প্ৰতিজন মানুহেই আৰ্থিকভাৱে স্বচ্ছল হৈ থকাটো বিচাৰে। লগতে ভৱিষ্যতে যিকোনো সময়তে ধনৰ প্ৰয়োজন হ’লে অভাৱ নোহোৱাকৈ বা কাৰো ওচৰত হাত নপতাকৈ প্ৰয়োজনীয় ধন লাভ কৰাৰ ইচ্ছা সকলোৰে থাকে। কিন্তু বহুতে শ্বেয়াৰ বজাৰৰ উঠা-নমাৰ বাবে বিনিয়োগ কৰিবলৈ সংকোচ বোধ কৰে। যদি আপুনিও কম বিপদ লৈ দীৰ্ঘম্যাদীভাৱে ধন সঞ্চয় কৰিব বিচাৰে, তেন্তে পাব্লিক প্ৰভিডেণ্ট ফাণ্ড (PPF) আৰু ইকুইটি মিউচুৱেল ফাণ্ডৰ এক সুপৰিকল্পিত সংমিশ্ৰণৰ জৰিয়তে মাত্ৰ ২৪ বছৰৰ ভিতৰত ১ কোটি টকাৰো অধিক পুঁজি জমা কৰাটো সম্ভৱ।
প্ৰথম পদক্ষেপ: PPFত নিয়মীয়া সঞ্চয়
PPF হৈছে ভাৰত চৰকাৰৰ এক নিৰাপদ আৰু বিশ্বাসযোগ্য সঞ্চয় আঁচনি। ইয়াত শ্বেয়াৰ বজাৰৰ অস্থিৰতাৰ কোনো প্ৰভাৱ নাথাকে। বৰ্তমান এই আঁচনিত বছৰি ৭.১ শতাংশ হাৰত সুদ প্ৰদান কৰা হয়। লগতে পুৰণি কৰ ব্যৱস্থা (Old Tax Regime) বাছনি কৰা কৰদাতাই বছৰি সৰ্বাধিক ১.৫ লাখ টকা জমা কৰি আয়কৰ ৰেহাইৰ সুবিধাও লাভ কৰিব পাৰে। ধৰি লওক, কোনোবাই ২৫ বছৰ বয়সতে প্ৰতিমাহে ১২,৫০০ টকাকৈ PPFত জমা কৰিবলৈ আৰম্ভ কৰিলে। অৰ্থাৎ বছৰত মুঠ ১.৫ লাখ টকা বিনিয়োগ কৰা হ’ব। এইদৰে ১৫ বছৰ ধৰি নিয়মীয়াকৈ বিনিয়োগ কৰিলে মুঠ জমা হ’ব ২২,৫০,০০০ টকা। যদি সুদৰ হাৰ ৭.১ শতাংশ ধৰা হয়, তেন্তে ১৫ বছৰৰ অন্তত সুদ হিচাপে লাভ হ’ব প্ৰায় ১৮,১৮,২০৯ টকা। ফলত PPF একাউণ্টৰ মেচিউৰিটিৰ সময়ত মুঠ ৪০,৬৮,২০৯ টকা লাভ কৰিব। PPFৰ আন এটা বিশেষ সুবিধা হৈছে ইয়াৰ EEE (Exempt–Exempt–Exempt) মৰ্যাদা। অৰ্থাৎ জমা কৰা ধন, লাভ হোৱা সুদ আৰু মেচিউৰিটিৰ সময়ত লাভ কৰা সম্পূৰ্ণ ধনৰ ওপৰত কোনো ধৰণৰ কৰ আৰোপ কৰা নহয়।
দ্বিতীয় পদক্ষেপ: মিউচুৱেল ফাণ্ডত একেলগে বিনিয়োগ
PPFৰ মেচিউৰিটিৰ পিছত লাভ কৰা ৪০.৬৮ লাখ টকা খৰচ নকৰি যদি এটা ভাল ইকুইটি মিউচুৱেল ফাণ্ডত একেলগে বিনিয়োগ কৰা হয়, তেন্তে দীৰ্ঘম্যাদত অধিক ধন লাভ কৰাৰ সুযোগ থাকে। যদি বছৰি গড়ে ১২ শতাংশ ৰিটাৰ্ণ ধৰা হয়, তেন্তে এই ধন ৯ বছৰৰ ভিতৰত বৃদ্ধি পাই প্ৰায় ১,১০,৯২,৩১৫ টকা হ’ব পাৰে। অৰ্থাৎ মাত্ৰ ২৪ বছৰৰ ভিতৰত ১ কোটি টকাৰো অধিক পুঁজি লাভ কৰাটো সম্ভৱ।
যিকোনো সম্পদ সৃষ্টি নিয়মীয়া সঞ্চয়, ধৈৰ্য আৰু সঠিক বিনিয়োগ পৰিকল্পনাৰ ফল। কম বিপদৰ PPFত
দীৰ্ঘদিন ধৰি সঞ্চয় কৰি, তাৰ পিছত সেই ধন সুপৰিকল্পিতভাৱে মিউচুৱেল ফাণ্ডত বিনিয়োগ কৰিলে, সময়ৰ লগে লগে উল্লেখযোগ্য সম্পদ গঢ়ি তোলাটো সম্ভৱ। অৱশ্যে মিউচুৱেল ফাণ্ড বজাৰ-সংলগ্ন বিনিয়োগ হোৱাৰ বাবে ইয়াৰ ৰিটাৰ্ণ নিশ্চিত নহয়। সেয়েহে বিনিয়োগ কৰাৰ আগতে নিজৰ আৰ্থিক লক্ষ্য, বিপদ গ্ৰহণ কৰাৰ ক্ষমতা আৰু প্ৰয়োজন অনুসৰি বিত্তীয় পৰামৰ্শদাতাৰ মতামত লোৱাটো বাঞ্ছনীয়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
