যদি কানাডাই ভাৰতত নিষেধাজ্ঞা আৰোপ কৰে, তেন্তে লোকচান কাৰ?
ভাৰত আৰু কানাডাৰ সম্পৰ্কত উত্তেজনাই বিৰাজ কৰিছে। ইয়াৰ আঁৰৰ আটাইতকৈ ডাঙৰ কাৰণটো হ’ল খালিস্তানী বিচ্ছিন্নতাবাদী হৰদীপ সিং নিজ্জাৰৰ হত্যাকাণ্ডৰ সৈতে জড়িত বিষয়টো। যাৰ সন্দৰ্ভত কানাডাই ভাৰতৰ বিৰুদ্ধে ভিত্তিহীন অভিযোগ উত্থাপন কৰিছে। শেহতীয়াকৈ কানাডা চৰকাৰে ভাৰতীয় উচ্চায়ুক্তসকলৰ বিৰুদ্ধে গুৰুতৰ অভিযোগ উত্থাপন কৰি কয় যে ভাৰতেই নিজ্জাৰৰ হত্যাকাণ্ডত সহযোগী।
ইয়াৰ পিছত ভাৰত চৰকাৰে নিজৰ বিষয়াসকলক পুনৰ আহ্বান কৰাৰ সিদ্ধান্ত লয় আৰু লগতে ১৯ অক্টোবৰৰ ভিতৰত ৬ জন কানাডাৰ কূটনীতিবিদক ভাৰত এৰি যাবলৈ আলটিমেটাম দিয়ে। অৱশ্যে এই সকলোবোৰৰ মাজতে মঙলবাৰ ১৫ অক্টোবৰ তাৰিখে কানাডাৰ বৈদেশিক মন্ত্ৰী মেলানি জলিৰ এক বিবৃতি ওলাই আহিল, য’ত তেওঁ কয় যে তেওঁৰ দেশে ভাৰতৰ ওপৰত নিষেধাজ্ঞা আৰোপ কৰাৰ কথা চিন্তা কৰিছে। যদি এনেকুৱা কিবা এটা হয় তেন্তে কোনখন দেশৰ আটাইতকৈ বেছি লোকচান হ’ব!
বৰ্তমানে ভাৰত আৰু কানাডাৰ মাজত ৭০ হাজাৰ কোটি টকাৰ ব্যৱসায় চলি আছে। যদি ২০২২-২৩ বৰ্ষৰ কথা আহে, তেন্তে দুয়োখন দেশৰ মাজত ৮.৩ বিলিয়ন ডলাৰৰ ব্যৱসায় হৈছিল, যিটো পৰৱৰ্তী বছৰত ৮.৪ বিলিয়ন ডলাৰলৈ বৃদ্ধি পাইছিল। এই সময়ছোৱাত ভাৰতৰ ৰপ্তানি ৪.৬ বিলিয়ন ডলাৰলৈ বৃদ্ধি পোৱাৰ বিপৰীতে ভাৰতৰ আমদানি ৩.৮ বিলিয়ন ডলাৰ হৈয়েই আছে। বৰ্তমান দুয়োখন দেশৰ মাজত কোনো ধৰণৰ অৰ্থনৈতিক বিবাদ নাই যদিও এনেধৰণৰ কিবা এটা হ’লে ইয়াৰ প্ৰভাৱ দুয়োপক্ষতে পৰিব বুলি নুই কৰিব নোৱাৰি।
AsiaPacific.ca ৰ এক প্ৰতিবেদন অনুসৰি কানাডাৰ বিনিয়োগ কানাডাৰ পেঞ্চন ফাণ্ডে ভাৰতত প্ৰায় ৬ লাখ কোটি টকা বিনিয়োগ কৰিছে। ২০১৩ চনৰ পৰা ২০২৩ চনৰ ভিতৰত এই পুঁজিসমূহে ৰিয়েল এষ্টেট, বিত্তীয় সেৱা, ঔদ্যোগিক পৰিবহণ আৰু আন্তঃগাঁথনি খণ্ডত যথেষ্ট বিনিয়োগ কৰিছিল। ইয়াৰ উপৰিও ভাৰতত ৬০০ টা কানাডাৰ কোম্পানীয়ে ব্যৱসায় কৰি আছে, আনহাতে ৩০ টাতকৈও অধিক ভাৰতীয় কোম্পানীয়ে কানাডাত ৪০,৪৪৬ কোটি টকা বিনিয়োগ কৰিছে। ইয়াত ১৭ হাজাৰ লোকে কাম কৰে।
বাণিজ্য আৰু বিনিয়োগৰ ক্ষেত্ৰত ভাৰত আৰু কানাডাৰ অৰ্থনৈতিক সম্পৰ্ক সুদৃঢ়। ভাৰতে মূলতঃ কানাডালৈ ৰত্ন, গহনা, বহুমূলীয়া শিল, ঔষধ, ৰেডিমেড কাপোৰ, জৈৱিক ৰাসায়নিক পদাৰ্থ, আৰু লঘু অভিযান্ত্ৰিক সামগ্ৰী ৰপ্তানি কৰে। একে সময়তে ভাৰতে কানাডাৰ পৰা দাইল, বাতৰি কাকতৰ কাগজ, কাঠৰ পাল্প, এছবেষ্টছ, পটাছ, আইৰণ স্ক্ৰেপ, তাম, খনিজ পদাৰ্থ আৰু উদ্যোগিক ৰাসায়নিক সামগ্ৰী আমদানি কৰে।
কানাডাৰ নেশ্যনেল ইনভেষ্টমেণ্ট প্ৰমোচন এণ্ড ফেচিলিটেশ্যন এজেন্সী (Invest India)ৰ তথ্য অনুসৰি ভাৰতত বিদেশী বিনিয়োগকাৰীৰ ভিতৰত কানাডা ১৮ নম্বৰ স্থানত আছে। ২০২০-২১ চনৰ পৰা ২০২২-২৩ বৰ্ষৰ ভিতৰত কানাডাই ভাৰতত মুঠ ৩.৩১ বিলিয়ন ডলাৰ বিনিয়োগ কৰিছিল। কিন্তু এই বিনিয়োগ ভাৰতৰ মুঠ প্ৰত্যক্ষ বিদেশী বিনিয়োগৰ মাত্ৰ ০.৫% হে, যিটো কানাডাৰ সৈতে অৰ্থনৈতিক সম্পৰ্কৰ এটা সৰু কিন্তু গুৰুত্বপূৰ্ণ অংশ।
যদি ভাৰত আৰু কানাডাৰ মাজত চলি থকা কূটনৈতিক উত্তেজনা অব্যাহত থাকে তেন্তে ইয়াৰ ফলত দুয়োখন দেশৰ অৰ্থনীতিত গভীৰ প্ৰভাৱ পৰিব পাৰে। বিশেষকৈ ব্যৱসায়িক বিনিয়োগ আৰু আমদানি-ৰপ্তানিৰ ক্ষেত্ৰত হ্ৰাস পোৱা দেখা যাব পাৰে। এই পৰিস্থিতিৰ প্ৰতি লক্ষ্য ৰাখি দুয়োখন দেশেই অৰ্থনৈতিক কৌশল বিবেচনা কৰিব লাগিব আৰু সম্ভাৱ্য বিপদৰ সৈতে মোকাবিলা কৰিবলৈ সাজু হ’ব লাগিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
