নিজৰ পত্নীৰ বিৰুদ্ধে ৮৫ বছৰীয়া শাহুৱেকক হ*ত্যাৰ অভিযোগ তুলি আহমেদাবাদ ক্ৰাইম ব্ৰাঞ্চৰ কাষ চাপিছিল এজন লোক। কিন্তু নিজে পতা জালত যেন নিজেই পৰিল লোকজন। আৰক্ষীৰ জেৰাত অভিযোগ লৈ যোৱা লোকজনেই ২০২২ চনত সংঘটিত হোৱা তিনিটা হ*ত্যাকাণ্ডৰ সৈতে নিজেই জড়িত থকাৰ কথা স্বীকাৰ কৰে। সম্প্ৰতি আৰক্ষীৰ জিম্মাত থকা এই অভিযুক্তজনৰ নাম মাধৱ দাস।
অৱশ্যে প্ৰথমে তেওঁ কৰা অভিযোগৰ ভিত্তিত আৰক্ষীয়ে তদন্ত চলাইছিল । কিন্তু লোকজনে অভিযোগ কৰা হ*ত্যাকাণ্ডত তেওঁৰ পত্নী উৰ্মিলা আৰু খুলশালীয়েক দেৱানৰ জড়িত থকাৰ কোনো প্ৰমাণ লাভ কৰা নাছিল। এই ঘটনা সংঘটিত হৈছে গুজৰাটৰ চুৰাটত।
দৰাচলতে, অভিযুক্ত মাধৱ দাসে প্ৰথমে আৰক্ষীক অভিযোগ কৰিছিল যে উৰ্মিলা আৰু দেৱানে কেইবছৰমান পূৰ্বে কোছাম্বা জিলাৰ কাব্ৰিস্তান ফালিয়াৰ বাসিন্দা শান্তবেন গম্ভিৰভাই বাসৱক হ*ত্যা কৰিছিল। তেওঁ লগতে দাবী কৰিছিল যে হ*ত্যাৰ পিছত মৃ*তদেহটো ঘৰৰ ভিতৰত মজিয়াত পুতি থোৱা হৈছিল। এই তথ্য লাভ কৰাৰ পিছত ক্ৰাইম ব্ৰাঞ্চে দেৱানক কাৰ্যালয়লৈ মাতি আনি জেৰা কৰে। কিন্তু আৰক্ষীৰ সন্মুখত দেৱানে শান্তবেনৰ হ*ত্যাকাণ্ডৰ সৈতে নিজৰ কোনো সম্পৰ্ক নাই বুলি স্পষ্টভাৱে অস্বীকাৰ কৰে। ইয়াৰ পিছত তদন্তকাৰী বিষয়াই মাধৱ দাস আৰু দেৱান দুয়োকে পৃথকে পৃথকে আৰু দীঘলীয়া সময় ধৰি জেৰা কৰে। জেৰাৰ সময়তে মাধৱ দাসে দেৱানৰ নাম মিছাকৈ লোৱা বুলি স্বীকাৰ কৰে।
এচিপি (ক্ৰাইম ব্ৰাঞ্চ) ভাৰত পেটেলৰ মতে, দেৱানৰ বিৰুদ্ধে কোনো তথ্য বা প্ৰমাণ নোপোৱাৰ পিছত আৰক্ষীৰ সন্দেহ মাধৱ দাসৰ ওপৰতে কেন্দ্ৰিত হয়। অধিক জেৰাৰ সময়ত মাধৱ দাসে নিজৰ মাতৃ, শাহুৱেক আৰু ভনীয়েকক হ*ত্যা কৰাৰ কথা স্বীকাৰ কৰে। আৰক্ষীৰ মতে, মাধৱ দাসে জেৰাত জনাইছিল যে তেওঁৰ পত্নী উৰ্মিলাই পুত্ৰক লগত লৈ প্ৰায় ৯ মাহ ধৰি তেওঁৰ পৰা পৃথকে আছিল। সেই সময়ত উৰ্মিলাই সোণ-ৰূপৰ গহনা আৰু নগদ ধন লৈ যোৱা বুলি মাধৱ দাসে অভিযোগ কৰিছিল।
আৰক্ষীয়ে দাবী কৰা মতে, পত্নীৰ ওপৰত ক্ষুব্ধ হৈ মাধৱ দাসে উৰ্মিলা আৰু দেৱানৰ বিৰুদ্ধে প্ৰতিশোধ লোৱাৰ উদ্দেশ্যে ভুৱা অভিযোগ দিছিল। কিন্তু অধিক জেৰাৰ পিছত তেওঁ ২০২২ চনত উৰ্মিলাৰ সৈতে মিলি মাধৱ দাসৰ নিজ মাতৃ আৰু ভগ্নীৰ লগতে উৰ্মিলাৰো মাতৃক হ*ত্যা কৰাৰ কথা স্বীকাৰ কৰে।
আৰক্ষীৰ অভিযোগ অনুসৰি, ২০২২ চনৰ ৭ অক্টোবৰৰ নিশা মাধৱ দাস আৰু উৰ্মিলাই শান্তবেনক হ*ত্যা কৰিছিল। ইয়াৰ পিছত মৃ*তদেহটো এটা ড্ৰামৰ ভিতৰত ভৰাই চিমেণ্টৰ ব্লকৰ সৈতে ঘৰৰ বাৰাণ্ডাত খন্দা এটা গাঁতত পুতি থোৱা হৈছিল বুলি আৰক্ষীৰ জেৰাত স্বীকাৰ কৰিছে। বৰ্তমান ক্ৰাইম ব্ৰাঞ্চে ঘটনাটোৰ তদন্ত অব্যাহত ৰাখিছে আৰু মাধৱ দাসে কৰা স্বীকাৰোক্তি তথা তেওঁৰ দাবীসমূহৰ সত্যতা পৰীক্ষা কৰি আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
