অসম লাইভ২৪ঃ এটা সময় আছিল নতুন বছৰ বুলিলেই শুভেচ্ছা বাৰ্তা ল’বলৈ, দিবলৈ অপেক্ষা কৰিছিল এখন গ্ৰীটিংছ কাৰ্ডলৈ৷ এই অপেক্ষাৰ আঁৰত আছিল ক’ত কাতৰ উশাহ৷ কি লিখিব প্ৰিয়জনে? ডাকোৱালে কঢ়িয়াই অনা কাৰ্ডখন খুলি চোৱাৰ মাদকতা আছিল অনন্য৷ কি চহৰ, কি গাওঁ সকলোৱে গ্ৰীটিংছ কাৰ্ডৰ জৰিয়তেই পঠিয়াইছিল প্ৰিয়জনলৈ শুভেচ্ছা বাৰ্তা৷
বহুতেই আকৌ নিজৰ পছন্দমতে নিজ হাতে তৈয়াৰ কৰিছিল গ্ৰীটিংছ কাৰ্ড৷ নতুন বছৰ অহাৰ লগে লগে দোকানসমূহতো গ্ৰীটিংছ কাৰ্ড কিনিবলৈ ভিৰ কৰিছিল সকলো প্ৰজন্মৰ লোকেই৷ সেয়া আছিল এসময়ৰ কথা৷ এতিয়াৰ প্ৰজন্মৰ বাবে সাধু সাধু লগা কথাবোৰ, ৮০-৯০ ৰ দশকৰ ব্যক্তিৰ বাবে এখিনি হেৰাই নোযোৱা আৱেগ৷
সময় সলনি হৈছে৷ প্ৰযুক্তিৰ হাতত ধৰি আগবাঢ়িছে প্ৰজন্ম৷ সলনি হৈছে ভাৱ বিনিময়ৰ মাধ্যম৷ এতিয়া নতুন বছৰ বুলিলেই শুভেচ্ছা বাৰ্তা পাবলৈ, ডাকোৱালৰ জোলোঙাত কাৰ্ড এখন অহালৈ সেই অপেক্ষাৰ সময়খিনি আজিৰ প্ৰজন্মই মুঠেও নাজানে৷ বাৰ্তা আঙুলিৰ মূৰতেই চেকেণ্ডত কাষ পায় প্ৰিয়জনৰ৷ বিশ্বৰ এটা মূৰৰ পৰা আনটো মূৰলৈ বাৰ্তা যাবলৈ মাত্ৰ টাইপ কৰাৰ বিশেষ সময়খিনিয়েই৷ সামাজিক মাধ্যম ইউজাৰকাৰীৰ সংখ্যাও অস্বাভাৱিক হাৰত বৃদ্ধি হৈছে৷
মানুহৰ জীৱনযাত্ৰাৰ ধৰণতো আহিছে ব্যাপক পৰিবৰ্তন৷ পুৰাতন সময় সোঁৱৰণিতেই ভাললাগে বুলিয়েই বহুতে দাবী কৰে যদিও বৰ্তমানো কিন্তু গুৱাহাটী মহানগৰৰ একাংশ দোকানত নতুন বছৰ বুলিয়েই আঁৰি থোৱা হৈছে একাংশ গ্ৰীটিংছ কাৰ্ড৷ সেয়া প্ৰিয়জনৰ হাতত তুলি দিয়ে নে নিদিয়ে সেই সিদ্ধান্ত কিন্তু কেৱল আপোনাৰ…৷ তথাপিও ডিজিটেল যুগ হ’ল বুলিয়েই আপুনি শুভেচ্ছা নজনাব নেকি? গ্ৰীটিংছ কাৰ্ড নিদিলেও আপুনি ফোনযোগেই দিব পাৰে শুভেচ্ছা বাৰ্তা। শুভেচ্ছা বাৰ্তাত কি লিখিব জানি থওক কেইটামান কিটিপ।
হেপ্পী নিউ ইয়েৰৰ শুভেচ্ছাবাৰ্তা
পূৰ্ণতাৰ হওক নতুন বছৰটো। প্ৰতিটো দিনেই আনক সুখৰ খবৰ, কেৱল আপুনিয়েই নহয়, আপোনাৰ পৰিয়ালৰ সকলোৱেই ভালে থাকক। নতুন বছৰৰ শুভেচ্ছা।
পৰিয়াল আৰু প্ৰিয়জনক সামৰি শান্তিৰে পাৰ হওক ২০২৪ৰ প্ৰতিটো দিন। নতুন বছৰে আনক নতুন খবৰ। ভাল হওক আপোনাৰ প্ৰতিটো দিন। শুভেচ্ছা।
নৱবৰ্ষতেই আপোনাৰ জীৱনলৈ আহক সুখ, শান্তি আৰু সমৃদ্ধি। ২০২৩ৰ সকলো অপ্ৰাপ্তি পাহৰি আৰম্ভ কৰক নতুন দিনৰ। হেপ্পী নিউ ইয়েৰ ২০২৪।
২০২৪ চনত আপোনাৰ সমস্ত সপোনে পূৰ্ণতা লাভ কৰক। আনন্দৰে ভৰি পৰক নতুন বছৰ। হেপ্পী নিউ ইয়েৰ ২০২৪।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
