয়োখন দেশৰ সৈতে নিজৰ অৰ্থনৈতিক আৰু কূটনৈতিক সম্পৰ্কৰ মাজত ভাৰসাম্য ৰক্ষা কৰাৰ সুযোগ দিব পাৰে। কিন্তু মন কৰিবলগীয়া যে নিষেধাজ্ঞা শিথিল কৰিলেই খাৰুৱা তেলৰ মূল্য নিশ্চিতভাৱে কমিব বুলি ক’ব নোৱাৰি। বিশ্বৰ বজাৰত তেলৰ চাহিদা, যোগান, ভূ-ৰাজনৈতিক উত্তেজনা আৰু অন্যান্য বাণিজ্যিক কাৰকে মূল্য নিৰ্ধাৰণত গুৰুত্বপূৰ্ণ ভূমিকা পালন কৰে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ