ভাৰত চৰকাৰৰ বিশেষ সিদ্ধান্ত, পথ দুৰ্ঘটনাত আহতৰ সমগ্ৰ দেশতে বিনামূলীয়া চিকিৎসা
ভৰাত চৰকাৰৰ বিশেষ সিদ্ধান্ত। এতিয়াৰ পৰা পথ দুৰ্ঘটনাত আহত লোকে দেশৰ যি কোনো ঠাইতে লাভ কৰিব বিনামূলীয়া চিকিৎসা। পথ পৰিবহণ আৰু ৰাষ্ট্ৰীয় ঘাইপথ মন্ত্ৰালয়ে জাৰি কৰা অধিসূচনা অনুসৰি এতিয়াৰ পৰা এই বিশেষ সুবিধা লাভ কৰিব দেশৰ সকলো প্ৰান্ততে।
সমগ্ৰ দেশতে নগদবিহীন চিকিৎসা আঁচনি ৰূপায়ণৰ বাবে ভাৰত চৰকাৰে এই অধিসূচনা জাৰি কৰিছে। ইয়াৰ অধীনত পথ দুৰ্ঘটনাত পতিত প্ৰতিগৰাকী লোকে সৰ্বাধিক ১.৫ লাখ টকা পৰ্যন্ত বিনামূলীয়া চিকিৎসা লাভ কৰিব পাৰিব। পথ পৰিবহণ আৰু ঘাইপথ মন্ত্ৰালয়ে জাৰি কৰা গেজেট অধিসূচনা অনুসৰি ২০২৫ চনৰ ৫ মে’ সোমবাৰৰ পৰা এই আঁচনি কাৰ্যকৰী হৈছে।
পথ পৰিবহণ আৰু ঘাইপথ মন্ত্ৰালয়ে জাৰি কৰা অধিসূচনা অনুসৰি যদি কোনো ব্যক্তি মটৰ গাড়ীৰ ফলত পথ দুৰ্ঘটনাত পতিত হয় তেন্তে এই আঁচনিৰ অধীনত দেশৰ যিকোনো প্ৰান্তত বিনামূলীয়া চিকিৎসা লাভ কৰিব ৷ দুৰ্ঘটনাগ্ৰস্তই চৰকাৰী বা চৰকাৰে ধৰি দিয়া নিৰ্দিষ্ট চিকিৎসালয়ত চিকিৎসাৰ বাবে কোনো ধৰণৰ ধন দিব নালাগিব।
এই আঁচনিৰ অধীনত দুৰ্ঘটনা সংঘটিত হোৱাৰ তাৰিখৰ পৰা অহা সাত দিনলৈ সৰ্বাধিক ১,৫০,০০০ টকা পৰ্যন্ত বিনামূলীয়া চিকিৎসা প্ৰদান কৰা হ’ব। এই সুবিধা কেৱল সেই চিকিৎসালয়সমূহতহে সম্পূৰ্ণৰূপে প্ৰযোজ্য হ’ব যিবোৰ চৰকাৰে “নিৰ্দিষ্ট” কৰিছে।
আঁচনিখনৰ ফলপ্ৰসূ নিৰীক্ষণৰ বাবে কেন্দ্ৰীয় চৰকাৰে এখন পৰিচালনা সমিতি (পৰ্যবেক্ষণ সমিতি)ও গঠন কৰিব। যাৰ ফলত পৰিকল্পনা সঠিকভাৱে পালন কৰা হৈছে নে নাই সেয়া নিশ্চিত হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
